ഇടംകൈയ്യന്‍ ബാറ്ററും ഇടംകൈയ്യന്‍ സ്പിന്നറുമായിരുന്ന മുൻ ഇന്ത്യൻ ഓൾറൗണ്ടർ സലിം ദുറാനി അന്തരിച്ചു

ഡല്‍ഹി: മുന്‍ ഇന്ത്യന്‍ ഓള്‍റൗണ്ടര്‍ സലിം ദുറാനി (88) ഗുജറാത്തിലെ ജാംനഗറിലെ വസതിയില്‍ അന്തരിച്ചു. ഇടംകൈയ്യന്‍ ബാറ്ററും ഇടംകൈയ്യന്‍ സ്പിന്നറുമായിരുന്നു ദുറാനി, 29 ടെസ്റ്റുകളില്‍ ഇന്ത്യയെ പ്രതിനിധീകരിച്ച് 1202 റണ്‍സും 75 വിക്കറ്റും നേടിയിട്ടുണ്ട്.

ആഭ്യന്തര ക്രിക്കറ്റില്‍ സൗരാഷ്ട്ര, രാജസ്ഥാന്‍, ഗുജറാത്ത് എന്നിവര്‍ക്ക് വേണ്ടി ദുരാനി രഞ്ജി ട്രോഫി കളിച്ചു. 1961-62ല്‍ ഇംഗ്ലണ്ടിനെതിരായ ഇന്ത്യയുടെ പരമ്പര വിജയത്തിലെ മികച്ച പ്രകടനത്തിലൂടെ അദ്ദേഹം ഏറ്റവും പ്രശസ്തനായിരുന്നു, കൊല്‍ക്കത്തയിലും ചെന്നൈയിലും എട്ട് വിക്കറ്റും 10 വിക്കറ്റും വീഴ്ത്തി.

ദുറാനി ക്രിക്കറ്റ് ഇതിഹാസമാണെന്ന് പ്രധാനമന്ത്രി നരേന്ദ്ര മോദി ട്വിറ്ററില്‍ കുറിച്ചു. 'സലിം ദുറാനി ജി ഒരു ക്രിക്കറ്റ് ഇതിഹാസമായിരുന്നു, ഒരു സ്ഥാപനമായിരുന്നു. ക്രിക്കറ്റ് ലോകത്ത് ഇന്ത്യയുടെ ഉയര്‍ച്ചയ്ക്ക് അദ്ദേഹം നിര്‍ണായക സംഭാവന നല്‍കി. കളിക്കളത്തിലും പുറത്തും അദ്ദേഹം തന്റെ ശൈലിക്ക് പേരുകേട്ടയാളായിരുന്നു. അദ്ദേഹത്തിന്റെ വിയോഗത്തില്‍ വേദനിക്കുന്നു. അദ്ദേഹത്തിന്റെ കുടുംബത്തിനും സുഹൃത്തുക്കള്‍ക്കും അനുശോചനം അറിയിക്കുന്നു. അദ്ദേഹത്തിന്റെ ആത്മാവിന് ശാന്തി നേരുന്നു.

സലിം ദുരാനി ജിക്ക് ഗുജറാത്തുമായി വളരെ പഴയതും ശക്തവുമായ ബന്ധമുണ്ടായിരുന്നു. സൗരാഷ്ട്രയ്ക്കും ഗുജറാത്തിനും വേണ്ടി ഏതാനും വര്‍ഷം കളിച്ചു. ഗുജറാത്തും അദ്ദേഹം സ്വന്തം വീടാക്കി. അദ്ദേഹവുമായി ഇടപഴകാന്‍ എനിക്ക് അവസരം ലഭിച്ചു, അദ്ദേഹത്തിന്റെ ബഹുമുഖ വ്യക്തിത്വത്തില്‍ ആഴത്തില്‍ മതിപ്പുളവാക്കി. പ്രധാനമന്ത്രി മോദി പോസ്റ്റ് ചെയ്തു.