ആര്‍സിബിയെ തോല്‍പിക്കാന്‍ ഹൈദരാബാദിന് ബാറ്റു ചെയ്യേണ്ടി വന്നത് എട്ട് ഓവര്‍ മാത്രം! ഒമ്പത് വിക്കറ്റിന്റെ തകര്‍പ്പന്‍ ജയം

മുംബൈ: ഐപിഎല്ലില്‍ ഇന്ന് നടന്ന മത്സരത്തില്‍ സണ്‍ റൈസേഴ്‌സ് ഹൈദരാബാദ് റോയല്‍ ചലഞ്ചേഴ്‌സ് ബാംഗ്ലൂരിനെ 9 വിക്കറ്റിന് പരാജയപ്പെടുത്തി. ആദ്യം ബാറ്റു ചെയ്ത ആര്‍സിബി 16.1 ഓവറില്‍ 68 റണ്‍സിന് പുറത്തായി. സണ്‍റൈസേഴ്‌സ് ഹൈദരാബാദ് 8 ഓവറില്‍ ഒരു വിക്കറ്റ് നഷ്ടത്തില്‍ വിജയലക്ഷ്യം മറികടന്നു.

15 റണ്‍സെടുത്ത സുയാഷ് പ്രഭുദേശായ് ആണ് ആര്‍സിബിയുടെ ടോപ് സ്‌കോറര്‍. ഫാഫ് ഡുപ്ലെസിസ്-5, അനുജ് റാവത്ത്-0, വിരാട് കോഹ്ലി-0, ഗ്ലെന്‍ മാക്‌സ്വെല്‍-12, ഷഹബാസ് അഹമ്മദ്-7, ദിനേശ് കാര്‍ത്തിക്-0, ഹര്‍ഷല്‍ പട്ടേല്‍-4, വനിന്ദു ഹസരങ്ക-8, ജോഷ് ഹേസല്‍വുഡ്-3 നോട്ടൗട്ട്, മുഹമ്മദ് സിറാജ്-2 എന്നിങ്ങനെയാണ് മറ്റു ആര്‍സിബി ബാറ്റര്‍മാരുടെ സ്‌കോറുകള്‍.

തുടര്‍ച്ചയായ രണ്ടാം മത്സരത്തിലും കോഹ്ലി 'ഗോള്‍ഡന്‍ ഡക്കാ'യി. ഹൈദരാബാദിനു വേണ്ടി മാക്രോ ജാന്‍സെണും, ടി നടരാജനും മൂന്നു വിക്കറ്റു വീതവും, ജഗദീശ സുചിത് രണ്ടു വിക്കറ്റും, ഭുവനേശ്വര്‍ കുമാറും, ഉമ്രാന്‍ മാലികും ഓരോ വിക്കറ്റ് വീതവും വീഴ്ത്തി.

ഹൈദരാബാദിനു വേണ്ടി അഭിഷേക് ശര്‍മ 28 പന്തില്‍ 47 റണ്‍സെടുത്തു. ക്യാപ്റ്റന്‍ കെയ്ന്‍ വില്യംസണ്‍ 17 പന്തില്‍ 16 റണ്‍സോടെയും,  രാഹുല്‍ ത്രിപാഠി 3 പന്തില്‍ 7 റണ്‍സോടെയും പുറത്താകാതെ നിന്നു. ആര്‍സിബിക്കു വേണ്ടി ഹര്‍ഷല്‍ പട്ടേല്‍ ഒരു വിക്കറ്റ് വീഴ്ത്തി.