എന്തുകൊണ്ടാണ് ക്രിസ്ത്യാനികൾ സുന്നത്ത് അഥവാ അഗ്രചർമ്മ പരിച്ഛേദനം ഉപേക്ഷിച്ചത് ? എന്തുകൊണ്ടാണ് പരിച്ഛേദനം എന്ന ആചാരം യഹൂദരുടെ ഇടയിൽ നിലനിന്നത്... (ലേഖനം)

യേശുക്രിസ്തു ജനിച്ചതിന്റെ എട്ടാം ദിവസം അഗ്രചർമ്മ പരിച്ഛേദനം ചെയ്യപ്പെട്ടു. എന്നാൽ അദ്ദേഹത്താൽ സ്ഥാപിതമായ ക്രിസ്തീയ സമൂഹം ഈ ആചാരം അപ്പാടെ ഉപേക്ഷിച്ചു... എന്തുകൊണ്ട് ?

ആ ചരിത്രത്തിലേക്ക്...

പഴയ പല ആചാരങ്ങളും പാരമ്പര്യങ്ങളും ഇപ്പോഴും ജൂതന്മാരും ക്രിസ്ത്യാനികളും പങ്കിടുന്നുണ്ട്. അതിൽ ഏറ്റവും വലിയ ഉദാഹരണമാണ് പ്രധാന ദിവസങ്ങളിലെ കൂട്ട ആരാധന. എന്നാൽ യഹൂദരെപ്പോലെ എന്തു കൊണ്ടാണ് ക്രിസ്ത്യാനികൾ തങ്ങളുടെ നവജാത ശിശുക്കളെ അഗ്രചർമ്മ പരിച്ഛേദനം അഥവാ സുന്നത്ത് ചെയ്യാത്തത് ? ഇതിനുള്ള ഉത്തരം ബൈബിളിൽ തന്നെ കാണാവുന്നതാണ്.

ബൈബിളിലെ 'പുതിയ നിയമം' അനുസരിച്ച്, യഹൂദമതത്തിനു വ്യത്യസ്തമായി ക്രിസ്തുമതത്തിൽ പരിച്ഛേദനയെക്കുറിച്ചുള്ള വിരുദ്ധ വീക്ഷണം ദൃശ്യമാണ്. മോശെയുടെ നിർദ്ദേശ പ്രകാരമുള്ള അഗ്രചർമ്മ പരിച്ഛേദനം അവസാനിപ്പിച്ചത് ക്രിസ്തുവാണ്.

എഡി 50 ൽ ഈ വിഷയത്തിൽ വിശുദ്ധ പൗലോസും വിശുദ്ധ പത്രോസും തമ്മിൽ കടുത്ത സംവാദം നടന്നതായും, ഇതായിരുന്നു സഭയുടെ ആദ്യ സ്ഥാപന വിവാദമെന്നുമാണ് ഉറുഗ്വേയിലെ കാത്തലിക് യൂണി വേഴ്‌സിറ്റിയുടെ മതതത്ത്വശാസ്ത്ര പ്രൊഫസർ മാഗിയേൽ പാസ്റ്റോറിനോ പറഞ്ഞത്.

വിശുദ്ധ പൗലോസിന് അന്നുവരെ സെന്റ് എന്ന വിശുദ്ധ പദവി ലഭിച്ചിരുന്നില്ല, അദ്ദേഹം അറിയപ്പെട്ടിരുന്നത് പോൾ ഓഫ് ടാർസസ് എന്ന പേരിലായിരുന്നു. പൗലോസ് തുടക്കത്തിൽ ഒരു ഫരിസേയനായിരുന്നു, അതായത് മോശെയുടെ (മോസസ്) ശരിയത്തിന്റെ (നിയമം) നിയമജ്ഞനായിരുന്നു. അന്ന് ക്രിസ്തുവിന്റെ അനുയായികളെ പലതരത്തിൽ അക്കൂട്ടർ ഉപദ്രവിക്കുമായിരുന്നു.

