07
Sunday August 2022
തിരുവനന്തപുരം

അഭ്യസ്തവിദ്യരായ സ്ത്രീകളുടെ ജീവിതസ്വപ്നങ്ങള്‍ക്ക് വെള്ളിവെളിച്ചം പകരാന്‍ സില്‍വര്‍ ലൈനിനാകുമെന്ന് ഡോ. ജോ ജോസഫ് ! ഉന്നതവിദ്യാഭ്യാസം നേടിയ സ്ത്രീകള്‍ വിവാഹത്തിനുശേഷം നാലു ചുവരിനുള്ളില്‍ തളച്ചിടപ്പെടുന്നു. അഭ്യസ്തവിദ്യരിലെ വിവാഹിതകള്‍ക്ക് ജോലിക്ക് പോകാന്‍ സാധിക്കാത്തതിനുള്ള പ്രധാന കാരണത്തിലൊന്ന് കൂടിയ യാത്രാദൂരം ! സില്‍വര്‍ ലൈന്‍ പദ്ധതിയെക്കുറിച്ച് സ്ത്രീപക്ഷത്തുനിന്നും വിശകലനങ്ങളോ വിലയിരുത്തലുകളോ വരാത്തതെന്തുകൊണ്ടെന്നും തൃക്കാക്കരയിലെ മുന്‍ ഇടതു സ്ഥാനാര്‍ത്ഥിയുടെ ചോദ്യം

ന്യൂസ് ബ്യൂറോ, തിരുവനന്തപുരം
Monday, July 4, 2022

തിരുവനന്തപുരം: അണുകുടുംബങ്ങള്‍ കൂടുതലായുള്ള കേരളത്തില്‍ ഉന്നതവിദ്യാഭ്യാസം നേടിയ സ്ത്രീകള്‍ വിവാഹത്തിനുശേഷം നാലു ചുവരിനുള്ളില്‍ തളച്ചിടപ്പെടുകയാണെന്ന് തൃക്കാക്കരയിലെ ഇടതു സ്ഥാനാര്‍ത്ഥി ഡോ. ജോ ജോസഫ്.

ഇങ്ങനെ വരുന്നതിനാല്‍ സ്ത്രീകളുടെ വിദ്യാഭ്യാസത്തിനായി ചെലവഴിക്കപ്പെട്ട സമയം, മറ്റു വിഭവങ്ങള്‍ എന്നിവയെല്ലാം വലിയൊരളവോളം പാഴായിപ്പോകുകയാണെന്നും അദ്ദേഹം നിരീക്ഷിക്കുന്നു.ദേശാഭിമാനിയില്‍ എഴുതിയ ലേഖനത്തിലാണ് ഇക്കാര്യം ഡോ. ജോ ജോസഫ് പറയുന്നത്.

ആറ്റിങ്ങല്‍ മുനിസിപ്പാലിറ്റിയില്‍ നടത്തിയ പഠനപ്രകാരം അഭ്യസ്തവിദ്യരിലെ വിവാഹിതകള്‍ക്ക് ജോലിക്ക് പോകാന്‍ സാധിക്കാത്തതിനുള്ള പ്രധാന കാരണത്തിലൊന്ന് കൂടിയ യാത്രാദൂരമാണ്. രാവിലെ നേരത്തെ എഴുന്നേറ്റ് വീട്ടിലെ ജോലിയെല്ലാം തീര്‍ത്ത് വച്ചു പോകുകയും വീട്ടില്‍ തിരിച്ചെത്തി വീണ്ടും വീട്ടുജോലികളില്‍ ഏര്‍പ്പെടുകയും ചെയ്യേണ്ടിവരുന്ന അവസ്ഥ ദീര്‍ഘകാലത്തേക്ക് സാധ്യമാകണമെന്നില്ല. അതുകൊണ്ടുതന്നെ ദൂരസ്ഥലങ്ങളിലെ ജോലി ഉപേക്ഷിക്കുകയാണ്.

ഒരു വൈജ്ഞാനിക സമ്പദ്ഘടനയിലേക്കുള്ള പരിണാമത്തിന് തയ്യാറെടുക്കുന്ന കേരളത്തില്‍ അതിന്റെ ഗുണഭോക്താക്കളാകാന്‍ സ്ത്രീകള്‍ക്ക് കഴിയണമെങ്കില്‍ അവരുടെ ചലനാത്മകത ഗണ്യമായി വര്‍ധിക്കണം. പ്രായഭേദമില്ലാതെ എല്ലാ വിഭാഗം സ്ത്രീകളുടെയും ഒരു സമൂഹമെന്നനിലയിലുള്ള ചലനാത്മകത വര്‍ധിപ്പിക്കുന്ന പദ്ധതിയാണ് സില്‍വര്‍ ലൈന്‍.

