‘ഞാൻ ഒരു കാക്കനാടൻ’ വ്‌ളോഗര്‍ അബ്ദുൽ ഷുക്കൂർ ടൂറിസ്റ്റ് ഹോമിൽ ആത്മഹത്യ ചെയ്ത നിലയിൽ; ബ്ലേഡ് പലിശക്കാരന്റെ ഭീഷണിയെക്കുറിച്ച് എഴുതിയ 4 സെറ്റ് ആത്മഹത്യാക്കുറിപ്പുകൾ കണ്ടെത്തി

ആലുവ: ‘ഞാൻ ഒരു കാക്കനാടൻ’ വ്‌ളോഗര്‍ അബ്ദുൽ ഷുക്കൂർ ടൂറിസ്റ്റ് ഹോമിൽ ആത്മഹത്യ ചെയ്ത നിലയിൽ. കാക്കനാട് കിഴക്കേക്കര വീട്ടിൽ അബ്ദുൽ ഷുക്കൂർ (49) ആണു ജീവനൊടുക്കിയത്. ചെമ്പുമുക്ക് സ്വദേശിയായ ബ്ലേഡ് പലിശക്കാരന്റെ ഭീഷണിയെക്കുറിച്ച് എഴുതിയ 4 സെറ്റ് ആത്മഹത്യാക്കുറിപ്പുകൾ മൃതദേഹത്തിനു സമീപം പൊലീസ് കണ്ടെടുത്തു.

2 ദിവസം മുൻപാണു ഷുക്കൂർ ഇവിടെ മുറിയെടുത്തത്. ചെമ്പുമുക്ക് സ്വദേശിയിൽ നിന്ന് 5 വർഷം മുൻപ് 5 ലക്ഷം രൂപ കടം വാങ്ങിയെന്നും അതിനു പ്രതിമാസം 25,000 രൂപ വീതം ഇതുവരെ 15 ലക്ഷം രൂപ പലിശ നൽകിയെന്നും കുറിപ്പിൽ പറയുന്നു.

എന്നിട്ടും പലിശക്കാരൻ തന്നെയും കുടുംബത്തെയും നിരന്തരം ഭീഷണിപ്പെടുത്തുന്ന സാഹചര്യത്തിലാണ് ആത്മഹത്യ ചെയ്യുന്നതെന്നാണു കുറിപ്പിലെ ആരോപണം.

കലക്ടറും പൊലീസ് കമ്മിഷണറും ഉൾപ്പെടെ 4 ഉദ്യോഗസ്ഥർക്കാണു കത്തു തയാറാക്കി വച്ചത്. വീടിന്റെ മുകളിലെ നിലയിലായിരുന്നു ഷുക്കൂറിന്റെ ബുട്ടീക്. ‘ഞാൻ ഒരു കാക്കനാടൻ’ എന്ന പേരിൽ യൂട്യൂബ് പരിപാടികൾ അവതരിപ്പിച്ചിരുന്നു.