കേൾക്കാനും സംസാരിക്കാനും കഴിയാത്തവരുടെ 'ദൈവദൂതനാ'ണ് റവ.ഫാ. ബിജു ലോറൻസ് മൂലക്കര. സമർപ്പണത്തിന്റെ വേറിട്ട വഴിയിൽ മൗനം വാചാലമാക്കുന്ന വൈദിക ശ്രേഷ്ഠൻ

ഹോളിക്രോസ് സംന്യാസ സഭാംഗമായ ബിജു അച്ചൻ തിരുവനന്തപുരം സ്വദേശിയാണ്. ഇപ്പോൾ അയ്മനം നവധ്വനി ആശ്രമത്തിന്റെ ഡയറക്ടർ.

ബധിരരും മൂകരുമായവർക്ക് ചെവിയും നാവുമായ ബിജു അച്ചൻ രണ്ട് പതിറ്റാണ്ടു മുമ്പാണ് ഈ മേഖലയിലേക്ക് കടന്നു വന്നത്. പൂന പേപ്പൽ സെമിനാരിയിൽ വൈദിക വിദ്യാർത്ഥി ആയിരിക്കെ, കനേഡിയൻ വൈദികനായ ഹാരി സ്റ്റോക്സിനെ പരിചയപ്പെട്ടതാണ് വഴിത്തിരിവായത്.

ശ്രവണ വൈകല്യമുള്ളവരുടെ ഇടയിൽ മൂന്നു പതിറ്റാണ്ടായി പ്രവർത്തിച്ചു വന്ന ഫാ. ഹാരി, ബിജു അച്ചനെ തന്റെ ശിഷ്യനായി കൂടെക്കൂട്ടി.

ഹോളിക്രോസ് സഭാ നേതൃത്വവും കുടുംബാംഗങ്ങളും പിന്തുണ നൽകിയതോടെ ആറു മാസം കൊണ്ട് ഫാ. ബിജു " ആംഗ്യ ഭാഷ " പഠിച്ചെടുത്തു. പൗരോഹിത്യം സ്വീകരിച്ച ശേഷം ബാംഗ്ലൂരിൽ ഫാ. ബിജുവിന്റെ ആദ്യ കുർബ്ബാന പോലും ആംഗ്യ രൂപത്തിലായിരുന്നു. പലരും അത്ഭുതം കൂറി.

പിന്നീടിങ്ങോട്ട് ബധിരർക്കും മൂകർക്കുമായി ജീവിതം ഉഴിഞ്ഞൂവെച്ചൂ ഈ വൈദികൻ. ഇപ്പോൾ കേരളത്തിലും പുറത്തുമായി ഇരുപതോളം കേന്ദ്രങ്ങളിൽ ബധിരർക്കും, മൂകർക്കുമായി പ്രത്യേകം ക്ലാസ്സുകളും പ്രാർത്ഥനകളുമൊക്കെയായി മൗനം ബലിയാക്കുകയാണീ പുരോഹിതൻ.

"ഈശ്വരാ എന്നുള്ള അവരുടെ വിളി, ഹൃദയത്തിൽ നിന്നാണ് വരുന്നത്. അത്രമാത്രം ദൈവവുമായി അലിഞ്ഞു ചേരുകയാണീ കൂട്ടർ "- ചെവിയും നാവുമടക്കി മൗനങ്ങളെ പ്രാർത്ഥനാ വാചാലങ്ങളാക്കുന്ന റവ.ഫാ. ബിജു, അനുഭവസാക്ഷ്യങ്ങളുടെ നിശബ്ദതയിൽ നിന്ന് പുറത്തെടുത്ത ചുരുങ്ങിയ വാക്കുകളിൽ പറഞ്ഞു.

"വിശുദ്ധ അൽഫോൻസാമ്മയുടെ സന്നിധിയിൽ മൗനമായി വിശുദ്ധ കുർബ്ബാന അർപ്പിക്കാൻ ലഭിച്ച അവസരം മഹാഭാഗ്യം, അൽഫോൻസാമ്മയുടെ അനുഗ്രഹം "- ഫാ. ബിജു പറഞ്ഞു.