പോക്‌സോ കേസിലെ പ്രതിയെ ഇരയുടെ പിതാവ് വെടിവെച്ച് കൊന്നു

ലഖ്‌നൗ: പോക്‌സോ കേസിലെ പ്രതിയെ ഇരയുടെ പിതാവ് വെടിവെച്ച് കൊന്നു. വെള്ളിയാഴ്ച ഉച്ചയോടെ ഉത്തര്‍പ്രദേശിലെ ഗോരഖ്പൂര്‍ കളക്ടറേറ്റിന് സമീപത്തെ കോടതി പരിസരത്തായിരുന്നു സംഭവം. ബിഹാര്‍ സ്വദേശിയായ ദില്‍ഷാദ് ഹുസൈനെയാണ് കേസിലെ ഇരയായ പെണ്‍കുട്ടിയുടെ പിതാവ് വെടിവെച്ച് കൊലപ്പെടുത്തിയത്.

2020 ഫെബ്രുവരിയില്‍ പെണ്‍കുട്ടിയുടെ വീടിനടുത്ത് സൈക്കിള്‍ റിപ്പയര്‍ ഷോപ്പ് നടത്തിയിരുന്ന ദില്‍ഷാദ് പെണ്‍കുട്ടിയെ തട്ടിക്കൊണ്ടുപോയിരുന്നു. പെണ്‍കുട്ടിയുടെ പിതാവ് പരാതി നല്‍കിയതോടെ മാര്‍ച്ച് 12-ന് പ്രതിയെ ഹൈദരാബാദില്‍ നിന്ന് പിടികൂടി. റിമാന്‍ഡിലായിരുന്ന പ്രതിക്ക് പിന്നീട് ജാമ്യം ലഭിച്ചു.

കേസിന്റെ വിചാരണയ്ക്കായാണ് ദില്‍ഷാദ് കഴിഞ്ഞ ദിവസം കോടതിയില്‍ എത്തിയത്. ഇവിടെ വച്ച് പ്രതിയെ കണ്ട പെണ്‍കുട്ടിയുടെ പിതാവ് വെടി വയ്ക്കുകയായിരുന്നു. ഇയാളെ പൊലീസ് അറസ്റ്റു ചെയ്തു.