അണ്ണാദുരൈയ്‌ക്കെതിരായ പരാമർശം; തമിഴ്‌നാട് ബിജെപി അധ്യക്ഷനെ വിമർശിച്ച് എഐഎഡിഎംകെ നേതാവ്

സിഎൻ അണ്ണാദുരൈ ഹിന്ദുമതത്തെ അവഹേളിച്ചുവെന്ന തമിഴ്‌നാട് ബിജെപി അധ്യക്ഷൻ അണ്ണാമലൈയുടെ പരാമർശത്തിനെതിരെ എഐഎഡിഎംകെ നേതാവ് സുഗുണപുരം പളനിസാമി വേലുമണി രംഗത്ത്. അണ്ണാദുരൈയ്‌ക്കെതിരെ സംസാരിക്കാൻ അണ്ണാമലയ്‌ക്ക് യോഗ്യതയുണ്ടോയെന്ന് കോയമ്പത്തൂരിൽ നടന്ന ഒരു പരിപാടിയിൽ വേലുമണി ചോദിച്ചു.

“അണ്ണാമലൈ ചില പരാമർശങ്ങൾ നടത്തി. സഖ്യത്തിലായതിനാൽ ഇത്തരം അഭിപ്രായങ്ങൾ പറയാനാകില്ല. അമ്മയെക്കുറിച്ച് (ജയലളിത) സംസാരിക്കാൻ അണ്ണാമലൈ ഉൾപ്പെടെ ആർക്കും അവകാശമില്ല. അപ്പോൾ  തന്നെ അണ്ണാമലൈക്കെതിരെ എഐഎഡിഎംകെ ഒരു പ്രമേയം പാസാക്കി. ഇപ്പോഴിതാ അണ്ണയെ കുറിച്ച് പറഞ്ഞിരിക്കുന്നു. അത് ആവശ്യമായിരുന്നോ? ഈ പരാമർശം നടത്താൻ അണ്ണാമലൈ യോഗ്യനാണോ?”-എഐഎഡിഎംകെ നേതാവ് ചോദിച്ചു.

മധുരയിൽ നടന്ന ഒരു പരിപാടിയിൽ അണ്ണാദുരൈ ഹിന്ദുമതത്തെ പരിഹസിച്ചുവെന്ന് അണ്ണാമലൈ ആരോപിച്ചതിനെ തുടർന്ന് 2019 മുതൽ സഖ്യത്തിലുള്ള എഐഎഡിഎംകെയും ബിജെപിയും തമ്മിൽ സംഘർഷം പൊട്ടിപ്പുറപ്പെട്ടിരുന്നു. അണ്ണാമലൈയുടെ അവകാശവാദങ്ങളോട് പ്രതികരിച്ച എഐഎഡിഎംകെ നേതാവ് ഡി ജയകുമാർ, ഇനി ബിജെപിയുമായി സഖ്യത്തിലില്ലെന്നും വ്യക്തമാക്കിയിരുന്നു.

സഖ്യത്തിലായിരുന്നിട്ടും ബിജെപി എഐഎഡിഎംകെക്കെതിരെ സംസാരിച്ചതിന്റെ നിയമസാധുതയെ വേലുമണി ചോദ്യം ചെയ്തിരുന്നു. “സഖ്യത്തിലായാലും ആത്മാഭിമാനം കൈവിടില്ല. സഖ്യത്തിലായിരുന്നിട്ടും തോന്നുന്നതെന്തും സംസാരിക്കുമ്പോൾ നമുക്ക് എങ്ങനെ ഒരു നേതാവായി അവരെ അംഗീകരിക്കാനാകും? എഐഎഡിഎംകെ നേതാവ് ചോദിച്ചു.

നേരത്തെ, തമിഴ്‌നാട് മുൻ മുഖ്യമന്ത്രി ജെ ജയലളിതക്കെതിരെ പരോക്ഷ പരാമർശം നടത്തിയതിന് പിന്നാലെ ജൂണിൽ എഐഎഡിഎംകെ അണ്ണാമലൈയ്‌ക്കെതിരെ പ്രമേയം പാസാക്കിയിരുന്നു. ഒരു ഇംഗ്ലീഷ് ദിനപത്രത്തിന് നൽകിയ അഭിമുഖത്തിൽ അഴിമതിയെക്കുറിച്ചും സംസ്ഥാനത്തെ മുൻ മുഖ്യമന്ത്രിമാർ അഴിമതിക്കേസുകളിൽ ശിക്ഷിക്കപ്പെട്ടതെങ്ങനെയെന്നും അണ്ണാമലൈ പറഞ്ഞിരുന്നു.