തിരുവനന്തപുരം: കൊറോണ വൈറസ് ബാധയുടെ പശ്ചാത്തലത്തില് താമസിക്കാന് മുറി ലഭിക്കുന്നില്ലെന്ന പരാതിയുമായി സമീപിച്ച ചൈനക്കാരനെ തിരുവനന്തപുരം പോലീസ് ഐസൊലേഷന് വാര്ഡില് പ്രവേശിപ്പിച്ചു. പരാതിയുമായി സിറ്റി പോലീസ് കമ്മീഷണര് ഓഫീസിലെത്തിയ ജിഷോയു ഷാഓ എന്ന ചൈനക്കാരനെയാണ് ജനറല് ആശുപത്രിയിലെ ഐസൊലേഷന് വാര്ഡില് പ്രവേശിപ്പിച്ചത്.
25 വയസുള്ള ഇയാള്ക്ക് രോഗലക്ഷണങ്ങളില്ല. എങ്കിലും ശരീരത്തില് നിന്നു ശേഖരിച്ച സാംപിളുകള് പരിശോധനയ്ക്കായി അയച്ചു. പരിശോധനാഫലം വരുന്നതുവരെ ഇയാള് ഐസൊലേഷന് വാര്ഡില് തുടരും. ഈ വിവരം കേന്ദ്രസര്ക്കാരിനെയും അറിയിച്ചിട്ടുണ്ട്.
ജനുവരി 23-ന് ഡല്ഹിയിലെത്തിയ ഇയാള് ഡല്ഹി സന്ദര്ശനത്തിനുശേഷം കഴിഞ്ഞ ദിവസമാണു തിരുവനന്തപുരത്തെത്തിയത്. താമസിക്കാന് മുറി അന്വേഷിച്ച് ഹോട്ടലുകളില് കയറിയിറങ്ങിയെങ്കിലും ചൈനക്കാരനായതിനാല് ആരും മുറി നല്കിയില്ല. തുടര്ന്നു ഇയാള് സഹായം അഭ്യര്ഥിച്ച് പോലീസിനെ സമീപിക്കുകയായിരുന്നു.