കാര്യവട്ടത്ത് ഇന്ത്യയുടെ വെടിക്കെട്ട്, ഗില്ലിനും കോഹ്ലിക്കും സെഞ്ചുറി; ശ്രീലങ്കയ്ക്ക് 391 റണ്‍സ് വിജയലക്ഷ്യം

തിരുവനന്തപുരം: കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ നടക്കുന്ന ഇന്ത്യ-ഏകദിന ശ്രീലങ്ക പരമ്പരയിലെ മൂന്നാമത്തെയും അവസാനത്തെയും മത്സരത്തില്‍ ഇന്ത്യയ്‌ക്കെതിരെ ശ്രീലങ്കയ്ക്ക് 391 റണ്‍സ് വിജയലക്ഷ്യം. ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ 50 ഓവറില്‍ അഞ്ച് വിക്കറ്റിന് 390 റണ്‍സെടുത്തു.

വിരാട് കോഹ്ലിയും, ശുഭ്മാന്‍ ഗില്ലും സെഞ്ചുറി നേടി. കോഹ്ലി പുറത്താകാതെ 110 പന്തില്‍ 166 റണ്‍സെടുത്തു. 13 ഫോറും, എട്ട് സിക്‌സറും അടങ്ങുന്നതായിരുന്നു താരത്തിന്റെ ഇന്നിംഗ്‌സ്. ശുഭ്മാന്‍ ഗില്‍ 97 പന്തില്‍ 116 റണ്‍സെടുത്തു.

രോഹിത് ശര്‍മ-42, ശ്രേയസ് അയ്യര്‍-38, കെഎല്‍ രാഹുല്‍-ഏഴ്, സൂര്യകുമാര്‍ യാദവ്-നാല്, അക്‌സര്‍ പട്ടേല്‍-രണ്ട് നോട്ടൗട്ട് എന്നിങ്ങനെയാണ് മറ്റ് ബാറ്റര്‍മാരുടെ സ്‌കോറുകള്‍. ശ്രീലങ്കയ്ക്കായി ലഹിരു കുമാരയും, കസുന്‍ രജിതയും രണ്ട് വിക്കറ്റ് വീതവും, ചമിക കരുണരത്‌നെ ഒരു വിക്കറ്റും വീഴ്ത്തി.