/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/5Yj93M6RqlytHAy9ciej.jpg)
പാര്ലമെന്റിലുണ്ടായ സുരക്ഷാ വീഴ്ചയുമായി ബന്ധപ്പെട്ടുള്ള പ്രതിഷേധത്തില് പാര്ലമെന്റില് നിന്ന് ഇതുവരെ സസ്പെന്ഡ് ചെയ്തത് 141 അംഗങ്ങളെ. 95 എംപിമാരെയാണ് ലോക്സഭയില് നിന്ന് സസ്പെന്ഡ് ചെയ്തത്. 46 പേരെ രാജ്യസഭയില് നിന്നും സസ്പെന്ഡ് ചെയ്തു. 2001ലെ പാര്ലമെന്റ് ആക്രമണത്തിന് 22 വര്ഷം തികയുന്ന ഡിസംബര് 13ന് നടന്ന പാര്ലമെന്റ് സുരക്ഷാ വീഴ്ച്ചയെക്കുറിച്ച് കേന്ദ്രമന്ത്രി അമിത് ഷാ പ്രസ്താവന നടത്തണമെന്ന പ്രതിപക്ഷത്തിന്റെ ആവശ്യത്തെ തുടര്ന്നാണ് ഈ സംഭവവികാസം ഉണ്ടായത്. നടപടിയില് പ്രതിഷേധിച്ച് ഡിസംബര് 22ന് രാജ്യവ്യാപകമായി പ്രതിഷേധം സംഘടിപ്പിക്കുമെന്ന് ഇന്ത്യ സഖ്യമറിയിച്ചു. എംപിമാരുടെ സസ്പെന്ഷന് ജനാധിപത്യവിരുദ്ധമാണെന്നും പ്രതിപക്ഷ സംഘം ആക്ഷേപിച്ചു. എന്നാല് സസ്പെന്ഡ് ചെയ്യപ്പെട്ട എംപിമാര് ലോക്സഭാ സ്പീക്കറെയും രാജ്യസഭാ ചെയര്മാനെയും പാര്ലമെന്റ് സ്ഥാപനത്തെയും അപമാനിച്ചെന്നാണ് സര്ക്കാരിന്റെ വാദം.
അനിയന്ത്രിതമായി പെരുമാറിയതിന് 49 പ്രതിപക്ഷ എംപിമാരെ കൂടി ലോക്സഭയില് നിന്ന് ചൊവ്വാഴ്ച സസ്പെന്ഡ് ചെയ്തതോടെ പാര്ലമെന്റിന്റെ ഇരുസഭകളിലും നടപടി നേരിടുന്ന എംപിമാരുടെ ആകെ എണ്ണം 141 ആയി. സസ്പെന്ഡ് ചെയ്യപ്പെട്ട എംപിമാര് പാര്ലമെന്റ് ചേംബറിലും ലോബിയിലും ഗാലറിയിലും പ്രവേശിക്കുന്നത് വിലക്കി ലോക്സഭാ സെക്രട്ടേറിയറ്റ് സര്ക്കുലര് പുറത്തിറക്കി. പാര്ലമെന്റ് സുരക്ഷാ വീഴ്ച്ചയില് കേന്ദ്രമന്ത്രി അമിത് ഷായുടെ പ്രസ്താവന വേണമെന്ന പ്രതിപക്ഷത്തിന്റെ ആവശ്യത്തെത്തുടര്ന്ന് 141 എംപിമാരെ സസ്പെന്ഡ് ചെയ്തതിനെതിരെ ഡിസംബര് 22ന് രാജ്യവ്യാപകമായി പ്രതിഷേധം സംഘടിപ്പിക്കുമെന്ന് കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ പറഞ്ഞു.
'ഞങ്ങള് നിരവധി തീരുമാനങ്ങള് എടുത്തിട്ടുണ്ട്, ഒന്ന് സസ്പെന്ഡ് ചെയ്ത എംപിമാരുടെ കാര്യമാണ്. ഞങ്ങള് ഇതിനെതിരെ പോരാടും; ഇത് തെറ്റാണ്. എംപിമാരുടെ സസ്പെന്ഷനെതിരെ ഡിസംബര് 22ന് അഖിലേന്ത്യാ പ്രതിഷേധം സംഘടിപ്പിക്കാനാണ് തീരുമാനം. സസ്പെന്ഷന് ജനാധിപത്യ വിരുദ്ധമാണ്. ജനാധിപത്യത്തെ സംരക്ഷിക്കാന് നാമെല്ലാവരും പോരാടേണ്ടതുണ്ട്. സുരക്ഷാവീഴ്ചയെക്കുറിച്ച് ഞങ്ങള് പാര്ലമെന്റില് ഉന്നയിച്ചു. അമിത് ഷായോ പ്രധാനമന്ത്രി മോദിയോ പാര്ലമെന്റില് വന്ന് ലോക്സഭയിലും രാജ്യസഭയിലും പാര്ലമെന്റ് സുരക്ഷാ ലംഘനത്തെക്കുറിച്ച് സംസാരിക്കണമെന്ന് പറയുന്നു, പക്ഷേ അവര് അത് ചെയ്യാന് വിസമ്മതിക്കുന്നു,'' ഖാര്ഗെ പറഞ്ഞു.
നാഷണല് കോണ്ഫറന്സ് നേതാവ് ഫാറൂഖ് അബ്ദുള്ള, കോണ്ഗ്രസ് അംഗങ്ങളായ ശശി തരൂര്, മനീഷ് തിവാരി, എന്സിപി നേതാവ് സുപ്രിയ സുലെ, എസ്പി അംഗം ഡിംപിള് യാദവ് എന്നിവരുള്പ്പെടെയുള്ള 49 പേരെയാണ് ചൊവ്വാഴ്ച സസ്പെന്ഡ് ചെയ്തത്. പ്രതിപക്ഷ നിയമസഭാംഗങ്ങള്ക്കെതിരായ നടപടി രണ്ടാം ദിവസവും തുടരുന്നതിനിടെ, എന്സിപി അധ്യക്ഷന് ശരദ് പവാര് രാജ്യസഭാ ചെയര്മാന് ജഗ്ദീപ് ധന്ഖറിന് കത്തെഴുതി. പാര്ലമെന്റ് നടപടികളുടെ താല്പര്യം കണക്കിലെടുത്ത് എംപിമാരുടെ സസ്പെന്ഷന് വിഷയം പരിഹരിക്കാന് ആവശ്യപ്പെടുകയും ചെയ്തു. ഭരണകക്ഷിയായ ബിജെപി വിയോജിപ്പുകളെ അടിച്ചമര്ത്തുകയും ജനാധിപത്യ വ്യവഹാരത്തെ സ്തംഭിപ്പിക്കുകയും ചെയ്തുവെന്ന് ആരോപിച്ച് പ്രതിപക്ഷ നേതാക്കള് സസ്പെന്ഷനുകളെ ശക്തമായി വിമര്ശിച്ചു.