സമാജ്‌വാദി പാര്‍ട്ടി അധികാരത്തിലെത്തുമെന്ന് ഭഗവാന്‍ കൃഷ്ണന്‍ സ്വപ്‌നത്തില്‍ വന്ന് പറഞ്ഞതായി അഖിലേഷ് യാദവ്; മധുരയ്ക്കും വൃന്ദാവനും വേണ്ടി ഒന്നും ചെയ്യാത്തവരെ കൃഷ്ണന്‍ ശപിക്കുമെന്ന് യോഗി ആദിത്യനാഥ്: യുപി തിരഞ്ഞെടുപ്പില്‍ സര്‍വം 'കൃഷ്ണമയം'!

ലഖ്‌നൗ: ഉത്തര്‍പ്രദേശ് നിയമസഭ തിരഞ്ഞെടുപ്പില്‍ സമാജ്‌വാദി പാര്‍ട്ടി അധികാരത്തിലെത്തുമെന്ന് ഭഗവാന്‍ കൃഷ്ണന്‍ തന്നോട് സ്വപ്‌നത്തില്‍ വന്ന് പറഞ്ഞതായി അഖിലേഷ് യാദവ്. തന്റെ പാർട്ടി അധികാരത്തിൽ വരുന്ന ദിവസം സംസ്ഥാനത്ത് ‘രാമരാജ്യം’ സ്ഥാപിക്കുമെന്നും യാദവ് പറഞ്ഞു.

"രാമരാജ്യത്തിലേക്കുള്ള വഴി സമാജ്വാദിന്റെ (സോഷ്യലിസത്തിന്റെ) പാതയിലൂടെയാണ്. 'സമാജ്വാദ്' സ്ഥാപിതമായ ദിവസം, സംസ്ഥാനത്ത് "രാമരാജ്യം" സ്ഥാപിക്കും," അഖിലേഷ് യാദവ് അദ്ദേഹം പറഞ്ഞു.

“നമ്മുടെ സർക്കാർ (യുപിയിൽ) വരുമെന്ന് എന്നോട് പറയാൻ ഭഗവാൻ ശ്രീകൃഷ്ണൻ എല്ലാ രാത്രിയും എന്റെ സ്വപ്നങ്ങളിൽ വരുന്നു.

ഉത്തർപ്രദേശ് മുഖ്യമന്ത്രിയെന്ന നിലയിൽ യോഗി ആദിത്യനാഥ് പരാജയപ്പെട്ടു. ബിജെപി തങ്ങളുടെ എല്ലാ കുറ്റവാളികളെയും മാഫിയ ഘടകങ്ങളെയും ശുദ്ധീകരിക്കാൻ ഒരു വാഷിംഗ് മെഷീൻ കൊണ്ടുവന്നിട്ടുണ്ടോ എന്ന് ഞാൻ അത്ഭുതപ്പെടുന്നു. ” യാദവ് കൂട്ടിച്ചേർത്തു.

അതേസമയം, അധികാരത്തിലിരുന്നപ്പോള്‍ തനിക്കുവേണ്ടി ഒന്നും ചെയ്യാത്തവരെ ഭഗവാന്‍ ശ്രീകൃഷ്ണന്‍ ശപിക്കുന്നുണ്ടാകുമെന്ന് യു.പി മുഖ്യമന്ത്രി യോഗി ആദിത്യനാഥ് പറഞ്ഞു.

'ചിലരുടെ സ്വപ്‌നത്തില്‍ വന്ന് നിങ്ങളുടെ പരാജയമോര്‍ത്ത് കരയാന്‍ ഭഗവാന്‍ കൃഷ്ണന്‍ പറഞ്ഞിട്ടുണ്ടാകും. നിങ്ങള്‍ക്ക് ചെയ്യാന്‍ സാധിക്കാതിരുന്നത് ബിജെപി സര്‍ക്കാര്‍ ചെയ്തു. അധികാരത്തിലിരുന്നപ്പോള്‍ മധുരയ്ക്കും വൃന്ദാവനും വേണ്ടി ഒന്നും ചെയ്യാതിരുന്നതിന് അവരെ ഭഗവാന്‍ കൃഷ്ണന്‍ ശപിച്ചിട്ടുമുണ്ടാകും', ആദിത്യനാഥ് പറഞ്ഞു. അഖിലേഷ് യാദവിന്റെ പേരെടുത്ത് പറയാതെയായിരുന്നു ആദിത്യനാഥിന്‍റെ വിമര്‍ശനം.