ജൂണിനുശേഷം ലോകത്തെ മാന്ദ്യം ബാധിച്ചേക്കാം, ഇന്ത്യയെ ബാധിക്കാതിരിക്കാന്‍ കേന്ദ്രം നടത്തുന്നത് ഊര്‍ജ്ജിത ശ്രമങ്ങള്‍: മന്ത്രി നാരായണ്‍ റാണെ

ന്യൂഡല്‍ഹി: ജൂണിനുശേഷം ലോകത്തെ മാന്ദ്യം ബാധിക്കുമെന്ന് കേന്ദ്ര ചെറുകിട, ഇടത്തരം വ്യവസായ മന്ത്രി നാരായൺ റാണെ. മാന്ദ്യം ഇന്ത്യയിലെ ജനങ്ങളെ ബാധിക്കാതിരിക്കാൻ കേന്ദ്രം ശ്രമിക്കുകയാണെന്നും അദ്ദേഹം പറഞ്ഞു.

"ആഗോളം മാന്ദ്യം പല രാജ്യങ്ങളിലും ഉണ്ട്. കേന്ദ്രസര്‍ക്കാരിന്റെ യോഗങ്ങളിലെ ചര്‍ച്ചയില്‍ നിന്നാണ് ഈ വിവരം ശേഖരിച്ചത്. ജൂണിനുശേഷം മാന്ദ്യം ഇന്ത്യയെ ബാധിക്കുമെന്ന് പ്രതീക്ഷിക്കുന്നു''-മന്ത്രി പറഞ്ഞു.

നിലവിൽ, വിവിധ വികസിത രാജ്യങ്ങൾ മാന്ദ്യം നേരിടുന്നുണ്ടെന്നത് ഒരു വസ്തുതയാണ്. ജൂണിനുശേഷം മാന്ദ്യം വരുമെന്ന് പ്രതീക്ഷിക്കുന്നു. മാന്ദ്യം രാജ്യത്തെ പൗരന്മാരെ ബാധിക്കാതിരിക്കാൻ കേന്ദ്രം ശ്രമിക്കുകയാണെന്നും മന്ത്രി വ്യക്തമാക്കി. മഹാരാഷ്ട്രയിലെ പൂനെയിൽ ദ്വിദിന ജി20 ഇൻഫ്രാസ്ട്രക്ചർ വർക്കിംഗ് ഗ്രൂപ്പ് (ഐഡബ്ല്യുജി) യോഗത്തിൽ പങ്കെടുക്കുകയായിരുന്നു നാരായൺ റാണെ.

മേഖലയിൽ തൊഴിലവസരങ്ങൾ സൃഷ്ടിക്കാൻ കഴിയുന്ന വ്യവസായങ്ങൾ കൊണ്ടുവരാനുള്ള ശ്രമങ്ങൾ നടക്കുന്നുണ്ടെന്ന് റാണെ പറഞ്ഞു. ദീർഘകാലവും സുസ്ഥിരവുമായ സാമ്പത്തിക വളർച്ചയ്ക്ക് ജി20 യോഗം നിർണായകമാണെന്ന് അദ്ദേഹം അഭിപ്രായപ്പെട്ടു.

2022 ഡിസംബർ 1 മുതൽ 2023 നവംബർ 30 വരെയാണ് നിലവിൽ ഇന്ത്യ ജി20 അധ്യക്ഷസ്ഥാനം വഹിക്കുന്നത്. ഇന്ത്യയുടെ G20 അധ്യക്ഷതയ്ക്ക് കീഴില്‍ 2023 ലെ ഇൻഫ്രാസ്ട്രക്ചർ അജണ്ട ചർച്ച ചെയ്യുന്നതിനായി ഐഡബ്ല്യുജി അംഗരാജ്യങ്ങളിൽ നിന്നും അതിഥി രാജ്യങ്ങളിൽ നിന്നും അന്താരാഷ്ട്ര സംഘടനകളിൽ നിന്നുമുള്ള 65 പ്രതിനിധികൾ പൂനെയിൽ എത്തും.

“പല വികസിത രാജ്യങ്ങളും ഇതിൽ പങ്കെടുക്കുന്നുണ്ട്. നമുക്കും ഒരു വികസിത രാജ്യമാകണം. നമ്മുടെ പ്രധാനമന്ത്രിയെ ഓർത്ത് ഞങ്ങൾ അഭിമാനിക്കുന്നു. കഴിഞ്ഞ എട്ട് വർഷത്തിനുള്ളിൽ, അടിസ്ഥാന സൗകര്യ വികസനത്തിലും മറ്റ് മേഖലകളിലും നമ്മുടെ രാജ്യം വിവിധ രാജ്യങ്ങളുടെ ശ്രദ്ധ ആകർഷിച്ചു,” റാണെ പറഞ്ഞു.

സാമ്പത്തിക കാര്യ വകുപ്പും ധനമന്ത്രാലയവും ഇന്ത്യാ ഗവൺമെന്റും ചേർന്നാണ് പൂനെയിൽ യോഗം സംഘടിപ്പിക്കുന്നത്. ഓസ്‌ട്രേലിയയും ബ്രസീലും സഹ അധ്യക്ഷത വഹിക്കുന്നു. 'ഫിനാന്‍സിംഗ് സിറ്റീസ് ഓഫ് ടുമോറൊ: ഇന്‍ക്ലൂസീവ്, റീസൈലന്റ് & സസ്‌റ്റെയബിള്‍' എന്നതാണ് യോഗത്തിലെ നാളത്തെ വിഷയം.