ബിരുദതല മെഡിക്കൽ പ്രവേശനത്തിനുള്ള നീറ്റ് - യു. ജി. പരീക്ഷ ജൂലായ് 17 ന്; മെയ് 6 വരെ അപേക്ഷിക്കാം

തിരുവനന്തപുരം: ബിരുദതല മെഡിക്കൽ പ്രവേശനത്തിനുള്ള രാജ്യത്തെ ഏക പ്രവേശന പരീക്ഷയായ നാഷണൽ എലിജിബിലിറ്റി കം എൻട്രൻസ് ടെസ്റ്റ് - അണ്ടർ ഗ്രാജുവേറ്റ് 2022ന്, നാഷണൽ ടെസ്റ്റിങ് ഏജൻസി (എൻ. ടി. എ.) അപേക്ഷ ക്ഷണിച്ചു.

മെയ് ആറുവരെ അപേക്ഷിക്കാം. പരീക്ഷ ജൂലായ് 17 ന് (ഞായർ) ഉച്ചയ്ക്ക് രണ്ട് മണി മുതൽ വൈകിട്ട് 5.20 വരെ രാജ്യത്തിന്‍റെ വിവിധ ഭാഗങ്ങളില്‍ നടത്തും.

എം.ബി.ബി.എസ്., ബി.ഡി.എസ്., ബി.എ.എം.എസ്., ബി.യു.എം.എസ്., ബി.എസ്.എം.എസ്, ബി.എച്ച്.എം.എസ്. കോഴ്സുകളിലേയ്ക്കുള്ള പ്രവേശനമാണ് പ്രധാനമായും നീറ്റ് - യു. ജിയുടെ പരിധിയിൽ വരുന്നത്. ബി.വി.എസ്.സി. & എ.എച്ച്. (വെറ്ററിനറി), ബി. എസ്‌സി. (ഓണേഴ്സ്) നഴ്സിങ് പ്രവേശനത്തിനും നീറ്റ് - യു. ജി. സ്കോർ ഉപയോഗിച്ചു വരുന്നു.

കേരളത്തിൽ മെഡിക്കൽ, മെഡിക്കൽ അലൈഡ് കോഴ്സുകളിലെ പ്രവേശനത്തിന് നീറ്റ് - യു. ജി. ബാധകമാക്കിയിട്ടുണ്ട്.

അപേക്ഷ മേയ് 6 രാത്രി 11.50 വരെ https://neet.nta.nic.in വഴി ഓൺലൈനായി നൽകാം. കേരളത്തിലെ പ്രവേശന പരീക്ഷാ കമ്മിഷണർ വഴിയുള്ള മെഡിക്കൽ & മെഡിക്കൽ അലൈഡ് പ്രവേശനത്തിൽ താത്പര്യമുള്ളവർക്ക് കേരള പ്രവേശന പരീക്ഷാ കമ്മിഷണർക്ക് ഏപ്രിൽ 30 വൈകീട്ട് 5 മണിക്കകം www.cee.kerala.gov.in വഴി അപേക്ഷ നൽകണം. അതോടൊപ്പം നീറ്റ് - യു.ജിയ്ക്ക് മേയ് ആറിനകം അപേക്ഷിക്കുകയും വേണം.