ഡല്ഹി: അഹമ്മദാബാദിലെ സബർമതി നദിയിൽ നിന്ന് എടുത്ത ജലസാമ്പിളുകളിൽ കൊറോണ വൈറസിന്റെ സാന്നിധ്യം കണ്ടെത്തി . നഗരത്തിലെ കാൻക്രിയ, ചന്ദോള തടാകങ്ങളിൽ നിന്നും എടുത്ത സാമ്പിളുകളിലും വൈറസ് കണ്ടെത്തി .
ഐഐടി, ഗാന്ധിനഗർ, ജവഹർലാൽ നെഹ്റു യൂണിവേഴ്സിറ്റി സ്കൂൾ ഓഫ് എൻവയോൺമെന്റ് സയൻസ് എന്നിവയുടെ ഗവേഷകരാണ് സബർമതി നദി, ചന്ദോള, കാൻക്രിയ തടാകങ്ങളിൽ നിന്നുള്ള സാമ്പിളുകൾ ശേഖരിച്ചത്.
തടാകങ്ങളിലെയും നദികളിലെയും SARS-CoV-2 സാന്നിദ്ധ്യം അപകടകരമായ അവസ്ഥയിലേക്ക് നയിക്കുമെന്ന് ഗാന്ധിനഗറിലെ ഐഐടിയിലെ എർത്ത് സയൻസസ് വിഭാഗം പ്രൊഫസർ മനീഷ് കുമാർ പറഞ്ഞു.
2019 സെപ്റ്റംബർ 3 നും 2019 ഡിസംബർ 29 നും ഇടയിൽ ആഴ്ചയിൽ ഒരിക്കൽ ജലസാമ്പിളുകൾ ശേഖരിച്ചതായി പ്രൊഫസർ കുമാർ പറഞ്ഞു. 694 സാമ്പിളുകൾ സബർമതി നദിയിൽ നിന്ന് ശേഖരിച്ചപ്പോൾ 549 സാമ്പിളുകൾ ചന്ദോള തടാകത്തിൽ നിന്നും 402 സാമ്പിളുകൾ കാൻക്രിയ തടാകത്തിൽ നിന്നും ശേഖരിച്ചു.
സമാനമായ പരീക്ഷണങ്ങൾ രാജ്യത്തുടനീളം നടത്തണമെന്ന് ഗവേഷകർ അഭിപ്രായപ്പെട്ടു. വൈറസ് പ്രകൃതിദത്ത ജലത്തിൽ വളരെക്കാലം ജീവിക്കുമെന്ന് അവർ പറഞ്ഞു.
കോവിഡ് -19 ക്ലസ്റ്ററുകൾ തിരിച്ചറിയാൻ ഈ ആഴ്ച ആദ്യം ബെംഗളൂരുവിൽ നഗരത്തിലെ മലിനജല നിരീക്ഷണ സംവിധാനം ഏർപ്പെടുത്തിയ ആദ്യത്തെ സംസ്ഥാനമായി കർണാടക മാറി.
നേരത്തെ ഉത്തർപ്രദേശിലെയും ബീഹാറിലെയും ഗംഗാ നദിയിൽ കോവിഡ് -19 ബാധിതരുടെ മൃതദേഹങ്ങൾ കണ്ടെത്തിയിരുന്നു.
നൂറിലധികം മൃതദേഹങ്ങൾ നദിയിലേക്ക് വലിച്ചെറിഞ്ഞതായാണ് റിപ്പോർട്ടുകൾ.