ചരൺജിത് സിംഗ് ചന്നി പഞ്ചാബ് തെരഞ്ഞെടുപ്പിൽ രണ്ട് സീറ്റുകളിലും തോൽക്കും; ആം ആദ്മി പാര്‍ട്ടിയുടെ സര്‍വേയിലെ കണ്ടെത്തലുകള്‍ പങ്കുവച്ച് അരവിന്ദ് കെജ്‌രിവാളിന്റെ അവകാശവാദം

ന്യൂഡൽഹി: പഞ്ചാബ് മുഖ്യമന്ത്രി ചരൺജിത് സിംഗ് ചന്നി സംസ്ഥാന തിരഞ്ഞെടുപ്പിൽ രണ്ട് നിയമസഭാ മണ്ഡലങ്ങളിൽ നിന്നും പരാജയപ്പെടുമെന്ന് ഡൽഹി മുഖ്യമന്ത്രിയും ആം ആദ്മി പാർട്ടി (എഎപി) തലവനുമായ അരവിന്ദ് കെജ്‌രിവാൾ.

"ചാംകൗർ സാഹിബ്, ബദൗർ എന്നീ രണ്ട് സീറ്റുകളിൽ നിന്നാണ് ചന്നി മത്സരിക്കുന്നത്. ഞങ്ങൾ മൂന്ന് തവണ സർവേ നടത്തി, രണ്ട് സീറ്റുകളിൽ നിന്നും ചാന്നി സാഹിബ് ദയനീയമായി പരാജയപ്പെടുമെന്ന് കണ്ടെത്തി", പഞ്ചാബിലെ അമൃത്‌സറിൽ നടത്തിയ വാർത്താ സമ്മേളനത്തിൽ കെജ്‌രിവാൾ പറഞ്ഞു.

ചാംകൗറിൽ തന്റെ പാർട്ടിക്ക് 52 ശതമാനം വോട്ടും ചാന്നിക്ക് 35 ശതമാനം വോട്ടും ലഭിക്കുമെന്ന് കെജ്‌രിവാൾ പറഞ്ഞു. ബദൗറിൽ എഎപിക്ക് 48 ശതമാനം വോട്ടും ചന്നിക്ക് 30 ശതമാനം വോട്ടും ലഭിക്കുമെന്ന് സർവേ ഉദ്ധരിച്ച് കെജ്‌രിവാൾ അവകാശപ്പെട്ടു.

തങ്ങളുടെ മുഖ്യമന്ത്രി സ്ഥാനാര്‍ത്ഥി ഭഗവന്ത് മാൻ തിരഞ്ഞെടുപ്പിൽ വിജയിച്ചതിന് ശേഷം മണൽ ഖനനത്തെക്കുറിച്ച് “ന്യായമായ അന്വേഷണം” നടത്തുമെന്നും എഎപി നേതാവ് പറഞ്ഞു.

“ചന്നി സ്വയം അന്വേഷണം നടത്തി. ഭഗവന്ത് മാൻ മുഖ്യമന്ത്രിയായാൽ മണൽ ഖനനത്തിൽ നീതിയുക്തമായ അന്വേഷണം നടത്തും. പണമെല്ലാം ചന്നിയുടേതാണെന്ന് ബന്ധു കുറ്റസമ്മതം നടത്തിയപ്പോൾ എന്തുകൊണ്ടാണ് ഇഡി അറസ്റ്റ് ചെയ്യാത്തത്? കെജ്രിവാൾ ചോദിച്ചു.

ചാംകൗർ സാഹിബ് അസംബ്ലി മണ്ഡലത്തിലെ അനധികൃത ഖനന ആരോപണത്തിൽ ശനിയാഴ്ച ചന്നിക്ക് ക്ലീൻ ചിറ്റ് ലഭിച്ചിരുന്നു. തുടര്‍ന്ന് ആരോപണമുന്നയിച്ച കെജ്‌രിവാളിനെ ചന്നി "നുണയൻ" എന്ന് വിളിക്കുകയും ചെയ്തു. "അരവിന്ദ് കെജ്‌രിവാൾ ഒരു നുണയനാണ്... എനിക്കെതിരെ നിരവധി ആരോപണങ്ങൾ ഉന്നയിക്കാൻ ശ്രമിച്ചു, പക്ഷേ ഒന്നും സത്യമായിരുന്നില്ല... അവർ ഗവർണറോട് (എനിക്കെതിരെ) പരാതി നൽകി, അദ്ദേഹം അന്വേഷണത്തിന് ഉത്തരവിട്ടു. സത്യം ജയിക്കുന്നു," ചന്നി പറഞ്ഞു.