40 ശതമാനം സീറ്റ് വനിതകള്‍ക്ക്! യുപി നിയമസഭ തിരഞ്ഞെടുപ്പില്‍ സുപ്രധാന പ്രഖ്യാപനവുമായി കോണ്‍ഗ്രസ്‌

ലഖ്‌നൗ: ഉത്തർപ്രദേശ് നിയമസഭാ തിരഞ്ഞെടുപ്പിൽ പാർട്ടി 40 ശതമാനം ടിക്കറ്റുകൾ സ്ത്രീകൾക്ക് നൽകുമെന്ന് കോൺഗ്രസ് നേതാവ് പ്രിയങ്ക ഗാന്ധി. യുപിയില്‍ വനിതാശക്തി ഉയരണം. വെറുപ്പിന്‍റെ രാഷ്ട്രീയം വനിതാ നേതാക്കള്‍ ഇല്ലാതാക്കുമെന്നും പ്രിയങ്ക വ്യക്തമാക്കി.

സ്​ത്രീകൾക്ക്​ കൂടുതൽ പ്രാതിനിധ്യം നൽകാനുള്ള തീരുമാനം,​ ഉന്നാവോയിൽ ബലാംത്സംഗം ചെയ്യപ്പെട്ട പെൺകുട്ടിക്കും, ഹഥ്രസിൽ നീതി ലഭിക്കാതെ പോയ പെൺകുട്ടിക്കും, ലഖിംപൂർ ഖേരിയിൽ വെച്ച്​ കണ്ടപ്പോൾ ഇന്ത്യൻ പ്രധാനമന്ത്രിയാക​ണമെന്ന്​ ആഗ്രഹം പറഞ്ഞ പെൺകുട്ടികൾക്കും വേണ്ടിയാണ്. യുപി പുരോഗമിക്കണം എന്ന് ആഗ്രഹിക്കുന്ന ഓരോ പെൺകുട്ടികൾക്കും വേണ്ടിയാണ്- പ്രിയങ്ക പറഞ്ഞു.

ലഖ്‌നൗവില്‍ വാര്‍ത്താസമ്മേളനത്തിലാണു പ്രിയങ്ക നിര്‍ണായക പ്രഖ്യാപനം നടത്തിയത്. യുപി തിരഞ്ഞെടുപ്പ് പ്രചാരണത്തിൽ ഇത്തവണ കോൺഗ്രസിന്റെ മുഖം പ്രിയങ്കയായിരിക്കുമെന്ന് മുതിര്‍ന്ന നേതാവ് പി.എല്‍.പുനിയ എംപി പറഞ്ഞു.