വീട്ടിലെ മാലിന്യങ്ങള്‍ക്കിടയില്‍ ഐഇഡി, കത്തിച്ചപ്പോള്‍ പൊട്ടിത്തെറിച്ചു ! മണിപ്പൂരില്‍ മുന്‍ എംഎല്‍എയുടെ ഭാര്യയ്ക്ക് ദാരുണാന്ത്യം

ഇംഫാല്‍: മണിപ്പൂരില്‍ ബോംബ് സ്‌ഫോടനത്തില്‍ മുന്‍ എംഎല്‍എയുടെ ഭാര്യ മരിച്ചു. സൈകുള്‍ മണ്ഡലത്തിലെ മുന്‍ എംഎല്‍എ ആയ യാംതോങ് ഹാക്കിപ്പിന്റെ ഭാര്യ ചാരുബാല ഹാക്കിപ്പാണ് (59) മരിച്ചത്. കാങ്‌പോക്‌പി ജില്ലയിലെ വീട്ടിലാണ് സ്‌ഫോടനം നടന്നത്.

കുക്കി-സോമി ആധിപത്യമുള്ള കാങ്‌പോക്‌പി ജില്ലയിലെ എകൗ മുലാമിൽ താമസിക്കുന്ന ചരുബാല മെയ്‌തെയ് സമുദായത്തിൽ നിന്നുള്ളയാളായിരുന്നു. 64 കാരനായ യാംതോംഗ് ഹാക്കിപ് സൈകുലിൽ 2012ലും 2017ലും കോൺഗ്രസ് ടിക്കറ്റിൽ വിജയിച്ചു.

 2022ലെ നിയമസഭാ തിരഞ്ഞെടുപ്പിന് മുന്നോടിയായി അദ്ദേഹം ബിജെപിയിലേക്ക് മാറി. ശനിയാഴ്ച ഉച്ചകഴിഞ്ഞ് 3 മണിയോടെയാണ് സംഭവം നടന്നത്. വീട്ടിലെ മാലിന്യങ്ങൾക്കിടയിൽ തദ്ദേശീയമായി നിർമ്മിച്ച ഐഇഡി സ്ഥാപിച്ചിട്ടുണ്ടായിരുന്നുവെന്ന് പൊലീസ് പറഞ്ഞു.

മാലിന്യം കത്തിച്ചപ്പോൾ അത് പൊട്ടിത്തെറിക്കുകയായിരുന്നു. കുടുംബ വഴക്കാണ് ആക്രമണത്തിന് കാരണമെന്ന് സംശയിക്കുന്നതായി പൊലീസ് ഉദ്യോഗസ്ഥൻ പറഞ്ഞു.

“മുൻ എംഎൽഎ തൻ്റെ അമ്മാവൻ്റെ പേരക്കുട്ടികളിൽ ഒരാളുടെ അടുത്ത് കുറച്ച് സ്ഥലം വാങ്ങിയിരുന്നു. ഇതുമായി ബന്ധപ്പെട്ട്‌ തർക്കമുണ്ടായിരുന്നു. സ്‌ഫോടനത്തിന്‌ ഇതുമായി ബന്ധമുണ്ടെന്ന് ഞങ്ങൾ സംശയിക്കുന്നു. ഞങ്ങൾ വിഷയം അന്വേഷിക്കുകയാണ്, ”അദ്ദേഹം പറഞ്ഞു.