നൃത്തവസന്തം തീർത്ത് പെരുമ്പാവൂർ നാട്യകൈരളിയുടെ വാർഷികോത്സവം അരങ്ങേറി

പെരുമ്പാവൂർ നാട്യകൈരളി സ്കൂൾ ഓഫ് ക്ലാസിക്കൽ ഡാൻസ്, വാർഷികോത്സവത്തിന് ഡയറക്ടർ ശാലിനി പ്രദീപ് തിരിതെളിയിക്കുന്നു

പെരുമ്പാവൂർ:സര്‍ഗ്ഗാത്മകതയുടെയും ആവിഷ്ക്കാരത്തിന്റെയും വിഭിന്ന ഭാവങ്ങളെ സമന്വയിപ്പിച്ചുകൊണ്ട്‌ പെരുമ്പാവൂർ നാട്യകൈരളി സ്കൂൾ ഓഫ് ക്ലാസിക്കൽ ഡാൻസ്, ഫൈൻ ആർട്ട്സ് സൊസൈറ്റി ഓഡിറ്റോറിയത്തിൽ സംഘടിപ്പിച്ച വാർഷികോത്സവം നൃത്തരംഗത്തെ യുവനര്‍ത്തകിമാരുടെ സാന്നിധ്യം കൊണ്ട് ശ്രദ്ധേയമായി.

പതിനാലു വർഷമായി പെരുമ്പാവൂർ ഔഷധി ജംഗ്ഷനിൽ പ്രവർത്തിയ്ക്കുന്ന നാട്യകൈരളിയുടെ ഡയറക്ടർ ആർ.എൽ.വി. ശാലിനി പ്രദീപ് ആണ്. നർത്തകിയും കഥകളി അഭിനേത്രിയുമായ ശാലിനി, ഭരതനാട്യത്തിലും മോഹിനിയാട്ടത്തിലും ബിരുദാനന്തര ബിരുദധാരിണിയാണ്.

ശാസ്ത്രീയ നൃത്തത്തില്‍ തത്പരരായ യുവപ്രതിഭകള്‍ക്കു കഴിവു തെളിയിക്കുന്നതിനുള്ള വേദിയൊരുക്കുക എന്നതാണ്‌ നാട്യകൈരളി എല്ലാ വർഷവും നടത്തുന്ന നൃത്തോത്സവം കൊണ്ട് ഉദ്ദേശിക്കുന്നത് എന്ന് ഉദ്ഘാടന സമ്മേളനത്തിൽ ഭദ്രദീപം തെളിയിച്ചശേഷം ശാലിനി പറഞ്ഞു.

ഗായകരായ ജയൻ പെരുമ്പാവൂർ, അജയ് കൃഷ്ണ, വയലിനിസ്റ്റ് ബാബുരാജ് പെരുമ്പാവൂർ, മൃദംഗിസ്റ്റ് സുനിൽ എസ്. പണിക്കർ, ഫ്ലൂട്ടിസ്റ്റ് വിനോദ് ചന്ദ്ര, സാംസ്കാരിക പ്രവർത്തകനും അവതാരകനുമായ കൂവപ്പടി ജി. ഹരികുമാർ, കീർത്തി വിനയകുമാർ, പ്രദീപ് ആർ. അമ്പകപ്പിള്ളി തുടങ്ങിയവർ പങ്കെടുത്തു.

8 വിദ്യാർത്ഥിനികളുടെ അരങ്ങേറ്റവും സീനിയർ വിദ്യാർത്ഥിനികളുടെ നൃത്തപരിപാടികളും ഫ്യൂഷൻ ഡാൻസുകളും കൊണ്ട് സമ്പന്നമായിരുന്നു നൃത്തവേദി.