'കേരളത്തിന്റെ മാപ്പുണ്ട്‌, മലപ്പുറം ജില്ലയുടെ മാപ്പുണ്ട്‌, നിലമ്പൂരിന്റെ മാപ്പുണ്ട്‌; ഇനിയും വേണോ മാപ്പ്‌'; ഐപിഎസ് അസോസിയേഷനെ പരിഹസിച്ച് പിവി അൻവർ

മലപ്പുറം: എസ്‌പി എസ്.ശശിധരനെ വിമർശിച്ചതിന് മാപ്പ് പറയണമെന്ന ഐപിഎസ് അസോസിയേഷന്റെ ആവശ്യം തള്ളി പി.വി. അന്‍വര്‍ എം.എല്‍.എ. പകരം കേരളത്തിന്റെയും, മലപ്പുറം ജില്ലയുടെയും, നിലമ്പൂരിന്റെയും മാപ്പുകള്‍ അന്‍വര്‍ ഫേസ്ബുക്കില്‍ പരിഹാസരൂപേണ പങ്കുവച്ചു. 'കേരളത്തിന്റെ മാപ്പുണ്ട്‌, മലപ്പുറം ജില്ലയുടെ മാപ്പുണ്ട്‌, നിലമ്പൂരിന്റെ മാപ്പുണ്ട്‌. ഇനിയും വേണോ മാപ്പ്‌' എന്ന അടിക്കുറിപ്പോടെയായിരുന്നു പോസ്റ്റ്.

എസ്‌പി എസ്.ശശിധരന്‍ നമ്പർവൺ സാഡിസ്റ്റാണെന്നും ഇഗോയിസ്റ്റിക്കാണെന്നും അൻവർ പിന്നീട് മാധ്യമങ്ങളോട് പറഞ്ഞു. അദ്ദേഹം നല്ല ഓഫിസറല്ലെന്നും പൂജ്യം മാർക്കാണ് അദ്ദേഹത്തിന് ഇടാനുള്ളതെന്നും വിമർശിച്ചു. 

 ഇന്നലെ മലപ്പുറം എസ്പിയെ അന്‍വര്‍ പൊതുവേദിയില്‍ അധിക്ഷേപിച്ചത് വിവാദമായിരുന്നു. ഇതിന് പിന്നാലെ ഐപിഎസ് അസോസിയേഷൻ അൻവറിനെതിരെ പ്രമേയം പാസാക്കിയിരുന്നു. അൻവർ മാപ്പ് പറയണമെന്നാണ് പ്രമേയത്തിലുള്ളത്.