കേരളത്തിലെ സ്ത്രീകളാണ് ഉന്നതവിദ്യാഭ്യാസം നേടിയവരില്‍, പ്രത്യേകിച്ച് ബിരുദ-ബിരുദാനന്തര വിദ്യാഭ്യാസം നേടിയവരില്‍ കൂടുതല്‍. അവര്‍ക്ക് ജോലിചെയ്യാന്‍ പറ്റുന്ന ഉയര്‍ന്ന തൊഴില്‍മേഖലകള്‍- ഐടി, ബയോടെക്‌നോളജി, സര്‍വിസ് മേഖലകള്‍- ഭൂരിഭാഗവും നഗരങ്ങളിലാണ് കേന്ദ്രീകരിക്കപ്പെടുക.

ഗ്രാമപ്രദേശങ്ങളിലുള്ള സ്ത്രീകള്‍ക്ക് ഇത്തരം സാധ്യതകള്‍ പ്രയോജനപ്പെടുത്താനാകണം. ഇത്തരം തൊഴിലിടങ്ങളില്‍ ഇന്നത്തെ യാത്രാസൗകര്യങ്ങള്‍ ഉപയോഗിച്ചു ദിവസേന വന്നുപോകുക പ്രയാസമാണ്. വേഗമേറിയ പൊതുയാത്രാ മാര്‍ഗങ്ങള്‍ ലഭ്യമാണെങ്കില്‍ ഇത്തരം നഗരകേന്ദ്രീകൃത തൊഴിലിടങ്ങള്‍ സ്ത്രീകള്‍ക്ക് കൂടുതല്‍ പ്രാപ്യമാകും.

ഏതൊരു സമൂഹത്തിന്റെയും മുന്നോട്ടുള്ള കുതിപ്പിന്റെ വേഗത നിര്‍ണയിക്കുന്നത് ആ സമൂഹത്തിലെ സ്ത്രീകളുടെ ശാക്തീകരണമാണ്. സില്‍വര്‍ ലൈന്‍ പദ്ധതിയെക്കുറിച്ച് സ്ത്രീപക്ഷത്തുനിന്നുള്ള വിശകലനങ്ങളോ വിലയിരുത്തലുകളോ കാര്യമായി കണ്ടില്ലാത്തതിനാല്‍ അതുയര്‍ന്നുവരാനാണ് തന്റെ കുറിപ്പെന്നും അദ്ദേഹം വ്യക്തമാക്കുന്നു.

ഡോ. ജോ ജോസഫിന്റെ ലേഖനം

കേരളത്തിലെ ഏറ്റവും വലിയ അടിസ്ഥാനവികസന പദ്ധതിയായി വിഭാവനം ചെയ്യപ്പെടുന്ന ഒന്നാണല്ലോ സില്‍വര്‍ ലൈന്‍ പദ്ധതി. ഇതിനെ ചുറ്റിപ്പറ്റിയുള്ള ചര്‍ച്ചകളും വിവാദങ്ങളും സജീവമാണ്.

ഇന്നുള്ള 3.5 കോടി ജനങ്ങളുടെ മാത്രമല്ല, വരാനിരിക്കുന്ന അനേകം തലമുറകളുടെകൂടി ജീവിതങ്ങളെ ആഴത്തില്‍ സ്വാധീനിക്കാന്‍ പോന്ന ഇത്തരം പദ്ധതികളുടെ നെല്ലും പതിരും വേര്‍തിരിച്ചെടുക്കേണ്ടത് ഇന്നിന്റെ മാത്രമല്ല, ഭാവിയുടെയും ആവശ്യമാണ്.

ഈ പദ്ധതിയുടെ സാമ്പത്തിക/ പാരിസ്ഥിതിക വശങ്ങള്‍ ധാരാളമായി ചര്‍ച്ച ചെയ്യപ്പെടുന്നുണ്ട്. ഏതു വന്‍കിട പദ്ധതിയും വരുമ്പോള്‍ നടക്കുന്ന ഇത്തരം പരമ്പരാഗതമായ ചര്‍ച്ചകള്‍ക്കപ്പുറം ഈ പദ്ധതിയെ വിലയിരുത്തേണ്ടത് അത്യാവശ്യമാണ്.

ഏതൊരു സമൂഹത്തിന്റെയും മുന്നോട്ടുള്ള കുതിപ്പിന്റെ വേഗത നിര്‍ണയിക്കുന്നത് ആ സമൂഹത്തിലെ സ്ത്രീകളുടെ ശാക്തീകരണമാണ്. സില്‍വര്‍ ലൈന്‍ പദ്ധതിയെക്കുറിച്ച് സ്ത്രീപക്ഷത്തുനിന്നുള്ള വിശകലനങ്ങളോ വിലയിരുത്തലുകളോ കാര്യമായി കണ്ടില്ല. അതിനുള്ള ശ്രമമാണ് ഈ കുറിപ്പ്.

കേരള മോഡലും വൈരുധ്യവും

സാമ്പത്തിക വളര്‍ച്ച, ആളോഹരി വരുമാനം എന്നിവയില്‍ വികസിത രാജ്യങ്ങള്‍ക്ക് ഏറെ പിന്നിലാണെങ്കിലും സാമൂഹ്യവികസന സൂചികകളില്‍ അവര്‍ക്കൊപ്പം നില്‍ക്കാനാകുംവിധം നാം നേടിയ പുരോഗതിയെ ആണല്ലോ കേരള മോഡല്‍ എന്നതുകൊണ്ട് വിവക്ഷിക്കുന്നത്. ഈ സൂചികകളില്‍ ചിലത് ലോകത്തിലെ തന്നെ ഏറ്റവും വികസിതമെന്ന് കരുതപ്പെടുന്ന സ്‌കാന്‍ഡിനേവിയന്‍ രാജ്യങ്ങള്‍ക്കൊപ്പമാണ്.