എന്നാൽ പിന്നീട് ബൈബിൾ അനുസരിച്ച്, പൗലോസിന് മാറ്റമുണ്ടാകുകയും ക്രിസ്തുദേവൻ്റെ സന്ദേശം ലോകമെമ്പാടും പ്രചരിപ്പിക്കുകയും ചെയ്തുപോന്നു.

അന്നുവരെ, യഹൂദമതം ലോകത്ത് ഏകദൈവത്തെ ആരാധിക്കുന്ന ഒരേയൊരു മതമായിരുന്നു, ഗ്രീക്കുകാരും റോമാക്കാരും ഈജിപ്തുകാരും അക്കാലത്ത് പല ദൈവങ്ങളിൽ വിശ്വസിച്ചിരുന്നു.

യഹൂദ മതവിശ്വാസപ്രകാരം ദൈവം അബ്രഹാമിനോട് (ഇബ്രഹിമിനോട്) പറഞ്ഞു, "നിങ്ങളിൽ എല്ലാ പുരുഷന്മാരും പരിച്ഛേദന ചെയ്യപ്പെടണമെന്ന ഞാനും നിങ്ങളും നിങ്ങളുടെ സന്തതികളും തമ്മിലുള്ള ഉടമ്പടി നിങ്ങൾ അനുസരിക്കണം." എന്നതാണ്. അത് അണുകിട തെറ്റാതെ അവർ ഇന്നും പാലിച്ചുപോരുന്നു.

ജനനേന്ദ്രിയത്തിൽ നിന്ന് അഗ്രചർമ്മം നീക്കം ചെയ്യുന്ന ആചാരത്തെ സുന്നത്ത് അഥവാ പരിച്ഛേദനം എന്ന് വിളിക്കുന്നു, അത് ഭൂമിയിൽ മതങ്ങൾക്ക് മുമ്പുതന്നെ ആരംഭിച്ചു.

ലോകത്തിലെ ഏറ്റവും പഴക്കമുള്ള ശസ്ത്രക്രിയയാണിത്. ഇതിനെക്കുറിച്ച് വിശദമായ തെളിവുകളൊന്നും ലഭ്യമല്ലെങ്കിലും, പീഡിയാട്രിക് (ശിശു) ശസ്ത്രക്രിയാ വിദഗ്ദ്ധൻ അഹമ്മദ് അൽ സലിമിന്റെ 'ആൻ ഇല്ല സ്ട്രേറ്റഡ് ഗൈഡ് ടു പീഡിയാട്രിക് യൂറോളജി' എന്ന പുസ്തകമനുസരിച്ച്, ഇത് 15,000 വർഷങ്ങൾക്ക് മുമ്പ് ഈജിപ്തിൽ ആരംഭിച്ചതായി കരുതപ്പെടുന്നു.

ശുചീകരണം മുതൽ പ്രായപൂർത്തിയാകുന്നതുവരെയുള്ള വിവിധ കാരണങ്ങളാൽ എത്ര സമൂഹങ്ങൾ പരിച്ഛേദനം തുടർന്നുവെന്ന് അൽ സലിം വിശദീകരിക്കുന്നു. ഇതിന്റെ ഉദ്ദേശ്യം ദൈവത്തെ പ്രീതിപ്പെടുത്തുക അല്ലെങ്കിൽ അവരുടെ സാംസ്കാരിക സ്വത്വം പ്രകടിപ്പിക്കുക എന്നതായിരുന്നു.

ശുചിത്വത്തിന്റെ ചില മാർഗ്ഗങ്ങളിൽ അവർക്ക് നിയമനിർമ്മാണം നടത്തേണ്ടി വന്നപ്പോൾ, മതം അതിനും ഉപയോഗിച്ചു, കാരണം നിയമം ദൈവത്തിന്റെ നിയമമാണ്, മറ്റൊരു നിയമവുമില്ല" എന്നതായിരുന്നു അടിസ്ഥാനം.

