/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/5ye7wdIdoNy6vpyeqP9X.jpg)
muttil tree cut
വയനാട്: മുട്ടില്‍ മരംമുറി കേസില്‍ കുറ്റപത്രം സമര്‍പ്പിക്കുന്നതില്‍ വനം വകുപ്പ് നിയമോപദേശം തേടി. പൊലീസിന്റെ പ്രത്യേക സംഘം കേസ് അന്വേഷിക്കുന്നതിനാല്‍ വനംവകുപ്പ് തുടര്‍ നടപടി സ്വീകരിക്കണോ എന്നതിലാണ് വ്യക്തത തേടിയത്. മുട്ടില്‍ മരം മുറി കേസില്‍ വനം വകുപ്പ് 43 കേസുകളാണ് രജിസ്റ്റര്‍ ചെയ്തത്. അനുവാദമില്ലാതെ പട്ടയഭൂമിയിലെ മരം മുറിച്ചതടക്കം കുറ്റങ്ങളാണ് ചുമത്തിയത്. മെല്ലപ്പോക്ക് വാര്‍ത്തയായതോടെ കെഎല്‍സി നടപടികള്‍ വേഗത്തിലാക്കാന്‍ റവന്യൂവകുപ്പ് നീക്കം തുടങ്ങി.
മുട്ടില്‍ മരം മുറി കേസില്‍ വനം വകുപ്പ് 43 കേസുകളാണ് രജിസ്റ്റര്‍ ചെയ്തത്. മരം കണ്ടുകെട്ടുന്നതടക്കം നടപടികള്‍ പൂര്‍ത്തിയാക്കി. അന്വേഷണവും പൂര്‍ത്തിയായി എന്ന് വനംവകുപ്പ് അവകാശപ്പെടുന്നു. പക്ഷേ, ഇതുവരെ കുറ്റപത്രം നല്‍കിയിട്ടില്ല. പൊലീസിന്റെ പ്രത്യേക സംഘം, കേസ് അന്വേഷിക്കുന്നതിനാല്‍, വനംവകുപ്പ് കുറ്റപത്രം നല്‍കേണ്ടതില്ല എന്നാണ് വിലയിരുത്തല്‍. ഇക്കാര്യം ഉറപ്പാക്കാനാണ് ഡയറക്ടറല്‍ ജനറല്‍ ഓഫ് പ്രോസിക്യൂഷനോട് നിയമോപദേശം തേടിയത്. നിയമോപദേശം ലഭിക്കുന്നതിന് അനുസരിച്ചാകും തുടര്‍ നടപടി. വനം വകുപ്പ് കേസുകളില്‍ പരമാവധി ആറുമാസം തടവോ പിഴയോ ആകും ശിക്ഷ. എന്നാല്‍ പൊലീസ് അന്വേഷണത്തില്‍ പൊതുമുതല്‍ നശിപ്പിച്ച കുറ്റം ചുമത്തിയിട്ടുണ്ട്. ഇതാണ് വനംവകുപ്പ് നിയമോപദേശം തേടാന്‍ ഒരു കാരണം.
മുട്ടില്‍ സൗത്ത് വില്ലേജില്‍ നിന്ന് അഗസ്റ്റിന്‍ സഹോദരങ്ങള്‍ 104 മരങ്ങളാണ് മുറിച്ചു കടത്തിയത്. നിലവില്‍ കുപ്പാടി ഡിപ്പോയില്‍ മരങ്ങള്‍ സൂക്ഷിച്ചിട്ടുണ്ട്. മരങ്ങള്‍ക്ക് 500 വര്‍ഷം വരെ പഴക്കമുണ്ടെന്ന ഡിഎന്‍എ റിപ്പോര്‍ട്ട് കിട്ടിയതോടെ, വൈകാതെ പൊലീസ് കുറ്റപത്രം നല്‍കും. എന്നാല്‍ റവന്യൂ , വനംവകുപ്പ് നടപടികള്‍ ഇഴയുന്നത് ശരിയാല്ലെന്നാണ് മുന്‍ പ്രോസിക്യൂട്ടര്‍ അടക്കം വിമര്‍ശിക്കുന്നത്. ഒരേ സമയം റവന്യൂ, വനം , പൊലീസ് അന്വേഷണ റിപ്പോര്‍ട്ടുകള്‍ വന്നാലേ കുറ്റക്കാരെ ശിക്ഷിക്കാനും പിഴയീടാക്കാനും കഴിയൂ എന്നാണ് വിലയിരുത്തല്‍. അല്ലെങ്കില്‍ തുടരന്വേഷണമോ, പുതിയ ഏജന്‍സിയെ കേസ് ഏല്‍പ്പിക്കലോ ഒക്കെ വന്നേക്കാം. ഇതെല്ലാം പ്രതികള്‍ രക്ഷപ്പെടാനേ വഴിയൊരുക്കൂ എന്നാണ് വാദം.