തന്നെ ബാറിൽ കൊണ്ടുപോയത് രാജസ്ഥാൻ സ്വദേശിനിയായ സുഹൃത്ത് ഡിംപിൾ ലാമ്പയാണെന്നു കൂട്ട ബലാൽസംഗത്തിന് ഇരയായ 19കാരി; അവിടെ വച്ച് കുടിക്കാൻ തന്ന ബിയറിൽ എന്തൊ പൊടി കലർത്തി, അവശയായ തന്നോട് യുവാക്കളുടെ കാറിൽ കയറാൻ പറഞ്ഞതും ഡിംപിൾ ലാമ്പയാണെന്ന് മൊഴി

കൊച്ചി: തന്നെ ബാറിൽ കൊണ്ടുപോയത് രാജസ്ഥാൻ സ്വദേശിനിയായ സുഹൃത്ത് ഡിംപിൾ ലാമ്പയാണെന്നു ഓടുന്ന വാഹനത്തിൽ കൂട്ട ബലാൽസംഗത്തിന് ഇരയായ കാസർകോട് സ്വദേശിനിയായ 19കാരി മോഡലിന്റെ മൊഴി. അവിടെ വച്ച് കുടിക്കാൻ തന്ന ബിയറിൽ എന്തൊ പൊടി കലർത്തിയതായി സംശയിക്കുന്നതായി യുവതി പറയുന്നു.

അവശയായ തന്നോട് യുവാക്കളുടെ കാറിൽ കയറാൻ പറഞ്ഞതും ഡിംപിൾ ലാമ്പയാണെന്നും യുവതി മൊഴി നൽകി. ഡിംപിൾ കാറിൽ കയാറാതെ ഒഴിഞ്ഞുമാറുകയും ചെയ്‌തു. നഗരത്തിൽ പലയിടങ്ങളിലായി കറങ്ങിയ കാറിൽ വച്ച് കൊടുങ്ങല്ലൂർ സ്വദേശികളായ നിതിൻ , വിവേക്, സുദീപ് എന്നിവർ തന്നെ ക്രൂരമായി ബലാൽസംഗം ചെയ്‌തു.

ഭയം കൊണ്ടാണ് പ്രതികരിക്കാതിരുന്നതെന്നും പ്രതികളെ കണ്ടാൽ തിരിച്ചറിയാൻ കഴിയുമെന്നും മോഡൽ മൊഴി നൽകി. പ്രതികളായ മൂന്ന് യുവാക്കളും രാജസ്ഥാൻ സ്വദേശിനിയുടെ സുഹൃത്തുക്കളാണെന്നും കാസർകോട് സ്വദേശിനിയെ ചതിയിൽപെടുത്തുകയായിരുന്നുവെന്നാണ് സൂചന.