കര്‍ണാടക തിരഞ്ഞെടുപ്പ് റാലികളില്‍ ഹിന്ദു ദൈവങ്ങളുടെ പേരുകള്‍ പറയുന്നതില്‍ നിന്ന് മോദിയെ തടയണം: ചീഫ് ഇലക്ടറല്‍ ഓഫീസര്‍ക്ക് പരാതി നല്‍കി കോണ്‍ഗ്രസ്

ബംഗളൂരു: കര്‍ണാടകയിലെ തിരഞ്ഞെടുപ്പ് റാലികളില്‍ പ്രധാനമന്ത്രി നരേന്ദ്ര മോദി ഹനുമാന്റെ പേര് ഉപയോഗിക്കുന്നതിന് കോണ്‍ഗ്രസ് ചീഫ് ഇലക്ടറല്‍ ഓഫീസര്‍ക്ക് പരാതി നല്‍കി. പ്രധാനമന്ത്രി മോദി മെയ് 2 മുതല്‍ തന്റെ തിരഞ്ഞെടുപ്പ് റാലിയില്‍ വലതുപക്ഷ സംഘടനയായ ബജ്റംഗ്ദളിനെ നിരോധിക്കുമെന്ന് വാഗ്ദാനം ചെയ്തതിന് കോണ്‍ഗ്രസിനെ വിമര്‍ശിക്കുകയും നിരോധനം ഹനുമാനെ പൂട്ടുന്നതിന് തുല്യമാണെന്ന് പറയുകയും ചെയ്തു. ബുധനാഴ്ച കര്‍ണാടകയില്‍ നടന്ന മൂന്ന് പ്രസംഗങ്ങളിലും പ്രധാനമന്ത്രി മോദി 'ജയ് ബജ്രംഗ്ബലി' എന്ന് വിളിച്ചിരുന്നു.

തിരഞ്ഞെടുപ്പ് റാലികളില്‍ ഹിന്ദു ദൈവങ്ങളുടെ പേരുകള്‍ പറയുന്നതില്‍ നിന്ന് പ്രധാനമന്ത്രി മോദിയെ തടയണമെന്ന് കോണ്‍ഗ്രസ് തിരഞ്ഞെടുപ്പ് കമ്മീഷനോട് ആവശ്യപ്പെട്ടു. കുറച്ച് വര്‍ഷങ്ങള്‍ക്ക് മുമ്പ് അന്നത്തെ ബി.ജെ.പി മുഖ്യമന്ത്രി അന്തരിച്ച മനോഹര്‍ പരീക്കര്‍ ശ്രീരാമസേനയെ നിരോധിച്ചത് ശ്രീരാമനെ അപമാനിക്കുന്നതിന് തുല്യമാണോ എന്നും ശിവസേനയെ ബി.ജെ.പി വഞ്ചിച്ചത് ശിവനോടുള്ള അവഹേളനമായി കണക്കാക്കണോ എന്നും കോണ്‍ഗ്രസ് പരാതിയില്‍ ഉന്നയിച്ചു.

'പൊതു റാലികളിലെ പ്രസംഗത്തില്‍ പ്രധാനമന്ത്രി കോണ്‍ഗ്രസ് പാര്‍ട്ടിയെ വിമര്‍ശിച്ച് സംസാരിച്ചു, വോട്ട് അഭ്യര്‍ത്ഥിക്കുക എന്ന ഉദ്ദേശത്തോടെ മാത്രം ഹനുമാന്റെ പേര് എടുത്ത് കോണ്‍ഗ്രസ് പാര്‍ട്ടിയെ ഹിന്ദു വിരുദ്ധരായി ചിത്രീകരിക്കാന്‍ ശ്രമിക്കുകയും ചെയ്തു. ബിജെപിയും കോണ്‍ഗ്രസിന് വോട്ട് ചെയ്യരുതെന്ന് ജനങ്ങളോട് അഭ്യര്‍ത്ഥിക്കുന്നു,'' പാര്‍ട്ടി പരാതിയില്‍ പറയുന്നു.

മതത്തിന്റെ പേരില്‍ വോട്ട് അഭ്യര്‍ത്ഥിക്കാന്‍ വേണ്ടി മാത്രം തിരഞ്ഞെടുപ്പ് റാലികളിലും പ്രസംഗങ്ങളിലും ഹിന്ദു ദൈവങ്ങളുടെയും ദേവതകളുടെയും പേരുകള്‍ ഉപയോഗിക്കരുതെന്ന് പ്രധാനമന്ത്രിയോട് കമ്മീഷന്‍ നിര്‍ദേശിക്കണം- കോണ്‍ഗ്രസ് കമ്മീഷനോട് അഭ്യര്‍ത്ഥിച്ചു.