'ആ രാത്രി എനിക്ക് ഉറങ്ങാന്‍ കഴിഞ്ഞില്ല, പുലര്‍ച്ചെ എഴുന്നേറ്റു'; വെളിപ്പെടുത്തലുമായി ശ്രേയസ് അയ്യര്‍

കാണ്‍പുര്‍: ന്യൂസീലന്‍ഡിനെതിരായ ഒന്നാം ടെസ്റ്റിന്റെ ആദ്യ ദിനത്തിലെ രാത്രിയില്‍ ഉറങ്ങാന്‍ കഴിഞ്ഞില്ലെന്ന് ഇന്ത്യന്‍ താരം ശ്രേയസ് അയ്യര്‍. രണ്ടാം ദിനം 75 റൺസുമായി ബാറ്റിങ് പുനരാരംഭിക്കുന്നതിനെക്കുറിച്ചുള്ള ചിന്ത, ഉറക്കം നഷ്ടമാക്കിയെന്നാണ് അയ്യരുടെ വെളിപ്പെടുത്തൽ.

രണ്ടാം ദിനത്തില്‍ സെഞ്ചുറി നേടിയ ശേഷം മാധ്യമപ്രവര്‍ത്തകരോട് സംസാരിക്കുമ്പോഴായിരുന്നു ശ്രേയസിന്റെ പ്രതികരണം. 'ആദ്യ ദിനം എല്ലാം നല്ല രീതിയില്‍ നടന്നതില്‍ അതിയായ സന്തോഷം. എന്നിട്ടും അന്നു രാത്രി ശരിക്ക് ഉറങ്ങാന്‍ പോലും പറ്റിയില്ല. പുലര്‍ച്ചെ അഞ്ചു മണിക്കുതന്നെ എഴുന്നേൽക്കുകയും ചെയ്തു. പക്ഷേ, സെഞ്ചുറി നേടാനായതോടെ സന്തോഷമായി’ – അയ്യർ പറഞ്ഞു.

ടെസ്റ്റ് ക്യാപ് സമ്മാനിക്കുമ്പോള്‍ ഇന്ത്യയുടെ മുന്‍ ക്യാപ്റ്റന്‍ സുനില്‍ ഗാവസ്‌കര്‍ എന്താണ് പറഞ്ഞതെന്നും ശ്രേയസ് വെളിപ്പെടുത്തി. ‘ഭാവിയേക്കുറിച്ച് അധികം ആലോചിക്കാതിരിക്കുക. ആസ്വദിച്ച് കളിക്കുക’ എന്നാണ് അദ്ദേഹം പറഞ്ഞത്’ – അയ്യർ വിശദീകരിച്ചു. കാണ്‍പുരില്‍ നടക്കുന്ന ഒന്നാം ടെസ്റ്റില്‍ അരങ്ങേറ്റം കുറിച്ച ശ്രേയസ് 105 റണ്‍സെടുത്ത് ഒന്നാം ഇന്നിങ്‌സില്‍ ഇന്ത്യയുടെ ടോപ്പ് സ്‌കോററായിരുന്നു.