ഹൈദരാബാദ്: ജനാധിപത്യത്തിലെ ഇരുണ്ട ദിനമാണിതെന്ന് ആന്ധ്രാപ്രദേശ് മുന് മുഖ്യമന്ത്രി ചന്ദ്രബാബു നായിഡു. ചരിത്രത്തില് ഇതുവരെ സംഭവിക്കാത്ത നിഷ്ഠൂരമായ പ്രവര്ത്തിയാണ് പോലീസ് നടപടിയെന്നും അദ്ദേഹം പറഞ്ഞു. തന്നെയും പിഡിപി നേതാക്കളെയും വീട്ടുതടങ്കലിലാക്കിയ സംഭവത്തില് പ്രതികരിക്കുകയായിരുന്നു അദ്ദേഹം.
വൈ.എസ് ജഗന്മോഹന് റെഡ്ഡി സര്ക്കാര് മനുഷ്യാവകാശങ്ങളും മൗലീകാവശങ്ങളും ലംഘിച്ചിരിക്കുന്നു. പോലീസിനും സര്ക്കാരിനും മുന്നറിയിപ്പ് നല്കുകയാണ്. അറസ്റ്റ് ചെയ്തതിലൂടെ തങ്ങളെ നിയന്ത്രിക്കാനാവില്ലെന്നും അദ്ദേഹം പറഞ്ഞു. പോലീസ് വീട്ടുതടങ്കലില് പാര്പ്പിച്ചതിനെതിരെ ബുധനാഴ്ച വൈകിട്ട് എട്ടുവരെ അദ്ദേഹം നിരാഹാരമിരിക്കും.
ചന്ദ്രബാബു നായിഡുവും മകന് നാരാ ലോകേഷും വീട്ടുതടങ്കലില് ആണ്. സര്ക്കാരിനെതിരെ പ്രതിഷേധ റാലി നടത്താനിരിക്കെയാണ് ചന്ദ്രബാബു നിയിഡുവിനെയും ടിഡിപി നേതാക്കളെയും പോലീസ് അറസ്റ്റ് ചെയ്തത്. ഗുണ്ടൂരില് നിരോധനാജ്ഞ പ്രഖ്യാപിച്ചു.
ബുധനാഴ്ച ഗുണ്ടൂരില് ചലോ അത്മാകൂര് റാലി നടത്തുമെന്ന് ടിഡിപി പ്രഖ്യാപിച്ചിരുന്നു. അത്മാകൂറില് വൈഎസ്ആര് കോണ്ഗ്രസ് ടിഡിപി പ്രവര്ത്തകര്ക്കുനേരെ അക്രമം അഴിച്ചുവിടുകയാണെന്ന് ആരോപിച്ചായിരുന്നു റാലി. ബുധനാഴ്ച രാവിലെ ചന്ദ്രബാബു നായിഡുവിന്റെ വീട്ടിലേക്കുപോകാനെത്തിയ ടിഡിപി നേതാക്കളെയും പ്രവര്ത്തകരെയും പോലീസ് അറസ്റ്റ് ചെയ്ത് നീക്കി.