ഇതില്‍ ഏറ്റവും മികച്ചത് സ്ത്രീകളുടെ ആരോഗ്യ /വിദ്യാഭ്യാസ സൂചികകളാണ്. ഉദാഹരണത്തിന് കേരളത്തിലെ സ്ത്രീകളുടെ ശരാശരി ആയുര്‍ദൈര്‍ഘ്യം 78.6 വര്‍ഷവും പുരുഷന്‍മാരുടേത് 75.2 വര്‍ഷവുമാണ്. ഈ വിഭാഗത്തില്‍ ദേശീയ ശരാശരി യഥാക്രമം 72.09 വര്‍ഷവും 69.51 വര്‍ഷവുമാണ്.

ഒരു സ്ത്രീക്ക് കേരളത്തില്‍ ജനിച്ചുവെന്നതുകൊണ്ടു മാത്രം ഏകദേശം ഏഴു വര്‍ഷം അധികം ആയുസ്സ് ലഭിക്കുന്നുവെന്നര്‍ഥം. കേരളത്തില്‍ മാതൃമരണനിരക്ക് ഒരു ലക്ഷം പ്രസവത്തില്‍ 53.49 ആണ്. ദേശീയ ശരാശരിയാകട്ടെ 178.35.

കേന്ദ്ര സര്‍ക്കാരിന്റെ സ്റ്റാറ്റിസ്റ്റിക്‌സ് മന്ത്രാലയം 2020 ജനുവരിയില്‍ പുറത്തുവിട്ട സര്‍വേ പ്രകാരം പ്രീ പ്രൈമറിതലംമുതല്‍ സര്‍വകലാശാലാ വിദ്യാഭ്യാസ കാലഘട്ടംവരെ ഇന്ത്യയില്‍ ഏറ്റവുമധികം പ്രായാധിഷ്ഠിത ഹാജര്‍ അനുപാതമുള്ളതും കേരളത്തിലാണ്. ഇനിയുമേറെയുണ്ട് നമുക്ക് അഭിമാനിക്കാന്‍.

കേരള മോഡലിനൊപ്പംതന്നെ ചര്‍ച്ച ചെയ്യപ്പെടേണ്ട ഒന്നാണ് ആ മോഡലിന്റെ ആന്തരിക വൈരുധ്യവും. ഈ വൈരുധ്യങ്ങള്‍ ഏറ്റവുമധികം പ്രകടമാകുന്നതും ആരോഗ്യം, ലിംഗനീതി എന്നീ മേഖലകളിലാണ്. ഇന്ത്യയിലെ എന്നല്ല, ലോകത്തിലെതന്നെ ഏറ്റവുമധികം പ്രമേഹരോഗികളും ഹൃദ്രോഗികളുമുള്ള സ്ഥലം കേരളമാണ്.

മറ്റു ചില സാമൂഹ്യ സൂചകങ്ങളിലെ വൈരുധ്യവും ഞെട്ടിപ്പിക്കുന്നതാണ്. അഭ്യസ്തവിദ്യരായവരിലെ തൊഴിലില്ലായ്മ നിരക്ക്, ഉയര്‍ന്ന ആത്മഹത്യാനിരക്ക് തുടങ്ങിയവ ഇവയില്‍ ചിലതു മാത്രമാണ്.

കേരളത്തിലെ തൊഴിലില്ലായ്മ നിരക്ക് ദേശീയ ശരാശരിയേക്കാള്‍ കൂടുതലാണ്. അതില്‍ത്തന്നെ അഭ്യസ്തവിദ്യരായ തൊഴില്‍രഹിത സ്ത്രീകളുടെ എണ്ണവും ഏറ്റവുമധികമുള്ളത് കേരളത്തിലാണ്.

സാമ്പത്തിക മന്ത്രാലയം അടുത്തിടെ പുറത്തുവിട്ട ചില കണക്കുകളും ലിംഗനീതിയുടെ കാര്യത്തില്‍ നമ്മുടെ ദൗര്‍ബല്യങ്ങളെ വെളിപ്പെടുത്തുന്നവയാണ്. കേരളത്തിലെ തൊഴിലിടങ്ങളിലുള്ള ലിംഗപരമായ അസമത്വം അവിശ്വസനീയമാണ്.

മറ്റു സംസ്ഥാനങ്ങളുമായി താരതമ്യപ്പെടുത്തുമ്പോള്‍ തൊഴിലിടങ്ങളിലെ തങ്ങളുടെ പുരുഷ സഹപ്രവര്‍ത്തകരേക്കാള്‍ വിദ്യാഭ്യാസമുള്ളവരാണ് കേരളത്തിലെ സ്ത്രീകള്‍. എന്നാല്‍, ജോലി പങ്കാളിത്തനിരക്കിലും വേതന നിരക്കിലും ഗ്രാമ, നഗര വ്യത്യാസമില്ലാതെ സ്ത്രീകള്‍ പിറകിലാണ്. കേരളത്തിലെ തൊഴിലില്ലായ്മ നിരക്ക് ദേശീയ ശരാശരിയേക്കാള്‍ കൂടുതലാണ്.

