വിവാഹം നടന്നത് ആറു മാസം മുമ്പ്! കോട്ടയത്ത് ദമ്പതികള്‍ ആത്മഹത്യ ചെയ്ത നിലയില്‍

കോട്ടയം: വൈക്കം തലയോലപ്പറമ്പിൽ നവദമ്പതികളെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. തലയോലപ്പറമ്പ് കുലശേഖരമംഗലം കൊടൂപ്പാടത്താണ് ദമ്പതിമാരെ മരിച്ച നിലയിൽ കണ്ടെത്തിയത്. മറവൻതുരുത്ത് 14-ാം വാർഡിൽ എട്ടുപറയിൽ വീട്ടിൽ പരേതനായ പ്രകാശന്റെ മകൻ ശ്യാം പ്രകാശ് (24) ഭാര്യ അരുണിമ (19) എന്നിവരെയാണ് വീട്ടിലെ മുറിയിൽ തൂങ്ങി മരിച്ച നിലയിൽ കണ്ടെത്തിയത്.

ശ്യാം പ്രകാശ് പെയിന്‍റിങ് തൊഴിലാളിയാണ്. പ്ലസ് വൺ വിദ്യാര്‍ഥിയായ സഹോദരൻ ശരത്ത് പ്രകാശും തൊഴിലുറപ്പ് തൊഴിലാളിയായ അമ്മ ലാലിയും വീട്ടിലില്ലാതിരുന്ന സമയത്തായിരുന്നു സംഭവം. ക്ലാസ് കഴിഞ്ഞ് വൈകിട്ട് മൂന്ന് മണിയോടെ വീട്ടിലെത്തിയ ശരത്ത് ആണ് തൂങ്ങിയ നിലയിൽ ഇരുവരെയും ആദ്യം കണ്ടത്.

ആത്മഹത്യ ചെയ്യാനുള്ള കാരണം വ്യക്തമല്ല. ഇരുവരുടെയും വിവാഹം ആറു മാസം മുമ്പാണ് കഴിഞ്ഞതെന്നാണ് റിപ്പോര്‍ട്ട്.

(ആത്മഹത്യ ഒരു പ്രശ്നത്തിനും പരിഹാരമല്ല. പ്രതിസന്ധികൾ അത്തരം തോന്നൽ ഉണ്ടാക്കിയാൽ കൗൺസിലിങ് പിന്തുണക്കായി ഈ നമ്പറുകളിൽ ബന്ധപ്പെടുക. 1056, 0471- 2552056)