ഹിമാചലിലെ മഴക്കെടുതിയിൽ 21 പേർ മരിച്ചു; വീണ്ടും കരകവിഞ്ഞ് ബിയാസ്, ഉത്തരാഖണ്ഡിൽ മണ്ണിടിച്ചിൽ

ഷിംല; ഹിമാചൽ പ്രദേശിൽ മഴക്കെടുതിയിൽ ഇതുവരെ 21 പേർ മരിച്ചതായി മുഖ്യമന്ത്രി സുഖ്‌വീന്ദർ സിംഗ് സുഖു അറിയിച്ചു. സോളൻ ജില്ലയിലെ ഒരു ഗ്രാമത്തിലുണ്ടായ മേഘവിസ്ഫോടനത്തിൽ ഒരു കുടുംബത്തിലെ ഏഴ് പേർ കൊല്ലപ്പെട്ടതായി ഒരു ഉദ്യോഗസ്ഥൻ പറഞ്ഞു. ഞായറാഴ്‌ച രാത്രി ജാഡോൺ ഗ്രാമത്തിലാണ് സംഭവം നടന്നത്.

രണ്ട് വീടുകൾ ഒലിച്ചുപോയി, ആറ് പേരെ രക്ഷപ്പെടുത്തിയതായി സോളൻ ഡിവിഷണൽ കമ്മീഷണർ മൻമോഹൻ ശർമ്മ പറഞ്ഞു. ഹർനം (38), കമൽ കിഷോർ (35), ഹേമലത (34), രാഹുൽ (14), നേഹ (12), ഗോലു (8), രക്ഷ (12) എന്നിവരാണ് മരിച്ചതെന്ന് സോളൻ പൊലീസ് സൂപ്രണ്ട് (എസ്‌പി) ഗൗരവ് സിംഗ് പറഞ്ഞു.

കനത്ത മഴയെ തുടർന്ന് ഷിംലയിൽ സമ്മർഹിൽ പ്രദേശത്ത് ശിവക്ഷേത്രം തകർന്ന് ഒമ്പത് പേർ മരിച്ചതായി മുഖ്യമന്ത്രി  പറഞ്ഞു. 50ഓളം പേർ ക്ഷേത്രത്തിൽ പൂജയ്ക്ക് എത്തിയിരുന്നതായി പോലീസ് പറഞ്ഞു. അഗ്നിശമന സേനാ സംഘം സ്ഥലത്തുണ്ടായിരുന്നു. പോലീസും സ്‌റ്റേറ്റ് ഡിസാസ്‌റ്റർ റെസ്‌പോൺസ് ഫോഴ്‌സിന്റെ (എസ്‌ഡിആർഎഫ്) ടീമും രക്ഷാപ്രവർത്തനത്തിൽ ഏർപ്പെട്ടു.

കഴിഞ്ഞ 24 മണിക്കൂറിനുള്ളിൽ ഹിമാചൽ പ്രദേശിലും അയൽ സംസ്ഥാനമായ ഉത്തരാഖണ്ഡിലും കനത്ത മഴ തുടരുന്നതിനിടയിലാണ് ഈ സംഭവങ്ങൾ ഉണ്ടായത്, ഇവിടെ മണ്ണിടിച്ചിലിൽ പ്രധാന റോഡുകൾ തടസ്സപ്പെട്ടു, പാലങ്ങൾ ഒലിച്ചുപോയി. ഇതോടെ വിദ്യാഭ്യാസ സ്ഥാപനങ്ങൾ അടച്ചിടേണ്ട സ്ഥിതിയാണ്. ഹിമാചൽ പ്രദേശിലെ ഷിംലയിൽ മരം കടപുഴകി വാഹനത്തിനു മുകളിൽ വീണ് സ്വകാര്യ ബസിലെ കണ്ടക്‌ടർക്ക് പരിക്കേറ്റു. 

മാണ്ഡിയിൽ 236, ഷിംലയിലെ 59, ബിലാസ്‌പൂർ ജില്ലയിൽ 40 എന്നിങ്ങനെ മൊത്തം 621 റോഡുകൾ നിലവിൽ അടച്ചിട്ടുണ്ടെന്ന് സംസ്ഥാന എമർജൻസി ഓപ്പറേഷൻ സെന്റർ അറിയിച്ചു. ഷിംലയെയും ചണ്ഡീഗഢിനെയും ബന്ധിപ്പിക്കുന്ന ഷിംല-കൽക്ക ദേശീയ പാതയുടെ ഒരു പ്രധാന ഭാഗം കഴിഞ്ഞ രണ്ടാഴ്‌ചയ്ക്കിടെ ആവർത്തിച്ചുള്ള മണ്ണിടിച്ചിലിനെ ബാധിച്ചതായി അധികൃതർ പറഞ്ഞു. കഴിഞ്ഞ 48 മണിക്കൂറായി തുടരുന്ന മഴ ഹമിർപൂർ ജില്ലയുടെ എല്ലാ ഭാഗങ്ങളിലും നാശം വിതച്ചു, ഇത് ബിയാസ് നദിയിലും അതിന്റെ കൈവഴികളിലും വെള്ളപ്പൊക്കത്തിന് കാരണമായി. 