അതില്‍ത്തന്നെ അഭ്യസ്തവിദ്യരായ തൊഴില്‍രഹിത സ്ത്രീകളുടെ എണ്ണവും ഏറ്റവുമധികമുള്ളത് കേരളത്തിലാണ്. അവസാനം പുറത്തുവന്ന പഠനമനുസരിച്ച് (Periodic Labour Force Survey) തൊഴില്‍ പങ്കാളിത്തനിരക്ക് -LFPR (Labour Force Participation Rate) കോവിഡ് കാലഘട്ടത്തില്‍ കുറഞ്ഞിട്ടുണ്ട്. 2021/ജനുവരി- മാര്‍ച്ച് പാദത്തില്‍ 15 വയസ്സിനു മുകളിലുള്ളവരില്‍ പുരുഷന്മാരില്‍ 73.5 ശതമാനവും സ്ത്രീകളില്‍ 21.2 ശതമാനം മാത്രമാണ് തൊഴില്‍ പങ്കാളിത്തനിരക്ക്.

ഇതേ കാലഘട്ടത്തില്‍ കേരളത്തിലെ നഗരമേഖലയിലെ സ്ത്രീകളുടെ തൊഴില്‍ പങ്കാളിത്തനിരക്ക് -LFPR 24.9 ശതമാനം മാത്രമാണ്. ദേശീയ ശരാശരിയില്‍നിന്ന് നേരിയ മെച്ചംമാത്രം (21.2 ശതമാനം). മറ്റൊരു സ്ത്രീപക്ഷ സൂചികകളിലും കേരളത്തിന്റെ അടുത്തെങ്ങുമെത്താത്ത സംസ്ഥാനങ്ങളില്‍ പലതും ഈ സൂചികകളില്‍ കേരളത്തേക്കാള്‍ മുന്നിലാണ്.

സെന്റര്‍ ഫോര്‍ മോണിറ്ററിങ് ഇന്ത്യന്‍ ഇക്കണോമി നടത്തിയ ഉപഭോക്തൃ സര്‍വേയും കേരളത്തിലെ സ്ത്രീകളുടെ തൊഴില്‍ പങ്കാളിത്തത്തെക്കുറിച്ച് ആശങ്കയുളവാക്കുന്ന ചില നിരീക്ഷണം പങ്കുവയ്ക്കുന്നുണ്ട്.

നഗരങ്ങളിലെ സ്ത്രീകളുടെ തൊഴില്‍ പങ്കാളിത്തം ഗ്രാമങ്ങളിലെ സ്ത്രീകളേക്കാള്‍ കുറവാണ്. ഉദാഹരണത്തിന് 2019- –2020ലെ കണക്കുകള്‍ പ്രകാരം നഗരമേഖലയില്‍ 9.7 ശതമാനം മാത്രമായിരുന്നു പങ്കാളിത്തമെങ്കില്‍ ഗ്രാമീണമേഖലയില്‍ 11.3 ശതമാനമാണ്.

ആറ്റിങ്ങല്‍ മുനിസിപ്പാലിറ്റിയില്‍ നടത്തിയ പഠനപ്രകാരം അഭ്യസ്തവിദ്യരിലെ വിവാഹിതകള്‍ക്ക് ജോലിക്ക് പോകാന്‍ സാധിക്കാത്തതിനുള്ള പ്രധാന കാരണത്തിലൊന്ന് കൂടിയ യാത്രാദൂരമാണ് എന്ന് കണ്ടെത്തിയിട്ടുണ്ട്.

അണുകുടുംബങ്ങള്‍ കൂടുതലായുള്ള കേരളത്തില്‍ ഉന്നതവിദ്യാഭ്യാസം നേടിയ സ്ത്രീകള്‍ വിവാഹത്തിനുശേഷം നാലു ചുവരിനുള്ളില്‍ തളച്ചിടപ്പെടുകയാണ്. അതുകൊണ്ടുതന്നെ സ്ത്രീകളുടെ വിദ്യാഭ്യാസത്തിനായി ചെലവഴിക്കപ്പെട്ട സമയം, മറ്റു വിഭവങ്ങള്‍ എന്നിവയെല്ലാം വലിയൊരളവോളം പാഴായിപ്പോകുകയാണ്.

ആറ്റിങ്ങല്‍ മുനിസിപ്പാലിറ്റിയില്‍ നടത്തിയ പഠനപ്രകാരം അഭ്യസ്തവിദ്യരിലെ വിവാഹിതകള്‍ക്ക് ജോലിക്ക് പോകാന്‍ സാധിക്കാത്തതിനുള്ള പ്രധാന കാരണത്തിലൊന്ന് കൂടിയ യാത്രാദൂരമാണ് എന്ന് കണ്ടെത്തിയിട്ടുണ്ട്.

