'അന്വേഷണം സത്യം തേടുന്നതില്‍ അടിയുറച്ചതല്ല, മറിച്ച് തനിക്കെതിരെയുള്ള ഒരു തന്ത്രമാണ്'; ഇഡി സമൻസിനെതിരെ വിമർശനവുമായി ഝാർഖണ്ഡ് മുഖ്യമന്ത്രി ഹേമന്ത് സോറൻ

എൻഫോഴ്‌സ്‌മെന്റ് ഡയറക്ടറേറ്റിന്റെ (ഇഡി) ഏഴാമത്തെ സമൻസിനെതിരെ ശക്തമായ പ്രതികരണവുമായി ഝാർഖണ്ഡ് മുഖ്യമന്ത്രി ഹേമന്ത് സോറൻ. ഇഡി അന്വേഷണത്തെ വിമർശിച്ച സോറൻ തനിക്കെതിരെയുള്ള അന്വേഷണം പക്ഷപാതപരമാണെന്നും പറഞ്ഞു. ഝാർഖണ്ഡ് മുഖ്യമന്ത്രിക്കെതിരെ അഴിമതിയും സാമ്പത്തിക ക്രമക്കേടും ആരോപിച്ച് എൻഫോഴ്‌സ്‌മെന്റ് ഡയറക്ടറേറ്റ് പരിശോധന ശക്തമാക്കിയിരുന്നു.

 ഭൂമിയിടപാടുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ ഹേമന്ത് സോറന് അടുത്തിടെ ഇഡി സമൻസ് അയച്ചിരുന്നു. അന്വേഷണവുമായി ബന്ധപ്പെട്ട് ചോദ്യം ചെയ്യുന്നതിനുള്ള തീയതിയും സ്ഥലവും തിരഞ്ഞെടുക്കാൻ സോറനെ അനുവദിക്കുന്നതിനുള്ള അവസരവും ഏജൻസി നൽകിയിട്ടുണ്ട്. എന്നാൽ ഈ ആവശ്യത്തോട് മുഖ്യമന്ത്രി ഇതുവരെ പ്രതികരിച്ചിട്ടില്ല.

എൻഫോഴ്‌സ്‌മെന്റ് ഡയറക്‌ടറേറ്റിന്റെ നടന്നുകൊണ്ടിരിക്കുന്ന നടപടികളിൽ ഹേമന്ത് സോറൻ അതൃപ്തി പ്രകടിപ്പിച്ചു. അന്വേഷണം “സത്യം തേടുന്നതിൽ അടിയുറച്ചതല്ല”,മറിച്ച് തനിക്കെതിരെയുള്ള ഒരു തന്ത്രമാണെന്നാണ് അദ്ദേഹം പറഞ്ഞത്. തന്റെ പ്രതിച്ഛായ തകർക്കുകയും രാഷ്ട്രീയ രംഗത്തെ തന്റെ പ്രവർത്തനത്തെ അപകീർത്തിപ്പെടുത്തുകയും ചെയ്യുക എന്നതാണ് ഏജൻസിയുടെ ലക്ഷ്യമെന്നും അദ്ദേഹം ആരോപിച്ചു. സോറന്റെ പാർട്ടിയായ ഝാർഖണ്ഡ് മുക്തി മോർച്ച (ജെഎംഎം) മുഖ്യമന്ത്രിയെ പിന്തുണച്ച് രം​ഗത്തെത്തിയിട്ടുണ്ട്. 

അന്വേഷണ ഏജൻസിയുടെ ആവർത്തിച്ചുള്ള സമൻസ് രാഷ്ട്രീയ പകപോക്കലിന്റെ വ്യക്തമായ നടപടിയാണെന്ന് പാർട്ടി ആരോപിച്ചു. പ്രതിപക്ഷ നേതാക്കളെ ലക്ഷ്യമിടാനും ഭീഷണിപ്പെടുത്താനും നിലവിലെ കേന്ദ്രസർക്കാർ കേന്ദ്ര ഏജൻസിയെ ദുരുപയോഗം ചെയ്യുകയാണെന്നാണ് പാർട്ടി പ്രതിനിധികളുടെ വാദം.