70 വയസ്സിനു മുകളിലുള്ള പൗരന്മാർക്കുള്ള ആയുഷ്മാൻ ഭാരത് പദ്ധതി മാത്രമല്ല കേന്ദ്രം അംഗീകരിച്ചത് നിരവധി സുപ്രധാന പദ്ധതികള്‍; കാലാവസ്ഥ നിരീക്ഷണമടക്കം ഇനി പൊളിക്കും; വിശദാംശങ്ങള്‍ അറിയാം

ന്യൂഡല്‍ഹി: നിരവധി സുപ്രധാന പദ്ധതികള്‍ക്കാണ് കേന്ദ്രമന്ത്രിസഭ ബുധനാഴ്ച അംഗീകാരം നല്‍കിയത്. 70 വയസ്സിനു മുകളിലുള്ള പൗരന്മാർക്കുള്ള ആയുഷ്മാൻ ഭാരത് പദ്ധതിയാണ് ഇതില്‍ ഏറ്റവും പ്രധാനം.

യോഗത്തിലെ പ്രധാന തീരുമാനങ്ങൾ

ആയുഷ്മാൻ ഭാരത് പദ്ധതി

ആയുഷ്മാൻ ഭാരത് പിഎം-ജെഎവൈ പദ്ധതിയിലൂടെ, 70 വയസും അതിൽ കൂടുതലുമുള്ള മുതിർന്ന പൗരന്മാർക്ക് സാർവത്രിക ആരോഗ്യ പരിരക്ഷ നൽകും. 3,437 കോടി രൂപ ബജറ്റിൽ പദ്ധതി അംഗീകരിച്ചു. മൊത്തം 4.5 കോടി കുടുംബങ്ങൾക്കും 6 കോടി മുതിർന്ന പൗരന്മാർക്കും പ്രയോജനപ്പെടുമെന്ന് കേന്ദ്രമന്ത്രി അശ്വിനി വൈഷ്ണവ് പറഞ്ഞു.

സ്കീം അനുസരിച്ച്, ഇതിനകം തന്നെ പദ്ധതിയിൽ ഉൾപ്പെട്ട കുടുംബങ്ങൾക്ക്, പ്രതിവർഷം 5 ലക്ഷം രൂപ വരെ അധിക ടോപ്പ് അപ്പ് ലഭ്യമാണ്.  ഇതിന് മുമ്പ് പദ്ധതിയുടെ ഭാഗമാകാത്തവര്‍ക്ക്  ഷെയർ കവറേജിൽ പ്രതിവർഷം 5 ലക്ഷം രൂപയുടെ ആനുകൂല്യം ലഭിക്കും.

ഹൈഡ്രോപവര്‍

പുനരുപയോഗ ഊർജ മേഖലയിൽ, 2030 ഓടെ 500 ജിഗാവാട്ട് പുനരുപയോഗ ഊർജ ലക്ഷ്യം കൈവരിക്കുന്നതിന് അടിസ്ഥാന സൗകര്യങ്ങൾ വർധിപ്പിക്കുന്നതിനായി  31,350 മെഗാവാട്ട് ശേഷിയുമുള്ള ജലവൈദ്യുത പദ്ധതിക്കും കേന്ദ്ര മന്ത്രിസഭ പച്ചക്കൊടി കാട്ടി. 12,461 കോടി രൂപയാണ് ഇതിനായി നീക്കിവയ്ക്കുന്നത്.

റോഡുകൾ, പാലങ്ങൾ, ട്രാൻസ്മിഷൻ ലൈനുകൾ, ആശയവിനിമയ സൗകര്യങ്ങൾ തുടങ്ങിയ അവശ്യ അടിസ്ഥാന സൗകര്യങ്ങളുടെ വികസനത്തില്‍ കേന്ദ്രീകരിച്ചാണ് ഈ പദ്ധതി നടപ്പിലാക്കുന്നത്.

133 ജിഗാവാട്ടിൻ്റെ ജലവൈദ്യുത സാധ്യതകൾ വികസിപ്പിക്കുന്നതിലാകും പ്രധാന ശ്രദ്ധ. 200 മെഗാവാട്ട് വരെയുള്ള പദ്ധതികൾക്ക് ഒരു മെഗാവാട്ടിന് ഒരു കോടി രൂപയും വലിയ പദ്ധതികൾക്ക് 200 കോടി രൂപയും എന്ന രീതിയില്‍ സാമ്പത്തിക പിന്തുണയും നല്‍കും.

പിഎം ഇ ഡ്രൈവ് സ്‌കീം

10,900 കോടി രൂപയുടെ ധനസഹായത്തോടെ പ്രധാനമന്ത്രി ഇ-ഡ്രൈവ് പദ്ധതിക്കും കേന്ദ്രസര്‍ക്കാര്‍ അംഗീകാരം നല്‍കി. എഫ്എഇംഇ (Faster Adoption and Manufacturing of Electric and Hybrid Vehicles in India) 1 & 2 സ്കീമുകളിലൂടെ ഇലക്ട്രിക് വാഹനങ്ങൾ സ്വീകരിക്കുന്നതിനെ പദ്ധതി പിന്തുണയ്ക്കുന്നു.

എഫ്എഇംഇ  സ്കീമുകൾ ഇതിനകം ഇരുചക്രവാഹനങ്ങൾ, മുച്ചക്ര വാഹനങ്ങൾ, ആംബുലൻസുകൾ, ട്രക്കുകൾ എന്നിവയുൾപ്പെടെ 16 ലക്ഷത്തിലധികം ഇലക്ട്രിക് വാഹനങ്ങൾക്ക് സൗകര്യമൊരുക്കിയിട്ടുണ്ടെന്ന് കേന്ദ്രസര്‍ക്കാര്‍ പറയുന്നു.

പിഎംജിഎസ്‌വൈ-IV

2024-25 സാമ്പത്തിക വർഷം മുതൽ 2028-29 വരെയുള്ള കാലയളവിൽ 70,125 കോടി രൂപ അടങ്കലുള്ള പ്രധാനമന്ത്രി ഗ്രാം സഡക് യോജന-IV (പിഎംജിഎസ്‌വൈ-IV) നടപ്പിലാക്കുന്നതിന് കേന്ദ്ര മന്ത്രിസഭ അംഗീകാരം നൽകി. 62,500 കിലോമീറ്റർ റോഡുകൾ നിർമിക്കാനും നിരവധി ആവാസ വ്യവസ്ഥകളെ ബന്ധിപ്പിക്കാനും പുതിയ കണക്ടിവിറ്റി റോഡുകളിൽ പാലങ്ങൾ നവീകരിക്കാനും പദ്ധതി ലക്ഷ്യമിടുന്നു.

മിഷൻ മൗസം

കാലാവസ്ഥാ നിരീക്ഷണത്തിന് കേന്ദ്രമന്ത്രിസഭ 'മിഷൻ മൗസം' അംഗീകരിക്കുകയും രണ്ട് വർഷത്തേക്ക് 2,000 കോടി രൂപ വകയിരുത്തുകയും ചെയ്തു.

ഇന്ത്യ കാലാവസ്ഥാ വകുപ്പ്, ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മെറ്റീരിയോളജി, നാഷണൽ സെൻ്റർ ഫോർ മീഡിയം റേഞ്ച് വെതർ ഫോർകാസ്റ്റിംഗ് എന്നീ ഭൗമ ശാസ്ത്ര മന്ത്രാലയത്തിൻ്റെ 3 സ്ഥാപനങ്ങൾ ഈ ദൗത്യം നടപ്പിലാക്കും.