കോഴിക്കോട്: കോഴിക്കോട് മെഡിക്കല് കോളേജ് ആശുപത്രിയില് കൈവിരല് ശസ്ത്രക്രിയയ്ക്ക് പ്രവേശിപ്പിച്ച നാലുവയസുകാരിയുടെ നാവില് ശസ്ത്രക്രിയ നടത്തിയ സംഭവത്തില് സര്ക്കാരിനെ വിമര്ശിച്ച് പ്രതിപക്ഷ നേതാവ് വി.ഡി. സതീശന്. പിഞ്ചുകുഞ്ഞിന്റെ വിരലിന് പകരം നാവ് മുറിക്കുന്നതാണോ സര്ക്കാര് കൊട്ടിഘോഷിക്കുന്ന നമ്പര് വണ് കേരളമെന്ന് അദ്ദേഹം ചോദിച്ചു.
എല്ലാ വകുപ്പുകളിലുമെന്ന പോലെ ആരോഗ്യവകുപ്പിലും ചോദിക്കാനും പറയാനും ആരുമില്ലാത്ത സ്ഥിതിയാണ്. കാലങ്ങള് കൊണ്ട് കേരളം ആരോഗ്യ മേഖലകളില് ആര്ജ്ജിച്ചെടുത്ത നേട്ടങ്ങള് നിരന്തരം ഇല്ലാതാക്കുകയെന്നതാണ് സര്ക്കാര് ഇപ്പോള് ചെയ്യുന്നതെന്നും പ്രതിപക്ഷനേതാവ് വിമര്ശിച്ചു.
തുടര്ച്ചയായി സംഭവിക്കുന്ന ചികിത്സാപ്പിഴവുകളിലൂടെ സര്ക്കാര് ആശുപത്രികളുടെ വിശ്വാസ്യതയാണ് ചോദ്യം ചെയ്യപ്പെടുന്നതെന്നും സതീശന് പറഞ്ഞു.