സിപിഎം സംസ്ഥാന സമ്മേളനത്തിലും സെമിനാറിലേക്ക് ക്ഷണമുണ്ടായിരുന്നു; അന്ന് എഐസിസി പ്രസിഡന്റുമായി ആലോചിച്ച് വിവാദങ്ങളില്ലാതെ ഉചിതമായ തീരുമാനമെടുത്തു; ഇന്നും അത് സാധ്യമായിരുന്നെങ്കിലും ചിലര്‍ അനാവശ്യവിവാദമുണ്ടാക്കി-'വിവാദങ്ങളില്‍ അതൃപ്തിയുമായി ശശി തരൂര്‍

തിരുവനന്തപുരം: സിപിഎം പാർട്ടി കോൺഗ്രസിൻ്റെ ഭാഗമായി നടക്കുന്ന സെമിനാറിൽ പങ്കെടുക്കുന്നതിന് ശശി തരൂരിന് ഹൈക്കമാന്‍ഡ് അനുമതി നിഷേധിച്ചിരുന്നു. കെപിസിസിയുടെ അഭിപ്രായം പരിഗണിച്ചാണ് എഐസിസിയുടെ നടപടി. എന്നാല്‍ പാര്‍ട്ടിയിലെ ആഭ്യന്തര ഭിന്നതകള്‍ പരസ്യമായി പ്രചരിപ്പിച്ച് ചിലര്‍ അനാവശ്യ വിവാദം സൃഷ്ടിക്കുകയാണെന്ന് ആരോപിച്ച്‌ തരൂര്‍ രംഗത്തെത്തി.

സിപിഎം ദേശീയ പാർട്ടി കോൺഗ്രസിന്റെ ഭാഗമായി നടക്കുന്ന കേന്ദ്ര-സംസ്ഥാന ബന്ധങ്ങളെക്കുറിച്ചുള്ള സെമിനാറിൽ പങ്കെടുക്കുന്ന കാര്യം എഐസിസി പ്രസിഡന്റുമായി ചർച്ച ചെയ്തിരുന്നു. കേന്ദ്ര-സംസ്ഥാന ബന്ധങ്ങളെക്കുറിച്ചുള്ളതായിരുന്നു സെമിനാറിന്റെ വിഷയമെന്നും അതുകൊണ്ടാണ് താന്‍ സിപിഎമ്മിന്റെ ക്ഷണം സ്വാഗതം ചെയ്തതെന്നും തരൂര്‍ ചൂണ്ടിക്കാട്ടി.

ദേശീയതലത്തില്‍ കോണ്‍ഗ്രസ് സിപിഎമ്മുമായി സഹകരിക്കാറുണ്ട്. 'ബിജെപി വിരുദ്ധ പ്രതിപക്ഷ പാർട്ടികൾക്കിടയിലെ' നയപരമായ വിഷയങ്ങളിലെ ബൗദ്ധിക കൈമാറ്റത്തിന്റെ മികച്ച ഉദാഹരണമാണ് ഈ സംഭവം. ഇത്‌ തത്വത്തിൽ പ്രോത്സാഹിപ്പിക്കപ്പെടേണ്ടതാണെന്നും തരൂര്‍ അഭിപ്രായപ്പെട്ടു.

എന്നാല്‍ എഐസിസിയുടെ തീരുമാനം അംഗീകരിക്കുന്നു. പങ്കെടുക്കാനാകില്ലെന്ന് സെമിനാറിന്റെ സംഘാടകരെ അറിയിച്ചിട്ടുണ്ട്. ദേശീയ തലത്തിൽ സിപിഎമ്മുമായുള്ള ബന്ധത്തെക്കുറിച്ചുള്ള വിശാലമായ ചോദ്യങ്ങൾ, കേന്ദ്ര-സംസ്ഥാന ബന്ധങ്ങളുടെ പ്രത്യേക വിഷയവും മറ്റ് രാഷ്ട്രീയ പാർട്ടികളിൽ നിന്നുള്ള ക്ഷണങ്ങൾ കൈകാര്യം ചെയ്യേണ്ട രീതിയും എന്നിവ പാര്‍ട്ടി പ്രത്യേകം ചര്‍ച്ച ചെയ്യേണ്ടതുണ്ട്.

ഒരു മാസം മുമ്പ്, സിപിഎം സംസ്ഥാന പാർട്ടി സമ്മേളനത്തോടനുബന്ധിച്ച് സെമിനാറിലേക്ക് സമാനമായ ക്ഷണം ലഭിച്ചിരുന്നു. അന്ന്, എഐസിസി പ്രസിഡന്റുമായി കൂടിയാലോചിക്കുകയും മാധ്യമ വിവാദങ്ങളൊന്നും കൂടാതെ ഉചിതമായ തീരുമാനം എടുക്കുകയും ചെയ്യുകയായിരുന്നുവെന്നും തരൂര്‍ വ്യക്തമാക്കി.

സമാനമായ നടപടിക്രമം ഇത്തവണയും എളുപ്പത്തിൽ പിന്തുടരാമായിരുന്നു. ചിലർ ആഭ്യന്തര ഭിന്നതകൾ പരസ്യമായി പ്രചരിപ്പിക്കുന്നതിനാണ്‌ മുൻഗണന നൽകിയത്. അതുവഴി എഐസിസിയുടെ വീക്ഷണം നിർബന്ധിതമായ ഒരു വിഷയത്തിൽ അനാവശ്യ വിവാദം സൃഷ്ടിച്ചെന്നും തരൂര്‍ അതൃപ്തി പ്രകടിപ്പിച്ച്‌ വ്യക്തമാക്കി.