രാവിലെ നേരത്തെ എഴുന്നേറ്റ് വീട്ടിലെ ജോലിയെല്ലാം തീര്‍ത്ത് വച്ചു പോകുകയും വീട്ടില്‍ തിരിച്ചെത്തി വീണ്ടും വീട്ടുജോലികളില്‍ ഏര്‍പ്പെടുകയും ചെയ്യേണ്ടിവരുന്ന അവസ്ഥ ദീര്‍ഘകാലത്തേക്ക് സാധ്യമാകണമെന്നില്ല. അതുകൊണ്ടുതന്നെ ദൂരസ്ഥലങ്ങളിലെ ജോലിസാധ്യതകള്‍ ഉപേക്ഷിക്കേണ്ടിവരുന്നു.

അതുപോലെ ജോലിസ്ഥലം ദൂരെയാകുമെന്ന കാരണത്താല്‍മാത്രം സ്ത്രീകള്‍ക്ക് പലപ്പോഴും തങ്ങളുടെ കരിയറില്‍ ലഭിക്കേണ്ട സ്ഥാനക്കയറ്റങ്ങളും മറ്റ് അവസരങ്ങളും നഷ്ടപ്പെടുത്തേണ്ടിയുംവരുന്നു. തന്മൂലം വ്യക്തിപരമായി തൊഴിലിലുണ്ടാകുന്ന അഭിവൃദ്ധിയും സാമ്പത്തിക നേട്ടങ്ങളും ലഭ്യമാകാതെ വരുന്നു.

ഗ്രാമപ്രദേശങ്ങളില്‍ താമസിക്കുന്ന അഭ്യസ്തവിദ്യരായ സ്ത്രീകള്‍ക്ക് നഗരങ്ങളില്‍ ലഭ്യമാകുന്ന തൊഴില്‍ അവസരങ്ങള്‍ പ്രയോജനപ്പെടുത്താന്‍ സാധിക്കുന്നില്ല. മാതാപിതാക്കള്‍ നാട്ടില്‍ ഒറ്റയ്ക്കാകുമെന്ന കാരണത്താല്‍ നഗരങ്ങളിലെ ജോലി, അതിലെ ഏറ്റവും ഉന്നതിയില്‍ നില്‍ക്കുന്ന കാലഘട്ടത്തില്‍ ഉപേക്ഷിച്ചു പിന്മാറേണ്ടിവരുന്നവരിലും ഭൂരിപക്ഷം സ്ത്രീകളാണ്.

പഠനം പൂര്‍ത്തിയാക്കി ജോലിക്ക് തയ്യാറെടുക്കുന്ന പെണ്‍കുട്ടികള്‍ വിദൂരസ്ഥലത്ത് ഒറ്റയ്ക്ക് താമസിക്കേണ്ടിവരികയെന്ന വെല്ലുവിളിക്കു മുമ്പില്‍ ആ സ്വപ്നം ഉപേക്ഷിക്കുന്നതും കേരളത്തില്‍ സാധാരണമാണ്.

ഒരു വൈജ്ഞാനിക സമ്പദ്ഘടനയിലേക്കുള്ള പരിണാമത്തിന് തയ്യാറെടുക്കുന്ന കേരളത്തില്‍ അതിന്റെ ഗുണഭോക്താക്കളാകാന്‍ സ്ത്രീകള്‍ക്ക് കഴിയണമെങ്കില്‍ അവരുടെ ചലനാത്മകത ഗണ്യമായി വര്‍ധിക്കണം.

പ്രായഭേദമില്ലാതെ എല്ലാ വിഭാഗം സ്ത്രീകളുടെയും ഒരു സമൂഹമെന്നനിലയിലുള്ള ചലനാത്മകത വര്‍ധിപ്പിക്കുന്ന പദ്ധതിയാണ് സില്‍വര്‍ ലൈന്‍. കേരളത്തിലെ സ്ത്രീകളാണ് ഉന്നതവിദ്യാഭ്യാസം നേടിയവരില്‍, പ്രത്യേകിച്ച് ബിരുദ- ബിരുദാനന്തര വിദ്യാഭ്യാസം നേടിയവരില്‍ കൂടുതല്‍.

അവര്‍ക്ക് ജോലിചെയ്യാന്‍ പറ്റുന്ന ഉയര്‍ന്ന തൊഴില്‍മേഖലകള്‍- ഐടി, ബയോടെക്‌നോളജി, സര്‍വിസ് മേഖലകള്‍- ഭൂരിഭാഗവും നഗരങ്ങളിലാണ് കേന്ദ്രീകരിക്കപ്പെടുക. ഗ്രാമപ്രദേശങ്ങളിലുള്ള സ്ത്രീകള്‍ക്ക് ഇത്തരം സാധ്യതകള്‍ പ്രയോജനപ്പെടുത്താനാകണം.

ഇത്തരം തൊഴിലിടങ്ങളില്‍ ഇന്നത്തെ യാത്രാസൗകര്യങ്ങള്‍ ഉപയോഗിച്ചു ദിവസേന വന്നുപോകുക പ്രയാസമാണ്. വേഗമേറിയ പൊതുയാത്രാ മാര്‍ഗങ്ങള്‍ ലഭ്യമാണെങ്കില്‍ ഇത്തരം നഗരകേന്ദ്രീകൃത തൊഴിലിടങ്ങള്‍ സ്ത്രീകള്‍ക്ക് കൂടുതല്‍ പ്രാപ്യമാകും.

