അഗളി: അട്ടപ്പാടിയില് യുവാവിനെ സംഘം ചേര്ന്ന് മര്ദിച്ചു കൊലപ്പെടുത്തിയ കേസില് ഒരാള് കൂടി അറസ്റ്റില്. തിരുവനന്തപുരം സ്വദേശി അനന്തു (19) ആണ് അറസ്റ്റിലായത്. ഇതോടെ കേസില് അറസ്റ്റിലായവരുടെ എണ്ണം ഏഴായി. പത്ത് പ്രതികളുള്ള കേസില് ഇനി മൂന്ന് പേര് കൂടി പിടിയിലാകാനുണ്ട്.കൊടുങ്ങല്ലൂര് സ്വദേശി നന്ദകിഷോര് (26) ആണ് കുറുവടി കൊണ്ടുള്ള ക്രൂര മര്ദനമേറ്റ് കൊല്ലപ്പെട്ടത്. ജൂണ് 30ന് രാത്രി പത്തിനാണു നാടിനെ നടുക്കിയ സംഭവമുണ്ടായത്.
അട്ടപ്പാടി കാവുണ്ടിക്കല്ലില് ഇരട്ടക്കുളത്തുള്ള ഫാം ഹൗസില്വച്ചാണു പ്രതികള് യുവാവിനെ മര്ദിച്ചത്. കേസില് നേരത്തെ അട്ടപ്പാടി ഭൂതിവഴിയില് പ്രസാദം വീട്ടില് വിപിന് പ്രസാദ് (24), ഒറ്റപ്പാലം പാത്തംകുളം പുലാക്കല് വീട്ടില് നാഫിഹ് (24), ഒറ്റപ്പാലം വരോട് ചാത്തംകുളംവീട്ടില് അഷറഫ് (33), ഒറ്റപ്പാലം വരോട് അത്തിക്കുര്ശി സുനില്കുമാര് (24), അഗളി ഭൂതിവഴിയില് മാരി എന്ന പ്രവീണ് (23), അഗളി ഭൂതിവഴിയില് രാജീവ് (22) എന്നിവരെ പോലീസ് അറസ്റ്റു ചെയ്തിരുന്നു.
ഒന്നാംപ്രതി വിപിന്പ്രസാദിനു കൈതോക്കു വാങ്ങി നല്കാമെന്ന വാഗ്ദാനം നല്കി നന്ദകിഷോറും സുഹൃത്ത് കണ്ണൂര് സ്വദേശിയായ വിനയനും ചേര്ന്ന് ഒരു ലക്ഷം രൂപ വാങ്ങിയെടുത്തെങ്കിലും തോക്ക് നല്കുകയുണ്ടായില്ല. ഈ പണം വാങ്ങുന്നതിനായി ഇരട്ടക്കുളത്തുള്ള ഫാമിംഗ് ഹൗസില് പ്രതികളെ എത്തിച്ചു മര്ദിക്കുകയാണുണ്ടായതെന്നു പോലീസ് പറഞ്ഞു.