പരേതന് ശോഭനമായൊരു ഭാവി ആശംസിച്ചുകൊണ്ടൊരു മരണസര്‍ട്ടിഫിക്കറ്റ്; ഏറ്റെടുത്ത് സോഷ്യല്‍മീഡിയ

ഉന്നാവ്​: പരേതന് ശോഭനമായൊരു ഭാവി ആശംസിച്ചു കൊണ്ടുള്ള മരണ സര്‍ട്ടിഫിക്കറ്റാണ് സോഷ്യല്‍മീഡിയയില്‍ വൈറലാകുന്നത്. ഉത്തര്‍പ്രദേശിലെ ഉന്നാവ്​ ജില്ലയിലെ ഒരു ഗ്രാമമുഖ്യനാണ് മരണ സര്‍ട്ടിഫിക്കറ്റില്‍ ആശംസകള്‍ അറിയിച്ചത്.

സര്‍വിയ ഗ്രാമത്തിലെ ലക്ഷ്മി ശങ്കര്‍ എന്നയാളുടെ മരണസര്‍ട്ടിഫിക്കറ്റ് തയ്യാറാക്കിയതിലാണ് വില്ലേജ് അധികാരിക്ക് പിശക് സംഭവിച്ചത്. മരണ സര്‍ട്ടിഫിക്കറ്റ് നല്‍കുന്നതിനൊപ്പം മരിച്ചയാള്‍ക്ക് നല്ല ഭാവിക്കുള്ള ആശംസയും വില്ലേജ് അധികാരി സര്‍ട്ടിഫിക്കറ്റില്‍ കുറിച്ചു.

ജനുവരി 22നാണ്​ ലക്ഷ്​മി ശങ്കര്‍ അസുഖബാധിതനായി മരിക്കുന്നത്​. തുടര്‍ന്ന്​ സാമ്പത്തിക ക്രയ വിക്രയങ്ങള്‍ക്ക്​ വേണ്ടി മരണ സര്‍ട്ടിഫിക്കറ്റിനായി ലക്ഷ്​മി ശങ്കറിന്‍റെ മകന്‍ ഗ്രാമമുഖ്യന്‍ ബാബുലാലിന്​ അപേക്ഷ നല്‍കി. മരണ സര്‍ട്ടിഫിക്കറ്റ്​ നല്‍കുക മാത്രമല്ല അതില്‍ ആശംസ അറിയിക്കാനും ബാബുലാല്‍ തയാറായി.

ഈ സര്‍ട്ടിഫിക്കറ്റ്​ നിമിഷങ്ങള്‍ക്കകം സോഷ്യല്‍ മീഡിയയില്‍ വൈറലായി. തുടര്‍ന്ന്​ ഗ്രാമമുഖ്യന്‍ ക്ഷമ ചോദിച്ചതായും പുതിയ മരണ സര്‍ട്ടിഫിക്കറ്റ്​ നല്‍കിയതായുമാണ് റിപ്പോര്‍ട്ട്.