നാടുമുഴുവന്‍ കൊതുക്, ഒപ്പം ഡെങ്കിപ്പനിയും; പനിബാധിതര്‍ വര്‍ധിച്ചതോടെ ആശുപത്രികളിലെ കിടക്കകളും ഫുള്‍

കോട്ടയം: ഇടവിട്ടുള്ള മഴ, മൂടിയ കാലാവസ്ഥ. കൊതുകുകള്‍ പെരുകി ഒപ്പം ഡെങ്കിപ്പനിയും. സംസ്ഥാനത്ത് ഈ വര്‍ഷം 71,461 ഡെങ്കിപ്പനി കേസുകളാണു റിപ്പോര്‍ട്ടു ചെയ്തത്. കഴിഞ്ഞ ദിവസങ്ങളായി സംസ്ഥാനത്തു പനിബാധിതരുടെ എണ്ണത്തിലും വന്‍ കുതിപ്പാണുണ്ടായിരിക്കുന്നത്. ജില്ലാ താലൂക്കാശുപത്രികളില്‍ രാവിലെ മുതല്‍ രോഗികളുടെ വന്‍ തിരക്കാണ് അനുഭവപ്പെടുന്നത്. കൂടുതല്‍ പേരും പനിബാധിച്ച് എത്തുന്നവരാണ്.

ഒരു ദിവസം 10,000 പേര്‍ ഇപ്പോള്‍ സംസ്ഥാനത്തെ ആശുപത്രികളില്‍ പനി ബാധിച്ചു ചികിത്സ തേടുന്നുണ്ട്.
ഇവരില്‍ ഒരു വിഭാഗത്തിനാണു ഡെങ്കിപ്പനി റിപ്പോര്‍ട്ടു ചെയ്തത്. കഴിഞ്ഞ 19നു മാത്രം 173 ഡെങ്കി സസ്‌പെക്ടഡ് കേസുകള്‍ റിപ്പോര്‍ട്ടു ചെയ്ത്. ഇതില്‍ 32 പേര്‍ക്കു ഡെങ്കി സ്ഥിരീകരിക്കുകയും ചെയ്തു. സര്‍ക്കാര്‍ ആശുപത്രികളിലെ മാത്രം കണക്കാണിത്. 

സ്വകാര്യ ആശുപത്രിയില്‍ ചികിത്സ എണ്ണം കൂടി കണക്കിലെടുത്താല്‍ വന്‍ വര്‍ധനവും ഉണ്ടാകും.
സാധാരണ ഏപ്രില്‍, മേയ്, ജൂണ്‍ മാസങ്ങളിലാണു ഡെങ്കിപ്പനി ബാധിതര്‍ വര്‍ധിക്കുന്നത്. എന്നാല്‍, നവംബറിലും ഡെങ്കിപ്പനി വര്‍ധിക്കുനന്നത് ആശങ്ക വര്‍ധിപ്പിക്കുന്നുണ്ട്.

ഓരോ തരം ഡെങ്കി വൈറസുകളും ബാധിച്ചാല്‍ ജീവിതകാലം മുഴുവന്‍ അതിന്റെ പ്രതിരോധ ശേഷിയുണ്ടാകുമെന്നാണു കണ്ടെത്തല്‍. കേരളത്തില്‍ ഭൂരിഭാഗം പേരും ഒന്ന്, രണ്ട് തരം ഡെങ്കിവൈറസുകള്‍ ബാധിച്ചു പ്രതിരോധം ആര്‍ജിക്കുമ്പോഴാണു പുതിയ വൈറസ് ബാധിക്കുന്നത്. ഡെങ്കി ആവര്‍ത്തിക്കുന്നത് ആരോഗ്യം അപകടത്തിലാക്കും. 

പ്രതിരോധശേഷി കുറഞ്ഞവരില്‍ ഇതു മരണത്തിനു കാരണമാകും. പ്രമേഹം, രക്താതിമര്‍ദ്ദ, ഹൃദ്രോഗം, വൃക്ക രോഗം തുടങ്ങിയ അനുബന്ധ രോഗങ്ങളുള്ളവര്‍, പ്രായമായവര്‍, ഗര്‍ഭിണികള്‍,കുഞ്ഞുങ്ങള്‍,രോഗ പ്രതിരോധശേഷി കുറവുള്ളവര്‍ എന്നിവര്‍ പ്രത്യേകം ശ്രദ്ധിക്കണം.

ഡെങ്കിപ്പനിയുടെ ലക്ഷണങ്ങള്‍

ഡെങ്കി വൈറസ് ശരീരത്തില്‍ പ്രവേശിച്ചാല്‍ അഞ്ച് മുതല്‍ എട്ട് ദിവസം എടുത്താണ് രോഗം പുറത്തേക്ക് വരുന്നത്. അതി തീവ്രമായ പനി (104 ഡിഗ്രി വരെ), കടുത്ത തലവേദന, കണ്ണുകള്‍ക്ക് പിന്നില്‍ വേദന, കടുത്ത ശരീരവേദന തൊലിപ്പുറത്ത് ചുവന്ന പാടുകള്‍, ഛര്‍ദ്ദിയും ഒക്കാനാവും തുടങ്ങിയവയാണ് ഇതിന്റെ പ്രധാന ലക്ഷണങ്ങള്‍.

