കോട്ടയം: കള്ളനെ പിടിക്കാന് സ്ഥാപിച്ച സിസി ക്യാമറയും അടിച്ചുമാറ്റി കള്ളന് കടന്നു. കോട്ടയം പൊത്തന്പുറം സെന്റ് ഇഗ്നാത്തിയോസ് യാക്കോബായ പള്ളിയോട് അനുബന്ധിച്ചുള്ള ബ്ലോസം വാലി സ്കൂള് ഓഫ് എയ്ഞ്ചല്സിലാണു കഴിഞ്ഞ ദിവസം രാത്രി എട്ടു മണിയോടെ കള്ളന് മോഷണം നടത്തിയത്.
ഓഗസ്റ്റില് സ്കൂളില് മോഷണ ശ്രമമുണ്ടായതിനെ തുടര്ന്നാണു നിരീക്ഷണത്തിനായി ക്യാമറ സ്ഥാപിച്ചത്. നാലു ക്യാമറകളാണു സ്ഥാപിച്ചിരുന്നത്. മോഷണത്തിനെത്തിയ കള്ളന് ഇതില് ഒന്നുമായി കടക്കുകയായിരുന്നു. ക്യാമറകളില് രണ്ടെണ്ണം മുകളിലേക്കു തിരിച്ചു വയ്ക്കുകയും ചെയ്തിട്ടുണ്ട്.
മുഖംമൂടി ധരിച്ചെത്തിയ ചെറുപ്പക്കാരനായ യുവാവിന്റെ ദൃശ്യം പുറത്തെ ക്യാമറയില് പതിഞ്ഞിട്ടുണ്ട്. ഇതു സഹിതമാണു പോലീസില് പരാതി നല്കിയത്. പഴയ മോഷണ കേസില് അന്വേഷണം നടന്നു വരുന്നതിനിടെയാണു വീണ്ടും മോഷണം നടന്നത്.