യഹൂദമതം ഈ ആശയം നിരാകരിക്കുന്നില്ല, പക്ഷേ ചില വ്യത്യാസങ്ങളോടെ അത് ഇന്നും നിലനിൽക്കുന്നു.

ജൂത റബ്ബി ഡാനിയൽ ഡോലെൻസ്‌കി യുടെ അഭിപ്രായത്തിൽ, "മതപരമായ വീക്ഷണത്തിനപ്പുറം വൃത്തിയുടെ കാര്യത്തിൽ ഉള്ള അതിന്റെ പങ്ക് കൊണ്ടാണ് ഇത് സ്വീകാര്യമായതെന്ന് പറയുന്ന ചിലരുണ്ട്, എന്നാൽ ഇത് മതപരമായ കാരണത്താലാണോ അല്ലെങ്കിൽ ശുചിത്വത്തിനു വേണ്ടി മാത്രമാണോ ആരംഭിച്ചതെന്ന് നമുക്കറിയില്ലെങ്കിലും, പരിച്ഛേദനയും ആരോഗ്യവും ശുചിത്വവും തമ്മിൽ അനിഷേധ്യമായ ബന്ധമുണ്ടത്രേ.

പുരാതന കാലത്ത്, സുമേറിയൻ, സെമിറ്റിക് സമൂഹങ്ങളിൽ പരിച്ഛേദനം നടന്നിരുന്നു, എന്നാൽ 2007 ലെ ഐക്യരാഷ്ട്രസഭയുടെ എയ്ഡ്സ് പ്രോഗ്രാമിന്റെ റിപ്പോർട്ട് അനുസരിച്ച്, ഈ സംസ്കാരങ്ങളിൽ നിന്ന് വളരെ അകലെയുള്ള മായ, ആസ്റ്റിക് സമൂഹങ്ങളിലും ഇത് നടപ്പിലാക്കിയിരുന്നതായി തെളിഞ്ഞിട്ടുണ്ട്.

എന്നാൽ വ്യാപകമായ തോതിൽ പ്രചരിച്ചിട്ടും ഈ ആചാരം എല്ലാവർക്കും സ്വീകാര്യമായിരുന്നില്ല എന്നതാണ് ശ്രദ്ധേയം.

പ്രാചീന ഗ്രീസിൽ വ്യായാമത്തിന് വലിയ പ്രാധാന്യമുണ്ടായിരുന്നു, പുരുഷ നഗ്നതയ്ക്ക് മുൻഗണന നൽകിയിരുന്ന ആ സമൂഹത്തിൽ, ജനനേന്ദ്രിയ ചർമ്മം സൗന്ദര്യത്തിന്റെ പ്രതീകമായി കണക്കാക്കപ്പെട്ടിരുന്നു, അതുകൊണ്ടുതന്നെ പരിച്ഛേദനം അവർ അംഗീകരിച്ചിരുന്നില്ല.

അമേരിക്കൻ അസോസിയേഷൻ ഫോർ ദി ഹിസ്റ്ററി ഓഫ് മെഡിസിൻ, ജോൺ ഹോപ്കിൻസ് ഇൻസ്റ്റിറ്റ്യൂട്ട് ഫോർ ദ ഹിസ്റ്ററി ഓഫ് മെഡിസിൻ എന്നിവയുടെ ജേർണലായ ബുള്ളറ്റിൻ ഓഫ് ദി ഹിസ്റ്ററി ഓഫ് മെഡിസിനിന്റെ 2001 ലെ ലേഖനത്തിൽ, ഫ്രെഡറിക് എം. ഹോഡ്ജസ് എഴുതി, "നീണ്ടതും ക്രമേണ ചുരുങ്ങുന്നതുമായ ചർമ്മത്തിന് മുൻഗണന നൽകുന്നത് സാംസ്കാരിക സ്വത്വം, ധാർമ്മികത, സ്വീകാര്യമായ മനോഭാവങ്ങൾ, സദ്‌ഗുണം, സൗന്ദര്യം, ആരോഗ്യം എന്നിവയുടെ പിന്തുടരലിന്റെ പ്രതീകമായാണ് എന്ന് വെളിപ്പെടുത്തിയിരുന്നു.

