/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/eh5OURhnJmcyMpCLD441.jpg)
കാശ്മീര് വിഷയത്തില് കേന്ദ്രസര്ക്കാരിന്റെ തീരുമാനം സുപ്രീം കോടതി ശരിവച്ചതിനെ പ്രശംസിച്ച് പ്രധാനമന്ത്രി നരേന്ദ്ര മോദി. 'ഏക് ഭാരത്, ശ്രേഷ്ഠ ഭാരത് ആത്മാവിനെ ശക്തിപ്പെടുത്തി'.- പ്രധാനമന്ത്രി പറഞ്ഞു. ഭരണഘടനയുടെ 370-ാം അനുച്ഛേദം റദ്ദാക്കി ജമ്മു കശ്മീരില് നിന്ന് പ്രത്യേക പദവി എടുത്തുകളയുകയും, കേന്ദ്ര ഭരണ പ്രദേശങ്ങളായി വിഭജിക്കുകയും ചെയ്ത കേന്ദ്രസര്ക്കാരിന്റെ തീരുമാനം കഴിഞ്ഞ ദിവസം സുപ്രീം കോടതി ശരിവച്ചിരുന്നു.
''ഡിസംബര് 11ലെ വിധിയിലൂടെ, ഏക് ഭാരത്, ശ്രേഷ്ഠ ഭാരത് എന്നതിന്റെ ആത്മാവിനെ സുപ്രിം കോടതി ശക്തിപ്പെടുത്തി - ഐക്യത്തിന്റെ ബന്ധനങ്ങളും നല്ല ഭരണത്തിനുള്ള പ്രതിബദ്ധതയും അത് നമ്മെ ഓര്മ്മിപ്പിക്കുന്നു.'- ദ ഹിന്ദു ദിനപത്രത്തിലെഴുതിയ ലേഖനത്തിലാണ് പ്രധാനമന്ത്രി ഇക്കാര്യം പറഞ്ഞത്. ജമ്മു കശ്മീരിന്റെ പ്രത്യേക പദവി റദ്ദാക്കിയ രാഷ്ട്രപതിയുടെ 2019 ഉത്തരവ് സാധുവാണെന്ന് ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ സുപ്രീം കോടതിയുടെ അഞ്ചംഗ ഭരണഘടനാ ബെഞ്ച് കഴിഞ്ഞ ദിവസം ഉത്തരവിട്ടിരുന്നു.
ഓരോ ഇന്ത്യക്കാരനും വിലമതിക്കുന്ന, ഇന്ത്യയുടെ പരമാധികാരവും അഖണ്ഡതയും കോടതി ഉയര്ത്തിപ്പിടിച്ച വിധിയിലൂടെ, 2019 ആഗസ്ത് 5-ന് എടുത്ത തീരുമാനം ഭരണഘടനാപരമായ ഉദ്ദേശത്തോടെയാണെന്ന് കോടതി നിരീക്ഷിച്ചു. അത് സംയോജനമാണ്, ശിഥിലീകരണമല്ലെന്നും കോടതി പറഞ്ഞു. കൂടാതെ വളരെ അടിസ്ഥാനപരമായ കാര്യങ്ങളില് വ്യക്തമായ നിലപാട് സ്വീകരിക്കുന്നതിനുപകരം, രാജ്യം ദ്വൈതത്വം അനുവദിച്ചത് ആശയക്കുഴപ്പത്തിലേക്ക് നയിച്ചുവെന്ന് പ്രധാനമന്ത്രി അഭിപ്രായപ്പെട്ടു.
'നിര്ഭാഗ്യവശാല്, സ്വാതന്ത്ര്യസമര കാലത്ത് ജമ്മു-കശ്മീര് അത്തരമൊരു മാനസികാവസ്ഥയുടെ വലിയ ഇരയായി മാറി. ദേശീയോദ്ഗ്രഥനത്തിന് ഒരു പുതിയ തുടക്കം കുറിക്കാന് ഞങ്ങള്ക്ക് ഒരു തിരഞ്ഞെടുപ്പുണ്ടായിരുന്നു. ദീര്ഘകാല ദേശീയ താല്പ്പര്യങ്ങള് അവഗണിച്ചിട്ടാണെങ്കിലും ആശയക്കുഴപ്പത്തിലായ സമൂഹ സമീപനം തുടരാന് ഞങ്ങളും തീരുമാനിച്ചു.
എന്നാല് ജമ്മു കശ്മീരില് നടന്നത് നമ്മുടെ രാജ്യത്തോടും അവിടെ താമസിക്കുന്നവരോടും ചെയ്ത വലിയ വഞ്ചനയാണെന്ന ഉറച്ച വിശ്വാസമായിരുന്നു എന്നും ഉണ്ടായിരുന്നതെന്നും പ്രധാനമന്ത്രി ലേഖനത്തില് പറഞ്ഞു. ഇന്ത്യയുടെ വടക്കേയറ്റത്തെ അന്തരീക്ഷം 2019 മുതല് നല്ല രീതിയില് മാറിയെന്ന് അവകാശപ്പെട്ട പ്രധാനമന്ത്രി, ഇന്ന്, ജനങ്ങളുടെ സ്വപ്നങ്ങള് ഭൂതകാലത്തിന്റെ തടവുകാരല്ല, ഭാവിയുടെ സാധ്യതകളാണ്. നിരാശയ്ക്ക് പകരം വികസനവും ജനാധിപത്യവും അന്തസ്സും ഇന്നവര്ക്കുണ്ടെന്നും പറഞ്ഞു.
കേന്ദ്ര സര്ക്കാര് ആര്ട്ടിക്കിള് 370 റദ്ദാക്കി, ജമ്മു കശ്മീരിനെ ജമ്മു-കശ്മീര്, ലഡാക്ക് എന്നീ രണ്ട് കേന്ദ്രഭരണ പ്രദേശങ്ങളായി പുനഃസംഘടിപ്പിച്ചിരുന്നു. ഈ തീരുമാനം നടപ്പിലാക്കി നാല് വര്ഷത്തിന് ശേഷമാണ് രാഷ്ട്രപതിയുടെ അധികാര വിനിയോഗം തെറ്റല്ലെന്ന് സുപ്രീം കോടതി വിധിക്കുന്നത്. 2024 സെപ്റ്റംബര് 30-നകം ജമ്മു കശ്മീരില് നിയമസഭാ തിരഞ്ഞെടുപ്പ് നടത്താന് തിരഞ്ഞെടുപ്പ് കമ്മീഷന് (ഇസി) നടപടികള് കൈക്കൊള്ളണമെന്നും സുപ്രീം കോടതി വിധിയില് പറയുന്നു. കേന്ദ്രഭരണ പ്രദേശമായ ജമ്മു കശ്മീരിന്റെ സംസ്ഥാന പദവി എത്രയും വേഗം പുനഃസ്ഥാപിക്കണമെന്നും കോടതി നിര്ദേശിച്ചു.