‘മണിയൻപിള്ള രാജുവിന്റെ മകൻ ബഹിരാകാശത്ത് റോക്കറ്റ് വിട്ടെന്ന് എഴുതുമോ?’ തന്റെ 'കസ്റ്റഡി' വാര്‍ത്തകളുടെ സത്യാവസ്ഥ വെളിപ്പെടുത്തി നിരഞ്ജ്

മണിയൻപിള്ള രാജുവിന്റെ മകൻ’ പൊലീസ് കസ്റ്റഡിയിൽ എന്ന തരത്തിൽ സമൂഹമാധ്യമങ്ങളിൽ പ്രചരിക്കുന്ന വാർത്തയില്‍ വിശദീകരണവുമായി നിരഞ്ജ് മണിയൻപിള്ള രാജു. 2018ൽ പൊലീസിൽ നിന്നും പെറ്റിയടിച്ചെന്ന് ഒരഭിമുഖത്തിൽ പറഞ്ഞ വാക്കുകളാണ് താൻ അറസ്റ്റിലായെന്ന തരത്തിൽ ചിലർ വളച്ചൊടിച്ചതെന്ന് നിരഞ്ജ് കുറിക്കുന്നു.

നിരഞ്ജിന്റെ വാക്കുകൾ

ഞാൻ പൊലീസ് കസ്റ്റഡയിൽ എന്നു പറഞ്ഞു കുറേ പേജുകളിൽ വാർത്ത വരുന്നുണ്ട്. 2018ൽ ഒരു പെറ്റി അടിച്ചതിനെപ്പറ്റി ഒരഭിമുഖത്തിൽ പറഞ്ഞതിനാണ് ഇങ്ങനെ. ഇനി ഭാവിയിൽ ഞാൻ കുട്ടിക്കാലത്ത് മരത്തിലേക്ക് കല്ലെറിഞ്ഞിട്ടുണ്ടെന്ന് പറഞ്ഞാൽ, മണിയൻപിള്ള രാജുവിന്റെ മകൻ ബഹിരാകാശത്തേക്ക് റോക്കറ്റ് വിട്ടെന്നു ഇവരൊക്കെ എഴുതുമോ?.

‘ബ്ലാക്ക് ബട്ടര്‍ഫ്‌ളൈ’ (2013) എന്ന ചിത്രത്തിലൂടെ സിനിമയിൽ അരങ്ങേറ്റം കുറിച്ച താരമാണ് നിരഞ്ജ്. ബോബി, ഡ്രാമ, സകല കലാശാല, സൂത്രക്കാരൻ തുടങ്ങിയ ചിത്രങ്ങളിൽ നിരഞ്ജ് അഭിനയിച്ചു. അടുത്തിടെ റിലീസിനെത്തിയ ‘ഒരു താത്വിക അവലോകനം’ എന്ന ചിത്രത്തിലും അഭിനയിച്ചു.