കാനഡയിലെ മക്മാസ്റ്റർ ഡിവിനിറ്റി കോളേജിലെ ന്യൂ ടെസ്‌റ്റമെന്റ് പ്രൊഫസറായ സിന്തിയ ലോംഗ് വെസ്റ്റ്ഫാൾ തന്റെ 'പോൾ ആൻഡ് ജെൻഡർ' എന്ന പുസ്തകത്തിൽ ഇങ്ങനെ എഴുതുന്നു, "യഹൂദന്മാർ നിലവിലുള്ള സംസ്കാരവുമായി പൊരുത്തപ്പെടാൻ ആഗ്രഹിച്ചതിനാൽ ഹെല്ലനിസ്റ്റിക് കാലഘട്ടത്തിൽ പരിച്ഛേദന സമ്പ്രദായം യഹൂദർക്ക് ഒരു പ്രശ്നമായി മാറി." പരിച്ഛേദനം നിയമവിരുദ്ധമായ ഒരു കാലമുണ്ടായിരുന്നു.

യഹൂദന്മാർ തങ്ങളുടെ മതം പ്രചരിപ്പിച്ചുകൊണ്ട് മറ്റുള്ളവരെ യഹൂദന്മാരാക്കിയില്ല, എന്നാൽ യേശുക്രിസ്തു തന്റെ സുവിശേഷങ്ങൾ കഴിയുന്നത്ര പ്രചരിപ്പിക്കാൻ അനുയായികളോട് ആവശ്യപ്പെട്ടിരുന്നു. പൗലോസ് യേശുക്രിസ്തുവിന് ശേഷമുള്ള സുവിശേഷകരുടെ ആദ്യ വിഭാഗത്തിൽ ഒരാളായിരുന്നു.യഹൂദരല്ലാത്ത ആളുകളിലേക്ക് അദ്ദേഹം യേശുക്രിസ്തുവിന്റെ സന്ദേശം പ്രചരിപ്പിച്ചു.

അന്ന് യഹൂദരല്ലാത്ത ആളുകൾ പരിച്ഛേദനം ചെയ്യുന്നത് ലൈംഗികാവയവങ്ങളെ തകർക്കുന്നതിന് തുല്യമാണെന്ന് കരുതിയിരുന്നതായി പ്രൊഫസർ സിന്തിയ ലോംഗ് വെസ്റ്റ്ഫാൾ പ്രസ്താവിക്കുന്നു. "അതിനാൽ ഗ്രീക്കോ-റോമൻ ലോകത്ത് പരിച്ഛേദനകൾക്ക് വിലക്കുകൾ ഉണ്ടായിരുന്നു.

തന്റെ പ്രചാരണങ്ങളിൽ , പരിച്ഛേദന ചെയ്യരുതെന്ന് പൗലോസ് ആളുകളോട് ശക്തമായി പറഞ്ഞിരുന്നു, മറിച്ച് രക്ഷിക്കപ്പെടാൻ വിശ്വാസം മാത്രമേ ആവശ്യമുള്ളൂ എന്നാണ് അദ്ദേഹം പറഞ്ഞത്. ആരെങ്കിലും പരിച്ഛേദനം ചെയ്തിട്ടുണ്ടോ? അവൻ അത് മറച്ചുവെക്കരുത്" എന്ന് അദ്ദേഹം കൊരിന്ത്യർക്ക് എഴുതിയ ആദ്യ ലേഖനത്തിൽ എഴുതി.

