മോശം കാലാവസ്ഥയെ തുടര്‍ന്ന് വഴിതിരിച്ചുവിട്ടു; അവശേഷിച്ചത് ഒന്നോ രണ്ടോ മിനിറ്റ് മാത്രം പറക്കാനുള്ള ഇന്ധനം ! പിന്നാലെ ലാന്‍ഡിംഗ്; ഇന്‍ഡിഗോ വിമാനത്തിലുണ്ടായ അനുഭവത്തെക്കുറിച്ച് യാത്രക്കാരന്റെ വെളിപ്പെടുത്തല്‍; നിഷേധിച്ച് എയര്‍ലൈന്‍

ചണ്ഡീഗഡ്: ഒന്നോ രണ്ടോ മിനിറ്റ് മാത്രം പറക്കാനുള്ള ഇന്ധനം ബാക്കിനില്‍ക്കെ ചണ്ഡീഗഡ് വിമാനത്താവളത്തില്‍ ഇന്‍ഡിഗോ വിമാനം ലാന്‍ഡ് ചെയ്തതായി റിപ്പോര്‍ട്ട്. ഡെപ്യൂട്ടി പോലീസ് കമ്മീഷണർ (ഡൽഹി ക്രൈംബ്രാഞ്ച്) സതീഷ് കുമാറാണ് സമൂഹമാധ്യമത്തിലൂടെ ഇക്കാര്യം പങ്കുവച്ചത്. എന്നാല്‍ എയര്‍ലൈന്‍ ഇക്കാര്യം നിഷേധിച്ചു.  വിമാനത്തിൽ എല്ലായ്‌പ്പോഴും ആവശ്യമായ ഇന്ധനം ഉണ്ടെന്നാണ് എയര്‍ലൈനിന്റെ വാദം.

“ഏപ്രിൽ 13 ന് അയോധ്യയ്ക്കും ഡൽഹിക്കും ഇടയിൽ സർവീസ് നടത്തുന്ന ഇൻഡിഗോ ഫ്ലൈറ്റ് 6ഇ 2702 ഡൽഹിയിലെ മോശം കാലാവസ്ഥയെത്തുടർന്ന് ചണ്ഡീഗഡിലേക്ക് തിരിച്ചുവിട്ടു. സ്റ്റാൻഡേർഡ് ഓപ്പറേറ്റിംഗ് നടപടിക്രമത്തിന് അനുസൃതമായ ഒരു ഗോ-എറൗണ്ട് ക്യാപ്റ്റൻ നിർവ്വഹിക്കുകയായിരുന്നു. ഇത് തികച്ചും സുരക്ഷിതമായ ഒരു നീക്കമാണ്,” എയർലൈൻ വക്താവ് പറഞ്ഞു.

“നിയമങ്ങൾ അനുസരിച്ച് ഒരു ഇതര വിമാനത്താവളത്തിലേക്ക് വഴിതിരിച്ചുവിടാൻ വിമാനത്തിൽ എല്ലായ്‌പ്പോഴും ആവശ്യമായ ഇന്ധനം ഉണ്ടായിരുന്നു. ഞങ്ങളുടെ ബഹുമാന്യരായ യാത്രക്കാരുടെ സുരക്ഷയാണ് ഞങ്ങൾക്ക് പ്രധാനം. എയർലൈനിൻ്റെ നിയന്ത്രണത്തിനപ്പുറമുള്ള ഘടകങ്ങൾ കാരണം ഉണ്ടായേക്കാവുന്ന അസൗകര്യങ്ങളിൽ ഞങ്ങൾ ഖേദിക്കുന്നു, ”വക്താവ് കൂട്ടിച്ചേർത്തു.

ഒന്നോ രണ്ടോ മിനിറ്റ് മാത്രം പറക്കാനുള്ള ഇന്ധനം മാത്രം അവശേഷിച്ചപ്പോളാണ് അവര്‍ ലാന്‍ഡ് ചെയ്തതെന്ന്‌ ലാൻഡിംഗിന് ശേഷം ക്രൂ സ്റ്റാഫിൽ നിന്നാണ് താന്‍ അറിഞ്ഞതെന്ന് സതീഷ് പറയുന്നു.