വി ടി ഭട്ടതിരിപ്പാടിന്റെ ‘അടുക്കളയില്‍നിന്നും അരങ്ങത്തേക്ക്’ എന്ന നാടകം അന്നത്തെ സമൂഹത്തില്‍ പ്രകമ്പനങ്ങള്‍ സൃഷ്ടിച്ചു. ഒരുകൂട്ടം സ്ത്രീകള്‍ ചേര്‍ന്ന് എഴുതുകയും അവതരിപ്പിക്കുകയുംചെയ്ത ‘തൊഴില്‍ കേന്ദ്രത്തിലേക്ക്’ എന്ന നാടകം അകത്തളങ്ങളില്‍ തളച്ചിടപ്പെട്ട സ്ത്രീസമൂഹം ചങ്ങല പൊട്ടിച്ചു തൊഴിലിടങ്ങളിലേക്കും സ്വന്തം കാലില്‍ നില്‍ക്കാനുള്ള സ്വാതന്ത്ര്യത്തിലേക്കും കുതിച്ചതിന്റെ അടയാളമാണ്.

ആ കുതിപ്പുകൊണ്ട് സ്ത്രീകളില്‍ കുറച്ചുപേര്‍ അടുക്കളയില്‍നിന്ന് അരങ്ങത്തെത്തിയിട്ടുണ്ട്. അതിലുമെത്രയോ കൂടുതല്‍ പേര്‍ ഇനിയും അരങ്ങിലും മുഖ്യധാരയിലും എത്തേണ്ടതുണ്ട്. അവരുടെ മുന്നോട്ടുള്ള കുതിപ്പിന് പാതയൊരുക്കാന്‍ സില്‍വര്‍ ലൈനിന് കഴിയും.

നഗര, ഗ്രാമ വ്യത്യാസമോ പ്രായഭേദമോ ഇല്ലാതെ അഭ്യസ്തവിദ്യരായ സ്ത്രീകളുടെ തൊഴില്‍ പങ്കാളിത്തം, സഞ്ചാരസ്വാതന്ത്ര്യം എന്നിവയെ വിപുലീകരിക്കുന്നതിലൂടെ അവരുടെ ജീവിതസ്വപ്നങ്ങള്‍ക്ക് വെള്ളിവെളിച്ചം പകരാന്‍ ഈ വെള്ളിപ്പാതയ്ക്കാകും.

പദ്ധതി എങ്ങനെ നടപ്പാക്കണമെന്നതു സംബന്ധിച്ച് ചര്‍ച്ചകളും ഭിന്നാഭിപ്രായങ്ങളുമെല്ലാം സ്വാഗതാര്‍ഹമാണ് . എന്നാല്‍, മുന്‍വിധിയോടെ കണ്ണടച്ച് എതിര്‍ക്കുന്നവരോട് അവരുടെ എതിര്‍പ്പില്‍ ഒരു സ്ത്രീവിരുദ്ധതകൂടിയുണ്ടെന്ന് പറയേണ്ടിവരും.

ഡോ. ജോ ജോസഫ്

More News

കുവൈറ്റ് സിറ്റി: കുവൈറ്റിലെ ഇന്ത്യൻ എംബസി, കുവൈറ്റിലെ വിവിധ ഇന്ത്യൻ ഹൈപ്പർമാർക്കറ്റുകളുമായും ടെക്സ്റ്റൈൽ സ്റ്റോറുകളുമായും സഹകരിച്ച് ദേശീയ കൈത്തറി ദിനം ആഘോഷിച്ചു. സ്ഥാനപതി സിബി ജോര്‍ജ് നേതൃത്വം നല്‍കി. ഇന്ത്യയിലെ ഊർജ്ജസ്വലമായ കൈത്തറി വ്യവസായം ഇന്ത്യയുടെ സാംസ്കാരിക സമ്പന്നതയെയും വൈവിധ്യത്തെയും പ്രതിഫലിപ്പിക്കുന്നു. ഇന്ത്യൻ കൈത്തറി പുരാതന കാലം മുതൽ അറിയപ്പെടുന്നു. ഇന്ത്യയിലെ കൈത്തറി വ്യവസായത്തിന് മികച്ച കരകൗശലത്തിന്റെ ഒരു നീണ്ട പാരമ്പര്യമുണ്ട്. ഇന്ത്യയിലെ ഓരോ പ്രദേശത്തിനും അതിന്റേതായ ടെക്സ്റ്റൈൽ പാരമ്പര്യമുണ്ട്. വൈവിധ്യമാര്‍ന്ന തരത്തില്‍ കൈത്തറി ഇന്ത്യയിലെ എല്ലാ […]

ബര്‍മിങ്ഹാം: കോമണ്‍വെല്‍ത്ത് ഗെയിംസില്‍ ഇന്ത്യയ്ക്ക് പതിനെട്ടാം സ്വര്‍ണം. ടേബിള്‍ ടെന്നീസ് മിക്‌സഡ് ഡബിള്‍സിലാണ് ഇന്ത്യയുടെ നേട്ടം. ശരത് കമല്‍-ശ്രീജ അകുല സഖ്യം ഫൈനലില്‍ മലേഷ്യയെ 3-1ന് പരാജയപ്പെടുത്തിയാണ് സ്വര്‍ണം സ്വന്തമാക്കിയത്.

