തിരുവനന്തപുരം: ജെഎന്യുവിലെ വിദ്യാര്ഥികളെ മോദിയുടെ പോലീസ് വേട്ടയാടുന്ന അതേ പാതയിലാണു കേരളത്തില് പിണറായി വിജയന്റെ പോലീസ് വിദ്യാര്ഥികളോടും ജനപ്രതിനിധികളോടും പെരുമാറുന്നതെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രന്.
പോലീസ് മര്ദനത്തില് പരിക്കേറ്റ് തിരുവനന്തപുരം മെഡിക്കല് കോളജ് ആശുപത്രിയില് ചികിത്സയില് കഴിയുന്ന കെഎസ് യു പ്രവര്ത്തകരേയും ഷാഫി പറമ്പില് എംഎല്എയും സന്ദര്ശിച്ച ശേഷം മാധ്യമപ്രവര്ത്തകരോട് പ്രതികരിക്കുകയായിരുന്നു അദ്ദേഹം.
പോലീസ് രാജാണ് സംസ്ഥാനത്ത്. ഇതിന്റെ പേരാണ് ഫാസിസം. മോദിയുടെ പിന്ഗാമിയായി പിണറായി വിജയന് മാറി. ശക്തമായ പ്രതിഷേധം കോണ്ഗ്രസിന്റെ നേതൃത്വത്തില് ഉണ്ടാകുമെന്നും മുല്ലപ്പള്ളി പറഞ്ഞു.
സമാധനപരമായി സമരം ചെയ്ത കെഎസ് യു വിദ്യാര്ഥികളേയും ഷാഫി പറമ്പില് എംഎല്എയേയും മൃഗീയമായി തല്ലിച്ചതച്ച നടപടി ഒരിക്കലും അംഗീകരിക്കാനാവില്ല. ജനകീയ സമരങ്ങള്ക്ക് നേതൃത്വം നല്കിയാണ് അധികാരത്തിലെത്തിയതെന്ന് പറയുന്ന മുഖ്യമന്ത്രി സമരക്കാരോട് അദ്ദേഹത്തിന്റെ പോലീസ് എന്തിനാണ് ഈ ക്രൂരത കാട്ടിയതെന്ന് വിശദീകരിക്കണമെന്ന് മുല്ലപ്പള്ളി പറഞ്ഞു.