സില്‍വര്‍ലൈന്‍ പദ്ധതിയുടെ അനുമതി; പ്രധാനമന്ത്രിയുടെ ഉറപ്പു ലഭിച്ചുവെന്നത് വ്യാജപ്രചാരണമെന്ന് വി. മുരളീധരന്‍; ജനങ്ങള്‍ക്ക് എതിരെ അതിക്രമം നടത്താനുള്ള മുഖ്യമന്ത്രിയുടെ പ്രസ്താവന മാത്രമെന്നും കേന്ദ്രമന്ത്രി

തിരുവനന്തപുരം: കെ റെയില്‍ പദ്ധതിയുടെ അനുമതിയുമായി ബന്ധപ്പെട്ട് പ്രധാനമന്ത്രി നരേന്ദ്ര മോദിയുടെ ഉറപ്പു ലഭിച്ചുവെന്നത് മുഖ്യമന്ത്രിയുടെ വ്യാജപ്രചാരണമാണെന്ന് കേന്ദ്രമന്ത്രി വി. മുരളീധരന്‍. ജനങ്ങള്‍ക്ക് എതിരെയുള്ള അതിക്രമം തുടരാനും സര്‍വെ നടത്തുന്ന ഏജന്‍സികള്‍ പിന്മാറാതിരിക്കാനുമുള്ള പ്രസ്താവന മാത്രമാണ് മുഖ്യമന്ത്രിയുടേതെന്നും അദ്ദേഹം വിമര്‍ശിച്ചു.

തിരുവനന്തപുരം കരിക്കകത്ത് സിൽവർലൈൻ പദ്ധതിയുടെ ഭാഗമായി കുടിയൊഴിപ്പിക്കൽ ഭീഷണി നേരിടുന്ന ജനങ്ങളെ സന്ദർശിച്ച ശേഷം മാധ്യമങ്ങളോടു പ്രതികരിക്കുകയായിരുന്നു വി. മുരളീധരന്‍.അനുമതി നൽകിയിട്ടില്ലെന്ന് റെയിൽവേ മന്ത്രി അറിയിച്ച ശേഷവും ജനങ്ങളുടെ പ്രതിഷേധം വകവയ്ക്കാതെ മുന്നോട്ടു പോകുന്നത് ആപൽക്കരമാണെന്നും മുരളീധരന്‍ പറഞ്ഞു.