ജിദ്ദ: മൂന്ന് വർഷങ്ങൾക്ക് മുമ്പ് ഇന്ത്യൻ ഭരണഘടനയിൽ നിന്ന് ജമ്മു കശ്മീരിന് പ്രത്യേക പദവി നൽകുന്ന ആർട്ടിക്കിൾ 370 എടുത്തുകളയുകയും ജമ്മു കശ്മീർ, ലഡാക്ക് എന്നിങ്ങനെ കേന്ദ്രഭരണ പ്രദേശമാക്കി പുനഃക്രമീകരിക്കുകയും ചെയ്ത ശേഷം അവിടെയുണ്ടായിക്കൊണ്ടിരിക്കുന്ന വികസനപരവും ജനോപകാരപ്രദവുമായ കാര്യങ്ങൾ ഉയർത്തിക്കാട്ടി ജിദ്ദയിൽ അരങ്ങേറിയ “കശ്മീർ വെബിനാർ” കേന്ദ്രത്തിലെ എൻ ഡി എ സർക്കാർ കൈകൊണ്ട ചരിത്രപരമായ തീരുമാനം കശ്‌മീരിനും കാശ്മീരികൾക്കും വലിയ അനുഗ്രഹമായെന്ന് സമർത്ഥിച്ചു. ജമ്മു കശ്മീരിൽ ഉണ്ടായിക്കൊണ്ടിരിക്കുന്ന വിവിധ മേഖലകളിലെ വികസനങ്ങളും അതുവഴി ജനങ്ങളുടെ സമീപനങ്ങളിൽ […]

എഡ്ജ്ബാസ്റ്റണ്‍: കോമണ്‍വെല്‍ത്ത് ഗെയിംസ് വനിതാ ക്രിക്കറ്റില്‍ ഫൈനല്‍ പോരാട്ടത്തില്‍ ഇന്ത്യയെ പരാജയപ്പെടുത്തി ഓസ്‌ട്രേലിയ സ്വര്‍ണം സ്വന്തമാക്കി. അവസാന നിമിഷം വരെ ഇന്ത്യയ്ക്ക് വിജയപ്രതീക്ഷയുണ്ടായിരുന്ന മത്സരം, ഒടുവില്‍ ഓസീസ് ബൗളര്‍മാര്‍ പിടിച്ചെടുക്കുകയായിരുന്നു. സ്‌കോര്‍: ഓസ്‌ട്രേലിയ 20 ഓവറില്‍ എട്ട് വിക്കറ്റിന് 161, ഇന്ത്യ 19.3 ഓവറില്‍ 152 ഓള്‍ ഔട്ട്. 41 പന്തില്‍ 61 റണ്‍സെടുത്ത ബെത്ത് മൂണിയാണ് ഓസ്‌ട്രേലിയയെ മികച്ച സ്‌കോറിലെത്തിച്ചത്. ഇന്ത്യയ്ക്ക് വേണ്ടി രേണുക സിങും, സ്‌നേഹ് റാണയും രണ്ട് വിക്കറ്റ് വീതവും, ദീപ്തി ശര്‍മയും, […]

തിരുവനന്തപുരം: കേശവദാസപുരത്ത് 60കാരിയെ മരിച്ച നിലയില്‍ കണ്ടെത്തി. മനോരമ എന്ന സ്ത്രീയാണ് മരിച്ചത്. സമീപത്തെ വീട്ടിലെ കിണറ്റില്‍ നിന്നാണ് മൃതദേഹം കണ്ടെത്തിയത്. ഇവരെ കാണാനില്ലെന്ന പരാതിയെ തുടർന്ന് നടത്തിയ തെരച്ചിലിനിടെയാണ് മൃതദേഹം കിട്ടിയത്. കാലുകൾ കെട്ടിയിട്ട നിലയിലായിരുന്നു മൃതദേഹം. ഇവരുടെ വീടിന് സമീപത്ത് താമസിച്ചിരുന്ന ഒരു ഇതരസംസ്ഥാന തൊഴിലാളിയെ കാണാതായിട്ടുണ്ട്. ഇയാൾക്ക് ഒപ്പം താമസിക്കുന്ന മൂന്ന് പേർ പൊലീസ് കസ്റ്റഡിയിലാണ്.