പൗലോസ് ഗലാത്യർക്കുള്ള തന്റെ കത്തിൽ പരിച്ഛേദന കൽപ്പിച്ച മോശയുടെ നിയമത്തെ പരാമർശിച്ചുകൊണ്ട് പറഞ്ഞു, "യേശു നമ്മെ ആ നിയമത്തിന്റെ പിടിയിൽ നിന്ന് പൂർണ്ണമായും മോചിപ്പിച്ചിരിക്കുന്നു."

എന്നാൽ ചില അനുയായികൾ അദ്ദേഹത്തിന്റെ അഭിപ്രായം അംഗീകരിച്ചില്ല. അവരെപ്പറ്റി ബൈബിളിൽ പ്രതിപാദിക്കുന്ന പൗലോസ് എഴുതിയ കത്തുപ്രകാരം, "അനേകം വിമതരും നീചന്മാരും രാജ്യദ്രോഹികളും ഉണ്ട്, പ്രത്യേകിച്ച് പരിച്ഛേദനയ്ക്കായി വാദിക്കുന്നവർ. നിങ്ങൾ അവരെ നിശബ്ദരാക്കണം", എന്നാണ്.

ക്രിസ്ത്യൻ സഭ മൊസൈക് (മോശെയുടെ) നിയമ നിയന്ത്രണങ്ങൾ എടുത്തുകളഞ്ഞിട്ടും, ഇന്നും ആഫ്രിക്കയിൽ പരിച്ഛേദനം ഒരു ആചാരമായ പ്രദേശങ്ങളുണ്ട്. ഈജിപ്തിലെ ഖിബാത്തി ക്രിസ്ത്യാനികൾ, എത്യോപ്യയിലെ ഓർത്തഡോക്സ് ക്രിസ്ത്യാനികൾ, കെനിയയിലെ നോമിയ ചർച്ച് എന്നിവ ഇതിന് ഉദാഹരണങ്ങളാണ്.

മതപരമായ കാരണങ്ങൾ കൂടാതെ, ക്രിസ്ത്യൻ വിഭാഗങ്ങളിലെ ഭൂരിഭാഗം ആൺകുട്ടികളും അഗ്രചർമ്മ പരിച്ഛേദനം ചെയ്യുന്ന അഞ്ച് രാജ്യങ്ങളുണ്ട്.

അതിലൊന്നാണ് അമേരിക്ക. 1870-ൽ അമേരിക്കൻ മെഡിക്കൽ അസോസിയേഷന്റെ സ്ഥാപക അംഗമായ ഡോ. ലൂയിസ് സോയർ ചില രോഗങ്ങളെ തടയുന്നതിനോ ചികിത്സിക്കുന്നതിനോ വേണ്ടി പരിച്ഛേദനം പ്രോത്സാഹിപ്പിച്ചിരുന്നു. അമേരിക്കയിൽ നിന്ന് ഈ പാരമ്പര്യം കാനഡയിലും ബ്രിട്ടനിലും എത്തി, അതിനു ശേഷം ഇത് ന്യൂസിലാൻഡിലേക്കും ഓസ്‌ട്രേലിയയിലേക്കും വ്യാപിച്ചു.

ആനുകൂലവും ദോഷവുമായ ഘടകങ്ങളെ സംബന്ധിച്ച ശാസ്ത്രീയ അഭിപ്രായ ഭിന്നതകൾ കാരണം നവജാതശിശുക്കളുടെ പരിച്ഛേദനം പല രാജ്യങ്ങളിലും നിർത്തിവച്ചു. എന്നാൽ അമേരിക്കയിൽ ഭൂരിഭാഗം പുരുഷന്മാരും ഇപ്പോഴും പരിച്ഛേദന ചെയ്യുന്നുണ്ട്.

(ബിബിസി ലേഖകൻ 'ഫിലിപ്പെ യാംബയാസ്' എഴുതിയ ലേഖനത്തെ ആധാരമാക്കിയാണ് ഈ പോസ്റ്റ് എഴുതിയിട്ടുള്ളത്)

-പ്രകാശ് നായര്‍ മേലില