ഐഎഎസ് തലപ്പത്ത് അഴിച്ചുപണി: ശ്രീറാം വെങ്കിട്ടരാമനു കേരള ഫിനാന്‍ഷ്യല്‍ കോര്‍പറേഷന്‍റെ പൂര്‍ണ അധിക ചുമതല; ആഭ്യന്തര വകുപ്പ് സെക്രട്ടറി വിശ്വനാഥ് സിൻഹയ്ക്ക് ജലസേചന വകുപ്പിന്റെ അധിക ചുമതല

തിരുവനന്തപുരം: ചീഫ് സെക്രട്ടറി സ്ഥാനത്ത് നിന്ന് ഡോ. വി വേണു വിരമിച്ചതിന് പിന്നാലെ സംസ്ഥാനത്തെ ഐഎഎസ് തലപ്പത്ത് അഴിച്ചുപണി. പുതിയ ചീഫ് സെക്രട്ടറിയായി ശാരദാ മുരളീധരനെ നേരത്തേ തീരുമാനിച്ചിരുന്നു. ശാരദാ മുരളീധരൻ ശനിയാഴ്ച ചുമതലയേല്‍ക്കും.

ആഭ്യന്തര വകുപ്പ് സെക്രട്ടറി വിശ്വനാഥ് സിൻഹയ്ക്ക് ജലസേചന വകുപ്പിന്റെ അധിക ചുമതല കൂടി നൽകി. ഡോക്ടർ വീണ എൻ മാധവന് ഭരണ നവീകരണ വകുപ്പിന്റെ അധിക ചുമതല നൽകി.

ശ്രീറാം വെങ്കിട്ടരാമനു കേരള ഫിനാന്‍ഷ്യല്‍ കോര്‍പറേഷന്‍റെ (കെഎഫ്സി) പൂര്‍ണ അധിക ചുമതലയും നല്‍കി. വിനയ് ഗോയലിനെ ദേശീയ ആരോഗ്യ മിഷൻ ഡയറക്ടറായി നിയമിച്ചു. 

വാട്ടര്‍ അതോറിറ്റിയുടെ പുതിയ എംഡി ജീവൻ ബാബുവാണ്. കെ. ഗോപാലകൃഷ്ണനു വ്യവസായ വകുപ്പ് ഡയറക്ടറുടെ അധിക ചുമതല നല്‍കി. പിആർഡി ഡയറക്ടറായി ടിവി സുഭാഷിനെ നിയമിച്ചു. സഹകരണ വകുപ്പ് രജിസ്ട്രാർ സ്ഥാനത്ത് ഡി സജിത്ത് ബാബുവിനെ നിയമിച്ചു.