കൊല്ലത്ത് കാട്ടുപോത്തിന്റെ കുത്തേറ്റ് മരിച്ചത് പ്രവാസി; ദുബായിയില്‍ നിന്ന് നാട്ടിലെത്തിയത് കഴിഞ്ഞദിവസം; കാട്ടുപോത്തിനെ ചത്ത നിലയിൽ കണ്ടെത്തി

കൊല്ലം: കൊല്ലത്ത് കാട്ടുപോത്തിന്റെ കുത്തേറ്റ് മരിച്ചത് പ്രവാസി. ആയൂർ പെരിങ്ങള്ളൂർ കൊടിഞ്ഞൽ കുന്നുവിള വീട്ടിൽ സാമുവൽ വർഗീസ് (64) ആണ് മരിച്ചത്. കഴിഞ്ഞ ദിവസമാണ് സാമുവൽ ദുബായിൽനിന്നു നാട്ടിലെത്തിയത്. ഇന്നു രാവിലെ വീടിനോടു ചേർന്ന റബർ തോട്ടത്തിൽ നിൽക്കുമ്പോൾ സാമുവലിനെ കാട്ടുപോത്ത് പിന്നിൽനിന്ന് ആക്രമിക്കുകയായിരുന്നു.

ഗുരുതരമായി പരുക്കേറ്റ സാമുവലിനെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വനമേഖലയല്ലാത്ത ആ പ്രദേശത്ത് കാട്ടുപോത്ത് വന്നത് എങ്ങനെയെന്നു തിട്ടമില്ല. കാട്ടുപോത്തിനെ പിന്നീട് ചത്ത നിലയിൽ കണ്ടെത്തി. കാട്ടു പോത്തിന്റെ ജഡം പോസ്റ്റ് മാർട്ടം ചെയ്ത് സംസ്ക്കരിച്ചു.