ദുർമന്ത്രവാദം തടയാൻ നിയമം; നടപടികൾ തുടങ്ങിയെന്ന് സർക്കാർ ഹൈക്കോടതിയിൽ

ദുർമന്ത്രവാദവും അന്ധവിശ്വാസവും തടയാൻ നിയമനിർമ്മാണം നടത്തുമെന്ന് സർക്കാർ ഹൈക്കോടതിയിൽ. ഇതിനാവശ്യമായ നടപടികൾ സ്വീകരിച്ചിട്ടുണ്ടെന്ന് സർക്കാർ കോടതിയിൽ അറിയിച്ചു. യുക്തിവാദി സംഘം നൽകിയ ഹർജി പരിഗണിക്കുകയായിരുന്നു ഹൈക്കോടതി. സർക്കാർ വാദം രേഖപ്പെടുത്തിയ കോടതി യുക്തിവാദി സംഘത്തിന്റെ ഹർജി തീർപ്പാക്കുകയും ചെയ്തു.

ഇലന്തൂർ നരബലിയുടെ പശ്ചാത്തലത്തിലാണ് മന്ത്രവാദവും ആഭിചാരവും തടയാൻ നിയമം വേണമെന്ന പൊതുതാത്പര്യ ഹർജിയുമായി യുക്തിവാദി സംഘം ഹൈക്കോടതിയെ സമീപിച്ചത്. നിയമ നിർമ്മാണം നടത്താൻ കേന്ദ്ര-സംസ്ഥാന സർക്കാരുകൾക്ക് നിർദ്ദേശം നൽകണമെന്നാണ് ഹർജിയിലെ ആവശ്യം.

മഹാരാഷ്ട്ര, കർണ്ണാടക തുടങ്ങിയ സംസ്ഥാങ്ങളിൽ ഇത്തരത്തിലുള്ള നിയമനിർമ്മാണം നടത്തിയിട്ടുണ്ടെന്ന് ഹർജിക്കാർ അറിയിച്ചു. കേരളത്തിൽ അന്ധവിശ്വാസവും ആഭിചാരക്രിയകളും നേരത്തെ നിലനിൽക്കുന്നുണ്ട്. സമാനമായ കൊലപാതകങ്ങൾ നിരവധി പുറത്തു വന്നിരുന്നു. ഈ സാഹചര്യത്തിൽ ഇത്തരം അനാചാരങ്ങൾ തടയാൻ നിയമനിർമ്മാണം വേണമെന്നും ഹർജിയിൽ ആവശ്യപ്പെട്ടു.