ഡെങ്കിപ്പനി മൂര്‍ച്ചിച്ച് കഴിഞ്ഞാല്‍ പൊതുവെയുള്ള ലക്ഷണങ്ങള്‍ക്കൊപ്പം അസഹനീയമായ വയറുവേദന, മൂക്കില്‍ നിന്നും വായില്‍ നിന്നും മോണയില്‍ നിന്നും രക്തസ്രാവം, ബോധക്ഷയം, തൊണ്ട വരളുക, ശ്വാസോഛാസത്തിന് വിഷമം, രക്തത്തോടു കൂടിയോ ഇല്ലാതയോ ഇടവിട്ടുള്ള ഛര്‍ദ്ദി, കറുത്ത നിറത്തില്‍ മലം പോകുക, അമിതമായ ദാഹം എന്നീ ലക്ഷണങ്ങള്‍ കൂടി കാണുകയാണെങ്കില്‍ എത്രയും വേഗം വൈദ്യ സഹായം തേടണം.

എങ്ങനെ പ്രതിരോധിക്കാം

വീടും പരിസരവും വൃത്തിയായി സൂക്ഷിക്കണം. വെള്ളം കെട്ടി നില്‍ക്കുന്നത് അനുവദിക്കരുത്. രോഗം വന്നയാളെ കൊതുക് വലയ്ക്കുള്ളില്‍ തന്നെ കിടത്താന്‍ ശ്രമിക്കുക. രോഗിയെ കടിക്കുന്ന കൊതുക് മറ്റുള്ളവരെ കടിച്ചാല്‍ രോഗം പകരാന്‍ സാധ്യതയുണ്ട്.

കൊതുക് കടിക്കാതിരിക്കാന്‍ പ്രത്യേകം ശ്രദ്ധിക്കണം. കൈകളും കാലുകളും നന്നായി മറു് വസ്ത്രം ധരിക്കാന്‍ ശ്രദ്ധിക്കാം. കൊതുക് കടി ഒഴിവാക്കാന്‍ തൊലിപ്പുറത്ത് ക്രീമുകള്‍, ലേപനങ്ങള്‍ എന്നിവ ഉപയോഗിക്കാം. ഡെങ്കിപ്പനിയുടെ ലക്ഷണമാണെന്ന് തോന്നിയാല്‍ രോഗിക്ക് മതിയായ വിശ്രമം  നല്‍കേണ്ടതും ധാരാളം വെള്ളം കുടിക്കേണ്ടതുമാണ്.

രോഗം വന്ന് കഴിഞ്ഞാല്‍ വിദഗ്ധ ചികിത്സയാണ് പ്രധാനം. ആരും തന്നെ സ്വയം ചികിത്സ ചെയ്യരുത്. രോഗ ലക്ഷണങ്ങള്‍ കണ്ടാല്‍ യഥാസമയം ചികിത്സ നല്‍കേണ്ടത് വളരെ പ്രധാനമാണ്. രോഗം ഗുരുതരമായവര്‍ക്ക് രക്തം, പ്ലാസ്മ, പ്ലേറ്റ്‌ലെറ്റ് ചികിത്സ എന്നിവ നല്‍കാറുണ്ട്.

ശ്രദ്ധിക്കേണ്ട കാര്യങ്ങള്‍

കൊതുക് പെറ്റുപെരുകാന്‍ സാധ്യതയുള്ള ഉറവിടങ്ങള്‍ ഇല്ലാതാക്കലാണ് പ്രധാനമായും നടത്തേണ്ടത്. വെള്ളം കെട്ടി നില്‍ക്കാന്‍ സാധ്യതയുള്ള എല്ലാ വസ്തുക്കളും നീക്കം ചെയ്യുക. കെട്ടി നില്‍ക്കുന്ന വെള്ളം ഒഴുക്കിക്കളയുകയും വേണം.

മഴയെ തുടര്‍ന്ന് വീടുകളുടെ ചുറ്റുപാടും അടിഞ്ഞ് കുടിയിട്ടുള്ള കുപ്പികള്‍, ഉപയോഗശൂന്യമായ പാത്രങ്ങള്‍, ബോട്ടിലുകള്‍, ടയറുകള്‍ എന്നിവയെല്ലാം നീക്കം ചെയ്യേണ്ടതാണ്. ഇവയിലുള്ള വെള്ളത്തില്‍ കൊതുകുകള്‍ മുട്ടയിട്ട് വളരും. ടെറസ്, പൂച്ചട്ടി, ഫ്രിഡ്ജിനു  പുറകിലുള്ള ട്രേ, ഇവിടെ നിന്നെല്ലാം വെള്ളം നീക്കം ചെയ്യണം.

റബ്ബര്‍ തോട്ടങ്ങളിലുള്ള ചിരട്ടകളില്‍ കെട്ടിക്കിടക്കുന്ന വെള്ളം ഒഴിച്ച് കളഞ്ഞ് കമഴ്ത്തിവക്കണം.
വീട്ടിലും പരിസരത്തിലും കെട്ടികിടക്കുന്ന വെള്ളം നീക്കം ചെയ്യാനുള്ള ഡ്രൈ ഡേ ആഴ്ചയിലൊരു ദിവസം നിര്‍ബന്ധമായും എല്ലാ വീടുകളിലും നടത്തിയിരിക്കണം. 

സെപ്റ്റിക് ടാങ്കുമായി ബന്ധിച്ചിട്ടുള്ള വേസ്റ്റ് പൈപ്പിന്റെ അഗ്രം കൊതുക് വല ഉപയോഗിച്ച് മുടാന്‍ ശ്രദ്ധിക്കണം. കൊതുകു വല ഉപയോഗിച്ചും ശരീരം മുഴുവന്‍ മൂടുന്ന വസ്ത്രം ധരിച്ചും കൊതുകിനെ അകറ്റുന്ന തിരികളും ലേപനങ്ങളും ഉപയോഗിച്ചും കൊതുകു കടിയില്‍ നിന്നും രക്ഷ തേടേണ്ടതാണ്.