യുക്രൈന്‍ രക്ഷാദൗത്യത്തിന് പേരുനല്‍കി കേന്ദ്രസര്‍ക്കാര്‍, 'ഓപ്പറേഷന്‍ ഗംഗ'; 250 യാത്രക്കാരുമായുള്ള രണ്ടാമത്തെ സംഘം പുറപ്പെട്ടു

ന്യൂഡല്‍ഹി: റഷ്യന്‍ ആക്രമണം നേരിടുന്ന യുക്രൈനില്‍ കുടുങ്ങി കിടക്കുന്ന ഇന്ത്യക്കാരെ നാട്ടില്‍ എത്തിക്കുന്നതിനുള്ള ദൗത്യത്തിന് ഓപ്പറേഷന്‍ ഗംഗ എന്ന പേരുനല്‍കി കേന്ദ്രസര്‍ക്കാര്‍. 219 യാത്രക്കാരുമായി റുമാനിയയിലെ ബുക്കാറസ്റ്റില്‍ നിന്ന് പുറപ്പെട്ട എയര്‍ഇന്ത്യ വിമാനം മുംബൈയില്‍ പറന്നിറങ്ങിയതോടെ കേന്ദ്രസര്‍ക്കാരിന്റെ ആദ്യ ദൗത്യം വിജയകരമായി.

സുരക്ഷിതമായി നാട്ടില്‍ തിരിച്ചെത്തിച്ച കേന്ദ്രസര്‍ക്കാരിനോട് വിദ്യാര്‍ഥികള്‍ നന്ദി പറഞ്ഞു. വിദ്യാര്‍ഥികളെ സ്വീകരിക്കാന്‍ കേന്ദ്രമന്ത്രി പീയുഷ് ഗോയലിന്റെ നേതൃത്വത്തിലുള്ള സംഘം മുംബൈ വിമാനത്താവളത്തില്‍ എത്തിയിരുന്നു.അതിനിടെ ബുക്കാറസ്റ്റില്‍ നിന്ന് രണ്ടാമത്തെ സംഘത്തെയും വഹിച്ചു കൊണ്ടുള്ള വിമാനം പറന്നുയര്‍ന്നു. 250 യാത്രക്കാരുമായി പുറപ്പെട്ട വിമാനം പുലര്‍ച്ചെ ഡല്‍ഹിയില്‍ പറന്നിറങ്ങുമെന്നാണ് റിപ്പോര്‍ട്ടുകള്‍.