'ഇന്ത്യ'യുടെ ലോഗോ പ്രകാശനം ഇന്ന് ഇല്ല ; കോർഡിനേഷൻ കമ്മിറ്റി രൂപീകരണം ഇന്ന് നടന്നേക്കും

മുംബൈയിൽ നടക്കുന്ന പ്രതിപക്ഷ സഖ്യം ഇന്ത്യയുടെ മൂന്നാം യോഗത്തിന്റെ രണ്ടാം ദിവസമായ ഇന്ന് കോർഡിനേഷൻ കമ്മിറ്റി രൂപീകരണം ഉൾപ്പെടെ നിരവധി സുപ്രധാന കാര്യങ്ങളിൽ സഖ്യം തീരുമാനങ്ങൾ എടുക്കുമെന്നാണ് പ്രതീക്ഷിക്കുന്നത്. അതേസമയം സഖ്യത്തിന്റെ ലോഗോ പ്രകാശനം ഇന്ന് ഉണ്ടാകില്ല.

2024ലെ ലോക്‌സഭാ തിരഞ്ഞെടുപ്പിൽ ഭാരതീയ ജനതാ പാർട്ടി (ബിജെപി) നേതൃത്വത്തിലുള്ള ദേശീയ ജനാധിപത്യ സഖ്യത്തെ (എൻഡിഎ) നേരിടാനുള്ള പ്രചാരണ തന്ത്രം രൂപപ്പെടുത്താനും പ്രതിപക്ഷത്തിന്റെ ഔപചാരിക ഘടനയ്ക്ക് അന്തിമരൂപം നൽകാനും സഖ്യം ലക്ഷ്യമിടുന്നു . 

സമ്മേളനത്തിന്റെ പ്രധാന അജണ്ടകളിലൊന്നാണ് ഏകോപന സമിതി രൂപീകരണമാണ്. കേന്ദ്രം, സംസ്ഥാനം എന്നിങ്ങനെ രണ്ട് തലങ്ങളിലായാണ് കോഓർഡിനേഷൻ കമ്മിറ്റി രൂപീകരിക്കുന്നതെന്ന് അടുത്ത വൃത്തങ്ങൾ അറിയിച്ചു.

പാർലമെന്റ് തിരഞ്ഞെടുപ്പ് നേരത്തേ പ്രഖ്യാപിക്കുമെന്ന ഊഹാപോഹങ്ങൾ കണക്കിലെടുത്ത് ഏകോപന സമിതിയുടെയും മറ്റ് ഗ്രൂപ്പുകളുടെയും രൂപീകരണം ഉടൻ നടത്തേണ്ടതുണ്ടെന്ന നിഗമനത്തിലാണ്  സഖ്യകക്ഷികൾ. 

ഇന്ത്യാ ബ്ലോക്കിലെ ഘടകകക്ഷികൾ തമ്മിലുള്ള ഏകോപനം സുഗമമാക്കുന്നതിന് ഒരു പുതിയ സെക്രട്ടേറിയറ്റും യോഗത്തിൽ പ്രഖ്യാപിക്കും. സെക്രട്ടേറിയറ്റ് രാജ്യതലസ്ഥാനത്ത് സ്ഥാപിക്കാനാണ് സാധ്യത. വരാനിരിക്കുന്ന 2024 ലോക്‌സഭാ തിരഞ്ഞെടുപ്പിനുള്ള സീറ്റ് വിഭജനം യോഗത്തിൽ പ്രധാന സ്ഥാനം നേടി. സീറ്റ് വിഭജനത്തിൽ സെപ്തംബർ 30ന് തീരുമാനമെടുക്കുമെന്ന് സഖ്യം അറിയിച്ചു.