ബ്രാഞ്ച് സെക്രട്ടറിമാര്‍ക്ക് 45 വയസ്, ജില്ലാ സെക്രട്ടറിമാര്‍ക്ക് 60 വയസ്, ദേശീയ കൗണ്‍സിലില്‍ 75 വയസ്! പ്രായപരിധി ഏര്‍പ്പെടുത്താന്‍ സിപിഐ; കോണ്‍ഗ്രസ് സഖ്യത്തിന് തയ്യാര്‍, യുദ്ധത്തിന് കാരണക്കാര്‍ നാറ്റോയാണെന്നും റഷ്യയുടെ നടപടി തെറ്റാണെന്നും ഡി രാജ

ന്യൂഡൽഹി: സിപിഐയിലും പ്രായപരിധി ഏർപ്പെടുത്താൻ തീരുമാനം. സിപിഐ ദേശീയ കൗണ്‍സില്‍ അംഗങ്ങൾക്ക് 75 വയസ്സായും ബ്രാഞ്ച് സെക്രട്ടറിമാർക്ക് 45 വയസ്സായും ജില്ലാ സെക്രട്ടറിമാർക്ക് 60 വയസ്സായും പ്രായപരിധി ഏർപ്പെടുത്തും.

അഖിലേന്ത്യാടിസ്ഥാനത്തിൽ കോൺഗ്രസുമായി സഖ്യത്തിന് വാതിലുകൾ തുറന്നിട്ടിരിക്കുകയാണെന്നും പ്രാദേശിക തലത്തിൽ നിലവിൽ സഹകരണമുണ്ടെന്നും സിപിഐ ദേശീയ ജനറൽ സെക്രട്ടറി ഡി രാജ പറഞ്ഞു. ദേശീയതലത്തിൽ സഖ്യത്തിന് വാതിലുകൾ തുറന്നു കിടക്കുകയാണ്.

എല്ലാ മതേതര ജനാധിപത്യ കക്ഷികളും തെരഞ്ഞെടുപ്പ് ഫലത്തെ കുറിച്ച് ഗൗരവമായി വിലയിരുത്തണം. ബിജെപിയെ തോൽപ്പിക്കാൻ കോൺഗ്രസ് ഉൾപ്പെട്ട വിശാല മതേതര കൂട്ടായ്മ ആവശ്യമാണ്. പി എഫ് പലിശ നിരക്ക് കുറച്ച നടപടി സർക്കാർ പിൻവലിക്കണമെന്നും അദ്ദേഹം ആവശ്യപ്പെട്ടു.

യുദ്ധത്തിന് കാരണക്കാര്‍ നാറ്റോയാണെന്നും റഷ്യയുടെ നടപടി തെറ്റാണെന്നും യുക്രെയ്‌നടക്കം യുദ്ധത്തില്‍ നിന്ന് പിന്മാറണമെന്നും അദ്ദേഹം ആവശ്യപ്പെട്ടു.