മഴയിലും മണ്ണിടിച്ചിലിലും ഹമീർപൂരിന്റെ പല ഭാഗങ്ങളിലും വിളകൾക്കും കൃഷി ഭൂമിക്കും സർക്കാർ, സ്വകാര്യ കെട്ടിടങ്ങൾക്കും വ്യാപക നാശം സംഭവിച്ചിട്ടുണ്ട്. ജനങ്ങൾ പുറത്തിറങ്ങരുതെന്നും ബിയാസ് നദീതീരത്തിന്റെ ഭാഗത്തും പോകുന്നത് ഒഴിവാക്കണമെന്നും ജില്ലാ ഭരണകൂടം മുന്നറിയിപ്പ് നൽകിയിട്ടുണ്ട്.

ജൂൺ 24ന് ഹിമാചൽ പ്രദേശിൽ മൺസൂൺ ആരംഭിച്ചതിന് ശേഷം, മലയോര സംസ്ഥാനത്തിന് ഇതുവരെ 7020 കോടി രൂപയുടെ നാശനഷ്‌ടമുണ്ടായതായും മഴയെ തുടർന്നുള്ള അപകടങ്ങളിലും റോഡപകടങ്ങളിലും 257 പേർ മരിച്ചതായും എമർജൻസി ഓപ്പറേഷൻ സെന്റർ അറിയിച്ചു.

ഉത്തരാഖണ്ഡ്

ഉത്തരാഖണ്ഡിൽ, നിർത്താതെ പെയ്യുന്ന മഴയെ തുടർന്നുണ്ടായ മണ്ണിടിച്ചിലിൽ ദേശീയ പാതകൾ ഉൾപ്പെടെയുള്ള വിവിധ റോഡുകളിൽ ഗതാഗതം തടസ്സപ്പെട്ടതായും ഇത് ജനങ്ങളുടെ സഞ്ചാരത്തെ ബാധിച്ചതായും അധികൃതർ അറിയിച്ചു.

തെഹ്‌രിയിലെ കുഞ്ചപുരി ബഗർധറിന് സമീപം മണ്ണിടിച്ചിലിനെത്തുടർന്ന് ഋഷികേശ്-ചമ്പ ദേശീയപാതയിൽ ഗതാഗതം തടസ്സപ്പെട്ടു, അതേസമയം ഋഷികേശ്-ദേവപ്രയാഗ്-ശ്രീനഗർ ദേശീയ പാതയിൽ സഖ്നിധറിൽ ഹെവി വാഹനങ്ങളുടെ ഗതാഗതം നിർത്തിവച്ചു.

ചമോലി ജില്ലയിൽ ഞായറാഴ്‌ച വൈകുന്നേരം മുതൽ പെയ്‌ത തുടർച്ചയായ മഴയിൽ തരളി, നന്ദ നഗർ ഘട്ട് മേഖലകളിൽ വൻ നാശനഷ്‌ടമുണ്ടായി. ചമോലിയിലെ പിണ്ടാർ, നന്ദാകിനി നദികളിലെ ജലനിരപ്പ് ക്രമാതീതമായി വർധിച്ചത് സമീപ പ്രദേശങ്ങളെ അപകടത്തിലാക്കി. ആളപായമൊന്നും റിപ്പോർട്ട് ചെയ്‌തിട്ടില്ലെങ്കിലും വ്യാപകമായ സ്വത്ത് നാശം സംഭവിച്ചിട്ടുണ്ട്. ഒരു മോട്ടോർ പാലവും തൂക്കുപാലവും രാത്രി വൈകി ഒലിച്ചുപോയി.

തുടർച്ചയായി പെയ്യുന്ന മഴ നന്ദ നഗർ ഘട്ട് മേഖലയിലെ മന്ദാകിനി നദിയിലെ ജലനിരപ്പും വർധിപ്പിച്ചിട്ടുണ്ട്. ഇതേത്തുടർന്ന് സുരക്ഷിത സ്ഥാനങ്ങളിലേക്ക് മാറാൻ ഇവിടുത്തെ താമസക്കാരോട് നിർദേശിച്ചിട്ടുണ്ട്. കോട്ദ്വാറിലെ കനത്ത മഴയെത്തുടർന്ന് ഹോ നദിയിലെയും മലാൻ സുഖ്രോ നദിയിലെയും ജലനിരപ്പ് ഉയരുകയും അവയുടെ തീരത്തുള്ള നിരവധി വീടുകൾ ഒലിച്ചുപോകുകയും ചെയ്‌തു.