ലോക്ക് ഡൗൺ കഴിയുംവരെ കമ്മ്യൂണിറ്റി കിച്ചൺ തുടരും - ജോസ് കെ മാണി എം പി

പാലാ:  പാലാ നഗരസഭയിൽ ലോക് ഡൗൺ കഴിയുംവരെ കമ്മ്യൂണിറ്റി കിച്ചൺ തുടരുമെന്ന് ജോസ് കെ മാണി എം പി.  യൂത്ത് ഫ്രണ്ട് (എം) നിയോജക മണ്ഡലം കമ്മറ്റി നഗരസഭയുടെ കമ്മ്യൂണിറ്റി കിച്ചണിലേക്ക് നൽകിയ രണ്ടു ദിവസത്തെ പലവ്യഞ്ജനങ്ങൾ വിതരണം ചെയ്യുകയായിരുന്നു അദ്ദേഹം.

രാഷ്ട്രീയ പാർട്ടികളും സന്നദ്ധ സംഘടനകളും തദ്ദേശ സ്വയംഭരണ സ്ഥാപനങ്ങളിലെ കമ്മ്യൂണിറ്റി കിച്ചണുമായി സഹകരിക്കണമെന്നും ഇക്കാര്യത്തിൽ യൂത്ത് ഫ്രണ്ടിൻറെ പ്രവർത്തനം മാതൃകാപരമാണെന്നും അദ്ദേഹം പറഞ്ഞു.

മുനിസിപ്പൽ ചെയർപേഴ്സൺ മേരി ഡൊമിനിക് പലവ്യഞ്ജനങ്ങൾ ഏറ്റുവാങ്ങി. യൂത്ത് ഫ്രണ്ട് നിയോജക മണ്ഡലം പ്രസിഡൻറ് കുഞ്ഞുമോൻ മാടപ്പാട്ട് ചടങ്ങിൽ അധ്യക്ഷത വഹിച്ചു. 400 പേർക്ക് മൂന്നു നേരമാണ് ഭക്ഷണം നൽകുന്നത്.

അരി, റവ, സവാള, വെളിച്ചെണ്ണ, നാളികേരം, കറിപ്പൊടികൾ, മൈദ, പച്ചക്കറികൾ തുടങ്ങിയവയാണ് നൽകിയത്.

കേരള കോൺഗ്രസ് നിയോജക മണ്ഡലം പ്രസിഡൻറ് ഫിലിപ്പ് കുഴികുളം, യൂത്ത് ഫ്രണ്ട് ജില്ലാ പ്രസിഡൻറ് രാജേഷ് വാളിപ്ലാക്കൽ, മുനിസിപ്പൽ കൗൺസിലർമാരായ ബിജു പാലുപടവൻ, ബിജി ജോജോ, യൂത്ത് ഫ്രണ്ട് ഭാരവാഹികളായ സുനിൽ പയ്യപ്പള്ളി, സന്തോഷ് കമ്പകത്തിങ്കൽ , ഫെലിക്സ് വെളിയത്ത്, തോമസുകുട്ടി വരിക്കയിൽ, സിജോ പ്ലാത്തോട്ടം, ബിനു പുലിയുറുമ്പിൽ, ആന്റോ വെള്ളാപ്പാട്, ബിനീഷ് പാറാംതോട് തുടങ്ങിയവർ സന്നിഹിതരായിരുന്നു.