ചൈനയോട് റഷ്യ ആയുധങ്ങള്‍ ആവശ്യപ്പെട്ടെന്ന് റിപ്പോര്‍ട്ട്; സഹായിച്ചാല്‍ വന്‍ പ്രത്യാഘാതം നേരിടേണ്ടി വരുമെന്ന് യുഎസ്; പ്രചരിക്കുന്നത് വ്യാജവാര്‍ത്തകളെന്ന് റഷ്യയും ചൈനയും

വാഷിങ്ടൻ: റഷ്യയെ ചൈന സഹായിച്ചാൽ ഗുരുതരമായ പ്രത്യാഘാതങ്ങൾ നേരിടേണ്ടി വരുമെന്നു യുഎസ്. ആയുധങ്ങള്‍ നല്‍കണമെന്ന് റഷ്യ ചൈനയോട് ആവശ്യപ്പെട്ടതായി റിപ്പോര്‍ട്ടുകള്‍ പ്രചരിച്ചിരുന്നു. ഈ സാഹചര്യത്തിലാണ് യുഎസിന്റെ മുന്നറിയിപ്പ്.

ചൈന റഷ്യയെ സഹായിച്ചാൽ പ്രത്യാഘതം നേരിടേണ്ടി വരുമെന്നു യുഎസ് ദേശീയ സുരക്ഷാ ഉപദേഷ്ടാവ് ജെയ്ക് സള്ളിവനാണ് മുന്നറിയിപ്പ് നല്‍കിയത്. എന്നാല്‍ ചൈനയോട് തങ്ങള്‍ സഹായം തേടിയെന്ന റിപ്പോര്‍ട്ടുകള്‍ റഷ്യ നിഷേധിച്ചു.

യുക്രൈനില്‍ റഷ്യയുടെ ലക്ഷ്യം പൂര്‍ത്തിയാക്കാന്‍ മതിയായ ആയുധവും ആള്‍ബലവും റഷ്യക്കുണ്ടെന്ന് സര്‍ക്കാര്‍ വക്താവ് ദിമിത്രി പെസ്‌കോവ് പറഞ്ഞു. അമേരിക്ക വ്യാജ വിവരങ്ങള്‍ പ്രചരിപ്പിക്കുകയാണെന്നും യുക്രൈന്‍ വിഷയത്തില്‍ ചൈനയെ ലക്ഷ്യം വെക്കുകയാണെന്നും ചൈനീസ് വിദേശ കാര്യ വക്താവ് പറഞ്ഞു.