ഫ്‌ളോറിഡ: അഞ്ചാം ടി20യില്‍ വിന്‍ഡീസിനെ 88 റണ്‍സിന് തകര്‍ത്ത് ഇന്ത്യ 4-1ന് പരമ്പര സ്വന്തമാക്കി. ടോസ് നേടി ബാറ്റിങ് തിരഞ്ഞെടുത്ത ഇന്ത്യ 20 ഓവറില്‍ ഏഴ് വിക്കറ്റിന് 188 റണ്‍സെടുത്തു. വിന്‍ഡീസ് 15.4 ഓവറില്‍ 100 റണ്‍സിന് പുറത്തായി. 40 പന്തില്‍ 64 റണ്‍സെടുത്ത ശ്രേയസ് അയ്യരാണ് ഇന്ത്യയുടെ ടോപ് സ്‌കോറര്‍. ഇഷന്‍ കിഷന്‍-11, ദീപക് ഹൂഡ-38, സഞ്ജു സാംസണ്‍-15, ഹാര്‍ദ്ദിക് പാണ്ഡ്യ-28, ദിനേശ് കാര്‍ത്തിക്-12, അക്‌സര്‍ പട്ടേല്‍-9, ആവേശ് ഖാന്‍-1 നോട്ടൗട്ട് എന്നിങ്ങനെയാണ് മറ്റുള്ളവരുടെ പ്രകടനം. […]

പട്‌ന: എന്‍ഡിഎയുമായി പിണങ്ങി നില്‍ക്കുന്ന ബിഹാര്‍ മുഖ്യമന്ത്രിയും ജെഡിയു നേതാവുമായ നിതീഷ് കുമാര്‍ സോണിയാ ഗാന്ധി അടക്കമുള്ള പ്രതിപക്ഷ നേതാക്കളുമായി സംസാരിച്ചതായി റിപ്പോര്‍ട്ട്. ഇതിന് പിന്നാലെ ജെഡിയു എംപിമാരെ നിതീഷ് പട്‌നയിലേക്ക് വിളിപ്പിച്ചു. ബിഹാറിലെ രാഷ്ട്രീയ വിഷയങ്ങളെ ചൊല്ലി എന്‍ഡിഎയുമായി ഇടഞ്ഞു നില്‍ക്കുകയാണ് ജെഡിയു. ഇന്ന് പ്രധാനമന്ത്രിയുടെ അധ്യക്ഷതയിൽ വിളിച്ചു ചേർത്ത നിതി ആയോഗ് യോഗത്തിൽ നിന്നടക്കം അദ്ദേഹം വിട്ടു നിന്നിരുന്നു.

കുവൈറ്റ് സിറ്റി: വ്യാഴം, ശനി ഗ്രഹങ്ങളുടെ അപൂര്‍വ സംഗമത്തിന് ഇന്ന് കുവൈറ്റ് സാക്ഷിയാകും. രാത്രി 10 മുതല്‍ സൂര്യോദയം വരെയുള്ള സമയങ്ങളിലാണ് ഈ അപൂര്‍വ പ്രപഞ്ച വിസ്മയത്തിന് കുവൈറ്റിന്റെ ആകാശം സാക്ഷിയാവുകയെന്ന് അൽ ഉഐജീരി സയന്റിഫിക്‌ സെന്റർ അറിയിച്ചു. നഗ്ന നേത്രങ്ങൾ കൊണ്ട്‌ ഇത് കാണാം. കാഴ്ചയില്‍ ഇരു ഗ്രഹങ്ങളും ചേർന്ന് നിൽക്കുന്നതായി തോന്നാമെങ്കിലും ഏകദേശം 60 കോടി കിലോമീറ്ററുകൾ അകലെയാണു ഇവ തമ്മിലുള്ള ദൂരം എന്ന് കേന്ദ്രത്തിലെ പബ്ലിക് റിലേഷൻസ് ആൻഡ് മീഡിയ ഡയറക്ടർ ഖാലിദ് […]

കോഴിക്കോട്: പന്തിരിക്കരയില്‍ സ്വര്‍ണ്ണക്കടത്ത് സംഘം തട്ടിക്കൊണ്ടുപോയി കൊലപ്പെടുത്തിയ ഇര്‍ഷാദിന്‍റെ മൃതദേഹാവശിഷ്ടം ബന്ധുക്കൾ ഏറ്റുവാങ്ങി സംസ്ക്കരിച്ചു.  മേപ്പയൂർ സ്വദേശി ദീപക്കിന്‍റേതെന്ന് കരുതി ബന്ധുക്കൾ ഏറ്റുവാങ്ങി സംസ്കരിച്ച മൃതദേഹമാണ് ഇർഷാദിന്‍റേതാണെന്ന് തെളിഞ്ഞതിനെ തുടർന്ന് ബന്ധുക്കള്‍ക്ക് കൈമാറിയത്. കാണാതായ ദീപക്കിന്റേതെന്ന് കരുതി ഇർഷാദിന്റെ മൃതദേഹം ബന്ധുക്കൾ സംസ്കരിച്ചിരുന്നു. എന്നാൽ ഡി എൻ എ പരിശോധനയിൽ മൃതദേഹം ദീപക്കിന്റേതല്ലെന്നും ഇർഷാദിന്റേതാണെന്നും വ്യക്തമായി. പിന്നാലെയാണ് വടകര ആർ ഡി ഒയുടെ നേൃത്വത്തിൽ ഇർഷാദിന്റെ മൃതദേഹാവശിഷ്ടങ്ങൾ ബന്ധുക്കൾക്ക് കൈമാറിയത്.

error: Content is protected !!