ആരൊക്കെ അംഗീകരിച്ചാലും ഇല്ലെങ്കിലും ഇന്ത്യ ഒരു 'ഹിന്ദു രാഷ്ട്രം' ; മോഹന്‍ ഭാഗവത്

മഹാരാഷ്ട്ര: ആരൊക്കെ അംഗീകരിച്ചാലും ഇല്ലെങ്കിലും ഇന്ത്യ ഒരു 'ഹിന്ദു രാഷ്ട്രം' ആണെന്ന് ആര്‍എസ്എസ് തലവന്‍ മോഹന്‍ ഭാഗവത്. ഇതൊരു ഹിന്ദു രാഷ്ട്രമാണ്, ആളുകള്‍ അത് അംഗീകരിക്കുന്നുണ്ട്. എന്നിരുന്നാലും, കുറച്ച് ആളുകള്‍ക്ക് അത് ഇപ്പോഴും മനസ്സിലാകുന്നില്ല, ഒരു വിഭാഗത്തിന് ഇത് അറിയാമെങ്കിലും പറയാന്‍ വിസമ്മതിക്കുന്നുവെന്നും അദ്ദേഹം പറഞ്ഞു. ആര്‍എസ്എസിന്റെ മറാത്തി ദിനപത്രമായ തരുണ്‍ ഭാരത് പ്രസിദ്ധീകരിക്കുന്ന ശ്രീ നര്‍കേസരി പ്രകാശന്‍ ലിമിറ്റഡിന്റെ പുതിയ ഓഫീസിന്റെ ഉദ്ഘാടന ചടങ്ങില്‍ സംസാരിക്കുകയായിരുന്നു മോഹന്‍ ഭാഗവത്.

രാഷ്ട്രം കെട്ടിപ്പടുക്കുന്നതിനും രാജ്യത്തെ ലോകശക്തിയാക്കുന്നതിനും സഹായിക്കണമെന്നും മാധ്യമങ്ങളോട് ഭാഗവത് ആവശ്യപ്പെട്ടു. മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നാവിസും പരിപാടിയില്‍ പങ്കെടുത്തിരുന്നു. 'ശരിയായ ആശയങ്ങള്‍' പ്രചരിപ്പിക്കുകയാണ് മാധ്യമങ്ങള്‍ ചെയ്യേണ്ടതെന്ന് മോഹന്‍ ഭാഗവതിന്റെ പ്രസംഗത്തിന് ശേഷം ദേവേന്ദ്ര ഫഡ്നാവിസ് പ്രസംഗിച്ചു.

സാമൂഹിക അവബോധം ഉയര്‍ത്താന്‍ മാധ്യമങ്ങള്‍ പ്രവര്‍ത്തിക്കണം. മാധ്യമങ്ങള്‍ പൗരന്മാരുടെ ചിന്തകളിലേക്ക് പോസിറ്റിവിറ്റി കൊണ്ടുവരുമെന്ന് പ്രതീക്ഷിക്കുന്നു, കൂടാതെ നിഷേധാത്മകത ഇല്ലാതാക്കാന്‍ ശ്രമിക്കുമെന്നും കരുതുന്നു. ബിസിനസ്സിനേക്കാള്‍ ചിന്തകള്‍ക്ക് മുന്‍ഗണന ലഭിക്കുമെന്ന് പ്രതീക്ഷിക്കുന്നുവെന്ന് ഫഡ്‌നാവിസ് പറഞ്ഞു.

മാധ്യമങ്ങളുടെ അടിസ്ഥാന ആശയപരമായ കാതല്‍ മാറ്റരുതെന്നും എല്ലാവരേയും ഉള്‍ക്കൊള്ളുന്നതാണ് ഒരു പത്രത്തിന്റെ വ്യക്തിത്വമെന്നും ചടങ്ങില്‍ മുഖ്യാതിഥിയായിരുന്ന കേന്ദ്രമന്ത്രി നിതിന്‍ ഗഡ്കരി പറഞ്ഞു.