ഇറാന്‍ പ്രയോഗിച്ചത് 180-ഓളം ബാലിസ്റ്റിക് മിസൈലുകള്‍, പലതും പ്രതിരോധിച്ച് ഇസ്രയേല്‍, ആക്രമണത്തെ ഫലപ്രദമായി നേരിട്ടത് യുഎസ് സഹായത്തോടെ; പ്രത്യാക്രമണം നടത്തിയാല്‍ കൂടുതല്‍ മിസൈലുകള്‍ വിടുമെന്ന് ഇറാന്‍, മേഖലയിലേക്ക് കൂടുതല്‍ സൈനികരെ എത്തിക്കുമെന്ന് പെന്റഗണ്‍; സംഘര്‍ഷം രൂക്ഷമാകും ?

ടെല്‍ അവീവ്: ഇറാന്‍ ഇസ്രയേലിന് നേരെ പ്രയോഗിച്ചത് നിരവധി ബാലിസ്റ്റിക് മിസൈലുകളെന്ന് റിപ്പോര്‍ട്ട്. 180-ഓളം മിസൈലുകളാണ് പ്രയോഗിച്ചത്. ജനം ബോംബ് ഷെല്‍ട്ടറുകളില്‍ അഭയം തേടി. 

പല മിസൈലുകളും ഇസ്രായേലിൻ്റെ വ്യോമ പ്രതിരോധ സംവിധാനം പ്രതിരോധിച്ചു. ചിലത് മധ്യ, തെക്കൻ ഇസ്രായേലിൽ പതിച്ചതായി ഇസ്രായേൽ സൈന്യം അറിയിച്ചു. ഇസ്രായേലിൽ ആളപായമുണ്ടായതായി ഇതുവരെ റിപ്പോർട്ട് ചെയ്തിട്ടില്ല. എന്നാൽ അധിനിവേശ വെസ്റ്റ് ബാങ്കിൽ ഒരു പലസ്തീൻകാരൻ മരിച്ചതായി റിപ്പോര്‍ട്ടുണ്ട്.

ഇസ്രയേലിനെ സഹായിച്ച് യുഎസ്‌

യുഎസിന്റെ ഉള്‍പ്പെടെ സഹായത്തോടെ ഇറാന്റെ ആക്രമണത്തെ ഇസ്രായേൽ ഫലപ്രദമായി പരാജയപ്പെടുത്തിയെന്നാണ് റിപ്പോര്‍ട്ട്. ഇറാനിയൻ ആക്രമണത്തെ ലോകം മുഴുവൻ അപലപിക്കണമെന്ന് യുഎസ്‌ സ്റ്റേറ്റ് സെക്രട്ടറി ആൻ്റണി ജെ ബ്ലിങ്കെൻ പറഞ്ഞു.

അമേരിക്കൻ നേവൽ ഡിസ്ട്രോയറുകൾ ഇസ്രായേലുമായി ചേർന്ന് ഇൻബൗണ്ട് മിസൈലുകൾ വെടിവച്ചിട്ടുണ്ടെന്ന് യുഎസ്‌ ദേശീയ സുരക്ഷാ ഉപദേഷ്ടാവ് ജേക്ക് സള്ളിവൻ മാധ്യമപ്രവർത്തകരോട് പറഞ്ഞു. ആക്രമണം മുൻകൂട്ടിക്കണ്ട് കൃത്യമായ സംയുക്ത ആസൂത്രണം ഉണ്ടായിരുന്നുവെന്ന് അദ്ദേഹം പറഞ്ഞു.

രണ്ട് യു.എസ്. നേവൽ ഡിസ്ട്രോയറുകൾ ഇറാനിയൻ മിസൈലുകൾക്കെതിരെ ഒരു ഡസൻ ഇൻ്റർസെപ്റ്ററുകൾ വിക്ഷേപിച്ചു. അമേരിക്കൻ സൈനികർക്ക് പരിക്കേറ്റിട്ടില്ലെന്ന് പെൻ്റഗൺ പ്രസ് സെക്രട്ടറി ജനറൽ പാറ്റ് റൈഡർ മാധ്യമപ്രവർത്തകരോട് പറഞ്ഞു. മേഖലയിലേക്ക് കൂടുതല്‍ സൈനികരെ എത്തിക്കുമെന്നാണ് പെന്റഗണ്‍ പ്രഖ്യാപിച്ചത്.

സംഘര്‍ഷം രൂക്ഷമാകും ?

സ്ഥിതിഗതികൾ വിലയിരുത്താൻ ഇസ്രായേലിൻ്റെ ഉന്നത കമാൻഡർമാർ യോഗം ചേര്‍ന്നു. ഇസ്രായേൽ ഉചിതമായ രീതിയിലും സമയത്തിലും പ്രതികരിക്കുമെന്ന് ചീഫ് സൈനിക വക്താവ് റിയർ അഡ്മിൻ ഡാനിയൽ ഹഗാരി പറഞ്ഞു.

ഇസ്രായേൽ പ്രത്യാക്രമണം നടത്തിയാൽ കൂടുതൽ മിസൈലുകൾ വിക്ഷേപിക്കുമെന്ന് ഇറാൻ പറഞ്ഞു. ആക്രമണത്തിനിടെ, ജറുസലേമിലും ടെൽ അവീവിലും ഉൾപ്പെടെ ഇസ്രായേലിലുടനീളം വ്യോമാക്രമണ സൈറണുകൾ മുഴങ്ങി.